Psalms 35:5-27

⁵Nuna tam gawa marir itugukoyam iwita nunga itugum se nika engel nunga diruwurok nongorak namarukko.

⁶Nu nunga diruwurok se lage tiromorom se palepalengam mu te maga namamonko.

⁷Nuna ani ago ko dagarok kira beteman mu kumik duap bo mena, ale ani ago ko mutim bo ilu beteman mu kumik duap bo mena tala.

⁸Bare memek umu giris palaguk ale nongota nunga maguwurok se tengemonko; se dagarok beteman mu giris palaguk nongota nunga taliparukko, nongota mutim ilu beteman mu ningi dagulomon ale memek tamonko.

⁹Se ani mu Yawe ko amilmilarik ale aga sangaru tam mu ko nup patawurikko.

¹⁰Se aninga adera angimik lilim la te balik, “O Yawe, awiri nika turan a?” maikko. “Ni mu kituwura guat alo nunga bita maguwusan mu nunga sangaru tasam, ale kari memek nuguting te kariimet nosokel mena alo mu nunga bataguru tasam.”

¹¹Kari memek alo barasasan ale den kawel atumu aisisan; nuna ani mel me ko ikia wore ko aga isarsan.

¹²Nuna aninga kiwem ningo mu ko koma kiwem memek agate betesan, se ani angamang motam dagulam.

¹³Bare tom nuna kuera ikes tokasan mu ani nuna nogo ko inang bitakasam ale Kaem kote wosenga kira lagakasam; ale wosenga koma me tokasam mu

¹⁴ani mo nia lagakasam, bola aninga tiran agi aga launuria bo ko iwita. Ani angamang bataga te magi lagakasam, bola aninga ayam kuakoyam mo lagakasam.

¹⁵Bare tom ani ikup te dagulem mu nuna ilu biguwuman ale amilmilakasan; kariimet saki aga bita maguwumonko ilu biguwukasan bare ani me ko ikikasam; nuna ago ko bala memek wore me ta bita tokasan.

¹⁶Ani dagulukasam mu nuna gira awom la aga balu maguwukasan; nuna ani ago ko nongomang magakaso se nogore usikasan.

¹⁷O Kari Biya, awuk am suwutata nungarki se lagerko e? Nuna lion iwita daong ko geragasan; buta se ni aninga tagi bataguru to se nuna me aga maguwumonko.

¹⁸Buta bitar mu ani kariimet nunga biguwura motam biya ningi den ningo amilmil balu kisekko; ale kariimet biya ningi nika nip patawurikko.

¹⁹Kager kari memek alo me aga kuawara mu nungarkiwer se aga kiamon amilmilamon ale nomotam kui me parang parang mamonko, mu awuk, kumik duap bo mena.

²⁰Nuna den bo nongomang lila te me ta balsan, bare nuna kariimet yawarakala dagiman ale kutek maman bagasan mu den kawel atumu nungarsan.

²¹Nuna den atumu ani aisisan ale balsan, “Aha! Aha! Karkaman bo! Ana namotam kuagi te kiwem memek bitawerem se karkaman!” masan.

²²O Yawe, kiwem imi ni ari saperem; buta se kiring me kaloko. O aga Biya, aga bitar ale awar biya me bagerko.

²³O Kaem, aga Biya, bares ale tair aga sangaruko! Ni ani ago ko sanamirko.

²⁴O Yawe, aninga Kaem, nika munan ningo diram la mu te, ani angimik te memek bo mena mu aga wetang saparko; ni nungarkiwer se me ta aga bita maguwumonko.

²⁵Ni me nungarki sager se balmon, “Ese, terong, ana mel nangamang te aniram mu kumik te aratam!” mamon, ale balmon, “Ana nu menawura biya menawuman!” ma balmonko.

²⁶Arikaya ani ikup ningi kaperem se amilmilakasan mu, dolara nungaru ale nunga ikia ngualawurko; arikaya ani memek kituwura ko aga balsan ale nuna ningo yawara ko nunumi betesan mu, dolara nungaru ale nunup karogo kaparko.

²⁷Ni ani angimik memek bo mena mu wetang aga sapar se, kariimet aga kuawara mu ngata betemon ale amilmilamonko. Nuna pempem balmon, “Yawe nup biya tunakko! Nu noko ura kari bituok se ningo la bagarukko kueso,” mamonko.