Psalms 68:3-34

³Bare kariimet ningo diram mu nongomang kua kaparuk se Kaem koma te amilmilamonko; nuna ninguru amilmilamonko.

⁴Ana Kaem ko nup patawura ko wur ilunak ale nup patawunakko. Nup patawuralko. Nu taiti nuwi awote daiga ale namara ko Kaem. Nu koma te amilmilaralko. Noko nup mu Yawe.

⁵Kaem nu ko kuwim laili te bagoso, ale kuriang nonet nunam kuera mu nunga bitarso, ale imet nugari kuera mu nunga sinar taso.

⁶Nu kariimet nungumik gue suan mena mu nunga sangarso se launuria gue suan gema gilingisan. Se kariimet talipara ningi mu nunga giso ale amilmil nungarso. Bare nusupuling lagara ko kariimet mu sor garagara kiriyam memek mu ningi baga gilingisan.

⁷O Kaem, ni girakala nika kariimet nunga giem, ale ni girem ale sor maraka merang mu te nongorak aolak iluwem.

⁸Tom mu te ni tairem mu tuwik biya kaparam ale wanara biya tala kaparam se ali yukuam, mu awuk, ni duruk Sinai ko Kaem, se Israel ko Kaem.

⁹Ni tuwik biya beterem se kaparam se nika kariimet yu nungarem, ale nika ali magaram mu aking na yu welang tuem.

¹⁰Nika kariimet ali mu te kuwim taman ale dagiman; se nika gemang motam ningo mu te kariimet nungumik mel mena mu nunga bituem.

¹¹Kari Biya den bo balu paogam, se imet motam biya giman karogo nama iwita balman:

¹²“King arika nunga kager kari memek mu nongorak melmasak warman ale nagu sapaman o! Se Israel kari gi karogo nama nunga sasal kawam ningi imet nungarman, se gi parusuwu nunumi tuman o!

¹³Bare nina kari am baga se sipsip por ningi mu nunga bitaruwaman mu karogotala kowo! Inangnang dora, luman silver te nunga se mone gold te nunga, se mel ningo ningo mu gialko.”

¹⁴Nunguningta, Kaem Sokel Garagar king alo mu nunga moram parusuwuram se parasaman, ale taiti nuwi duruk Zalmon ira kaluwuso iwitata sor ereman.

¹⁵O Duruk Bashan, ni duruk sokel garagar, nika motongar se kuamuru kuting suen biya,

¹⁶ni anape ko duruk Zion, Kaem te daigok ale pempem te bagarukko atumukiram, wore ko gemang maga lagoso? Yawe kota umu te tom suen biya baga se lagarukko balam.

¹⁷Ikiko! Kaem ko kager ko mel aora aora suen biya nunguningkiri, am kaura koma mena. Kari Biya laili nunguningkiri Duruk Sinai beteram ale tai ko kuwim laili umu te bagoso.

¹⁸O Yawe, ni talipara kari suen biya nunga giem, ale nongorak nup biya taukko nama tarigirem; se kariimet munan ago tai kisukasan; nusupuling lagara ko kariimet alo mu agotala munan ago tai kisukasan. Se nunguningta nunguningkiri, ni Kaem Yawe ka kuwim laili umu te bagasam.

¹⁹Ana Kari Biya nup patawunakko, nu kota suanta anananga Bataguru Tata ko Kaem; nu tom pempem la anananga ikup giso.

²⁰Nu Yawe, anananga Sangaru Tata ko Kaem, kuera mateng ko lage memek te nanga bataguru taso.

²¹Nunguningta, Kaem kager kari memek nunga nusupuling ita pakakumurokko; mu awuk, nuna kiwem memek pempem bita lagasan.

²²Kari Biya iwita balam, “Ani Duruk Bashan ko kager kari memek mu nongorak tai kaparikko; ale kager kari gagi du biya nukum te bagamon ta wore nongorak tai bausekko;

²³asele nina mu nunga maguwural ale nunga gue awote aolak iluwalko; se ninga kausik mu nunga gue namonko.”

²⁴O Kaem, aninga King, ani kariimet mugum karogo numi kowom kaoram ale nika nip biya patawumonko nika temple ningi kapawasan owore nungarkiwasam.

²⁵Wur iluwa ko kariimet mu giriman se bawe mora ko kariimet mu nubiring ko; se galawalang sokelel sisuwura ko kuriang itiwik mu kusumuri aolak iluwasan.

²⁶Nuna aisan ale balsan, “Kaem ko kariimet biya, ko nup patawuralko! Nina Israel ko kariimet, nina Yawe ko nup patawuralko!”

²⁷Benjamin, kari mom kopa, mu ko gue mu giriman; se Judah ko kari supuling bibiya mu Benjamin ko mu nogowom karowasan; asele Zebulun se Naphtali ko kari supuling bibiya mu atumukira taiwasan.

²⁸O Kaem, nika sokel aora garagar mu wetang saparko; nika sokel girakala nanga kausem iwitata, aking nanga kasuruko.

²⁹Nika temple mu Jerusalem aniso, buta se king suen biya nunga munan karogo tai kisimonko.

³⁰Egypt mu mel diwang memek aora bo yu lom ningi bagoso wore iwita; se deleng te irako. Sor saki mu nu bowa ningi buffalo diwang bibiya iwita bagasan, se sor saki gotektek mu buffalo gotektek iwitatala bagasan, mu ni suen la nunga nosokel menawurko. Se mel diwang mu silver mel karogo tai kisokko; se sor saki gotektek kager ko la kuesan mu nunga karo parusuwur se nagu parasamonko.

³¹Sor Egypt mu barowara karu karu nunga mel ningo ningo bronze te nunga mu karogo tai kisimonko; Ethiopia kariimet mu nguanga nguanga nuguting karogo tai kisimonko.

³²Nina ali sor suen la ko kariimet, Kaem ko wur iluwalko; Kari Biya ko nup patawura ko wur iluwalko.

³³Ikialko. Kaem sokel karogo mu pure nia kam aiso, nu taiti girakala la nungam se aniso wore te aolak iluso.

³⁴Nina Kaem ko sokel aora biya owore ko balu paogalko; nu Israel ko king nikim garagar, se ko sokel biya mu ana taiti gomang te arigisan.