Kölfel 68:3-34

³Nge ekewe chon pwüng repwe uren pwapwa, repwe mwänek me fän mesen Kot, repwe mweireir fän pwapwa.

⁴Oupwe köl ngeni Kot, oupwe kölün mwareiti itan. Oupwe chietä echö köl ngeni ewe mi wawa ekewe kuchu, itan ewe Samol mi Lapalap. Oupwe mwänek me fän mesan.

⁵Kot ewe mi nom lon imwan mi pin, i semen ekewe mi mäsen me chon tümwünün ekewe fefin mi mä pwülüer.

⁶Kot a ngeni ekewe mi akaleman ar famili, a emwenawu ekewe chon fötek pwe repwe ngasala fän pwapwa, nge ekewe chon ü ngeni Kot repwe nom lon eu fanü mi pwasapwas o pwichikar.

⁷Ai Kot, lupwen ka akom mwen noum aramas, lupwen ka pwerela lon ewe fanüapö,

⁸fanüfan a chechech, ekewe läng ra apüngätiu üt me fän mesen Kot. Ewe chuk Sinai a chechech me fän mesen Kot, ewe Koten Israel.

⁹Ai Kot, ka apüngätiu ütomong ekis meinisin. Ka amürinala fanüom, lupwen a pwasala.

¹⁰Noum kewe aramas ra küna lenier me lon. Lon om kirikiröch, ai Kot, ka tümwünü ekewe chon wöüngau.

¹¹Ewe Samol a atowu ewe kapas. A fokun lapalap ewe mwichen fefin mi arongafeili ewe pworausen win,

¹²“Ekewe king me nöür kewe mwichen sounfiu ra süla.” Ekewe fefin mi nom leimw ra inetifengeni mine ekewe sounfiu ra liapeni lon maun.

¹³Uluulun lisom, pöükässir ra pwölüpwöl ngeni silifer, nge ülöüler ra molupolup ren kolt mi mürina. Pwota ekoch me leimi ra chök nonom lefilen ekewe lenien sip?

¹⁴Lupwen Ewe mi Unusen Manaman a atoropasafeili ekewe king won ewe fanü, snow a püngütiu won ewe chuk Salmon.

¹⁵Ewe chuk Pasan eu chuk mi tekia. Eu chuk mi wor chomong chukun.

¹⁶En chuk mi chukuchukutä, pwota ka nennetiu fän lolowo won ewe chuk Kot a filätä pwe epwe nonom won. Ewer, iei ewe leni ewe Samol mi Lapalap epwe nonom ie tori feilfeilachök.

¹⁷Ewe Samol a feito seni ewe chuk Sinai ngeni ewe leni mi pin fiti ngeröün wan woken mi pöchökül.

¹⁸A feitä won ewe chuk mi tekia o emwenätä chon oola lon an mwich mi tapwela mürin, a pwal angei lifang seni aramas, fokun seni chokewe mi ü ngeni, Kot ewe Samol mi Lapalap epwe nonom ikenan.

¹⁹Sipwe mwareiti ewe Samol mi mwärei ach wosochou iteiten rän. Kot ach Chon Amanau.

²⁰Ach Kot eman Kot mi amanauakich, Kot ewe Samol a angasakich seni mäla.

²¹Nge Kot epwe amökkü möküren chon oputan, epwe amökkü mongosaponen ätewe mi chök föföri tipis.

²²Iwe, ewe Samol a apasa, “Üpwe aliwinato chon oputom seni Pasan. Üpwe aliwinireto seni epin matau,

²³pwe pecheöm epwe fetal lon char, nge noum kewe kolak repwe asomwa inetir seniir.”

²⁴Ai Kot, aramas ra küna om fetal fän win, ra küna än ai Kot me ai king fetalelong lon imwan mi pin.

²⁵Ekewe chon köl ra akom, ekewe chon ettik pisekin ettik ra nom mürin, nge ekewe föpwül mi ettik pisekin kaktai ra nom lukalaper,

²⁶“Oupwe mwareiti Kot lon ewe mwich mi lap. Oupwe mwareiti ewe Samol mi Lapalap, ämi mwirimwirin Jakop.”

²⁷Peniamin ewe ainang mi kükün me leir a akom mwer, ekewe samolun Juta lon mwicheicher ra tapw müriir, nge ekewe samolun Sepulon me Naftali ra kükümwir.

²⁸Ai Kot, kopwe aworato om manaman. Ai Kot, kopwe pwärawu ngenikem om pöchökül usun ka fen föri me mwan.

²⁹Pokiten om we imwenfel lon Jerusalem ekewe king repwe uwato lifang ngonuk.

³⁰Kopwe apwüngü Isip, ewe manmwacho mi nom lein ekewe wowo. Kopwe apwüngü ekewe mwü, ewe pwiin ätemwänin kow me nöür kewe nienifön kow, tori repwe chapetiu me mwom o fang ngonuk ar silifer. Kopwe atoropasafeili chon ekewe mwü mi pwapwaiti maun.

³¹Chon künö repwe feito seni Isip. Chon Itiopia repwe aitietä pöür lon ar iotek ngeni Kot.

³²Oupwe köl ngeni Kot, ämi chon ekewe mwü won fanüfan, oupwe kölün mwareiti ewe Samol,

³³ewe mi saifeil lon ekewe läng, ekewe längin lomlom. I ewe mi fos fän mwelian mi leüömong.

³⁴Oupwe asilefeili än Kot manaman, lingan a nom won Israel, nge an manaman a nom lon ekewe läng.