SALMOS 68:3-34

³Pero nochi masehualme cati itztoque xitahuaque ma paquica iixpa Toteco Dios huan ma huitonica ica paquilisti.

⁴Xijhuicatica Toteco huan xijpaquilismacaca. Xijhueyitalica yaya cati nejnemi iixco mixti, yaya cati itoca TOTECO. Xipaquica miyac iixpa ya.

⁵Toteco Dios yaya inintata cati icnotzitzi. Yaya quinchihuilía cati xitahuac nopa sihuame icnotzitzi, pampa yaya tatzejtzeloltic.

⁶Toteco Dios quinmaca se familia cati itztoque iniselti. Huan quinchololtía cati quintzactoque. Pero cati motepanitaj quintitanilía mayanti huan taijyohuilisti.

⁷NoTeco Dios, quema tiquinyacantiyajqui momasehualhua ten tali Egipto huan tiquinhuicac ipan nopa huactoc tali,

⁸nopa tali mohuiso huan huetzqui at ten ilhuicacti moixpa. Nopa tepet Sinaí mohuiso moixpa ta cati titoTeco tiisraelitame.

⁹Toteco Dios, ta tijchijqui ma huetzi miyac at ipan ni tali cati tiquinmacac momasehualhua. Quena, ica nopa at tiquinfuerzajmacac cati moaxcahua quema tahuel siyajtoyaj.

¹⁰Yeca momasehualhua mocajque nica ipan ni tali. Huan ta ica motaicnelijcayo tiquinmacac nopa teicneltzitzi nochi cati monequiyaya para ica mopanoltise.

¹¹Toteco quiijto para ya tatantoya, huan miyac masehualme tzajtzique chicahuac para tepohuilise ten panotoc. Quiijtojque:

¹²“Cholojtejque nopa soldados cati hualajtoyaj para techtzontamiltise.” Quena, ama nopa israelita sihuame momajmacaj nochi tamanti cati quicajtejque nopa soldados.

¹³Xiquitaca, masque quinmocuitahuiyayaj borregojme, ama nopa sihuame hasta petanij ica oro huan plata. Nochi inintacayo quitamitzactoque ica tamantzitzi cati cuajcualtzitzi quej se paloma quitamitzacua itacayo ica ieltapal.

¹⁴Toteco Dios Cati Quipiya Nochi Chicahualisti quinsemanqui icualancaitacahua quej nopa tasesecayot cati huetzi ipan tepet Salmón.

¹⁵Nochi nopa tepeme cati huejcapantique cati mopantíaj ipan tali Basán iaxcahua Toteco huan nelía cuajcualtzi inintzonatipa,

¹⁶pero ma amo mochicoitaca ica nopa Tepet Sion cati TOTECO quitapejpenijtoc para ipan itztos para nochipa.

¹⁷Toteco Dios quisqui ipan tepet Sinaí ica millones icuacarrojhua huan iilhuica ejcahua. Yaya yajqui ipan itiopa cati tatzejtzeloltic ipan tepet Sion.

¹⁸Quema Toteco tejcoc ilhuicac campa más huejcapa, quichihuayaya quej se tatanquet cati mocuepa ipan se tatehuilisti, huan quinhuicac ilpitoque nopa masehualme cati quintantoya para iaxcahua. Huan nopa tonali Toteco quiseli nemacti ten nochi masehualme, hasta nojquiya ten masehualme cati amo quinequiyayaj quitepanitase. Huan ama TOTECO temachti itztos ica tojuanti.

¹⁹Ma tijpaquilismacaca Toteco, pampa yaya mojmosta techmaca itatiochihualis. Yaya Toteco cati techpalehuía huan techmaquixtía.

²⁰Toteco Dios, yaya cati techchololtía inimaco tocualancaitacahua. Huan yaya Toteco cati techmanahuía para amo timiquise.

²¹Temachti Toteco quintzontamiltis nochi icualancaitacahua, pampa inijuanti tahuel yoltetique huan amo quinequij quicahuase inintajtacolhua.

²²Toteco quinilhuijtoc imasehualhua: “Na niquinhualicas nochi amocualancaitacahua. Niquincuiti masque motatijtose ipan nopa huejcapantic tepet cati itoca Basán, o masque motatijtose hasta tatzinta ten nopa hueyi at.

²³Niquinhualicas pampa monequi nochi anquintzontamiltise. Inieso quixolonise amoicxihua huan amochichihua quipipitzose.”

²⁴NoTeco Dios, tinotanahuatijca, niquinita miyac masehualme mitztoquilíaj para yase ipan motiopa.

²⁵Inijuanti cati huicaj tayacantiyahuij. Tatajco yahuij nopa ichpocame cati quitzilinijtiyahuij panderos. Tatepotzco yahuij cati tatzotzonaj.

²⁶Huan quej ni huicaj: “Nochi anisraelitame, xijhueyimatica Toteco Dios. Xijpaquilismacaca Toteco cati techmacatoc nemilisti nochi tojuanti.”

²⁷Tayacantiyahuij iixhuihua Benjamín. Huan tatepotzco hualahuij nopa tayacanani huan huehue tacame ten iixhuihua Judá, huan nopa tayacanani cati iixhuihua Zabulón huan Neftalí.

²⁸Toteco Dios, ica mohueyi chicahualis xijchihua nochi cati techilhuijtoc. Quena, xijnexti mohueyi chicahualis para sequinoc ma quiitaca nopa huejhueyi tamanti cati ta techchihuilijtoc.

²⁹Nopa tanahuatiani ten nochi talme quihualicaj iniofrendas ipan motiopa cati eltoc ipan altepet Jerusalén.

³⁰Toteco Dios, xiquinajhua tocualancaitacahua. Xiquinechcapantali nopa tacame cati mosisiníaj quej torojme, huan xiquinchihua ma motemactilica ica ta. Ma mitzhualiquilica inintepos plata quej se nemacti. Xiquinsemana nopa mosisinijca masehualme cati tahuel quinpactía tatehuise.

³¹Nopa Egipto ehuani quinhualicase inintelpocahua huan nochi tamanti ininteposhua cati cuajcualtzitzi huan pajpatiyo. Huan nopa Etiopía ehuani momatananase moixpa para mitzhueyichihuase.

³²Nochi antanahuatiani ipan nochi ni taltipacti, xijhuicatica Toteco Dios. Xihuicaca huan xijpaquilismacaca Toteco.

³³Yaya cati nentinemi ipan nopa ilhuicacti cati hasta huejcajquiya eltoc. Xijcaquica itoscac cati chicahuac caquisti quej quema tatomoni.

³⁴Xiquinpohuilica nochi masehualme quenicatza hueyi ichicahualis Toteco Dios. Huan itatanex ajsi ipan nochi israelitame. Quena, nelía tahuel hueyi ichicahualis nepa ilhuicac.