Psalms 69:3-29

³Ke m’ay gelngig ma ke amith k’angag ko pong ni gu be tay ni man ayuw, ma ke amith lan owcheg i changarnag e ayuw rom.

⁴Pi’in yad be fanenikayeg ndariy tapgin e yad ba pire’ nga piyan lolugeg; pi to’ogor rog e yad be lifith l’ugunrad nib togopluw ngog yad ba gel ma yad ba’adag ni ngar li’edgag nggum’. Kar gel niged yad ngog ni nggu pag ngorad bogi n’en ni gathi gu iring.

⁵Got, denen rog e de mith u p’eowchem; ga manang fanag balyang!

⁶Dab mpageg ngug girengiy e tamra’ nga daken e pi’in gur e yad be toer ngom, i gur SOMOL ni Got ni Gubin ma Rayag Rom ni Th’abi Tolang! Dab mu pageg nggu girengiy e may’fan nga daken e pi’in yad ma meybil ngom, I gur Got nu Israel!

⁷Thin nib tagan e yibe yog ngog ni bocham, ma kug mathrow ko tamra’.

⁸Kug bod ba milekag ngak pi girdi’eg, gowa gu be’ u bang ngak e girdi’ ko tabnaw rog.

⁹Rogon feni pasigan’ug ni nggu tiyan’ug ko Tempel rom e be gak’ u lan ngorongoreg ni bod ba nifiy; thin ni kireb ni yibe yog ngom e be kun ngog.

¹⁰Ra gu pag e abich ni bochan e nge sobut’anug u p’eowchem, me yog e girdi’ e thin nib tagan ngog;

¹¹mra gu chuw nga madan e tayam’, miyad moning nigeg.

¹²Yad be weliy murung’ageg u kanawo’ i yan, ma pi tamu’un rrum e yad be tunguy e tang ni murung’ageg.

¹³Machane gag e bay gu meybil ngom, i gur SOMOL; Got, mu fulweg taban e meybil rog ko ngiyal’ ni kam turguy ni bochan ga’ngin e t’ufeg rom’, ya gab yul’yul’ ko tin ka mu micheg ni ga ra ayuwegey.

¹⁴Mu ayuwegneg nge dab kug nguchur nga fithik’ e rungdu’; mu yororiyeg rok e pi to’ogor rog, ma ga ayuwegneg nge dab gu ligil nga’ar.

¹⁵Dab mpag e ran nge yib i thareyeg; dab mpageg nggu limoch u ar, ara mpageg nggu wan nga low ko yam’.

¹⁶SOMOL, mu fulweg taban e meybil u fanam gol ko fare t’ufeg rom ni dabimus; mu changar ngog u fithik’ gelngin e runguy rom ni ba ga’!

¹⁷Dab mmithegem rok e tapigpig rom; ku gu par nga fithik’ e oloboch nib gel, mu fulweg taban e meybil rog e chiney!

¹⁸Moy ngog ngam ayuwegneg; mu lagneg u pa’ e pi to’ogor rog.

¹⁹Ga manang rogon e thin nib kireb ni yibe yog ngog, nga rogon ni yibe tamra’ nigeg ma yibe darifan nigeg; ga be guy urngin e to’ogor rog.

²⁰Thin ni kireb ni yibe yog ngog e ke kireban’ug ngay, ma kug par ndabiyag ni gu ayuwegneg. Kug finey ni mang e runguyeg be’, ma dariy be’ nike runguyeg; ara be’ ni nge fal’eg lanin’ug, ma da gur pir’eg be’ nra rin’.

²¹Ra gum’ ko bilig, ma yub e yad ra pi’ ngog; mra gum’ ko belel, miyad pi’ e mugnin ni nggu unum.

²²Pi mur ni yad be tay e mang e yigi kireb nagrad; pi madnom ni yad be tay e mang e yigi mang ba wup ngorad!

²³Mu gagiyeg nagrad ngar ma’ewgad; mu gagiyegnag e niw u keru’rad nge par ni gubin ngiyal’ ma bwaer!

²⁴Mu pu’og e damumuw rom nge dakenrad; damumuw rom nib gel e nge kolrad!

²⁵Mang e yugun n’ag e yungi n’en ni yad ma par riy nge par ni dakriy be’ riy; mang e par e pi tent rorad ni ndakuriy be’ riy ni kabfos!

²⁶Yad be gafgownag e pi’in kam gechignag; yad be weliy murung’agen e gafgow ni be tay e pi’in kam maad’ad ngorad.

²⁷Mu tay urngin e denen rorad u wun’um; dab mu unegrad nga fithik’ e pi’in ka mu mat’aw nagrad ngom.

²⁸Mu thang fithingrad u babyoren e yafos; dab mu unegrad nga babyoren e tirom e girdi’.

²⁹Ku gum’ ko amith nge ngochngochan’; A Got, mu chuwegeg u fithik’ ngam mat’aw nigeg!