SALMOS 35:5-27

⁵Ben ga gákgake' ka to laga' biž da' žwa' be', na' bseḻa' wbás la'y chio' nich wlage' ḻégake'.

⁶Ben choḻ x̱nézgake' nich kwílgake', na' bseḻa' wbás la'y chion' nich kwia ḻaže'e ḻégake'.

⁷Bkáche'gake' to do yeḻj nich senen neda', na' bi be bena' chégake'. Bché'ngake' to yežw gan chejbix̱a' neda', na' bi be da' ẕia nbaga'a.

⁸Bseḻa' da' wžía yin' ḻégake', da' bi gákbe'egeklen'. Ben ga sen do yeḻj chégaken' ḻa' légakkze', na' ga chejchégwgake' gan kwia yí'gake'.

⁹Naž yebéḻe'ekzla' ni'a che da' ben X̱anžo Dios. Gak yeḻa' ba nez ẕen chia' dan' beslé' neda'.

¹⁰Yógo'te žit yoa'a nnágaken: “X̱anto' Dios, ¿noẕkze benne' nake' ẕen ka nako' Le'? Žesló' benne' yache' ḻo na' benne' nakže' waḻe ka ḻe', na' benne' žiážjele' ḻo na' benne' ẕbane' da' do' da' den chie'.”

¹¹Bḻa'gak benne' ka' žechébegake' da' wen ḻaže'. Wnnábgekle' neda' ka nak che to da' bi nnezla'.

¹²Bebí'igake' chia' da' ẕinnj ni'a che to da' chawe' da' bena' neda', nich wsáka'gake' neda',

¹³san neda', kate' bi wnníta'gake' chawe', gok nyache' ḻaža'a, na' bena' wbás, na' bsaka' kwina'. Dot ḻaža'a bḻiža' Le', Dios, nich yeyono' ḻégake'.

¹⁴Gok nyache' ḻaža'a ni'a chegak benne' ka' kan žona' ni'a che bi' lježa', o ni'a che bi' bíche'kza'. Gok nyache' ḻaža'a ka žon no benne' ni'a che x̱ne'e kate' ne žate',

¹⁵san bebégekle benne' ka' kate' wzóa da' bsakan' neda', na' bedjwíagake' neda'. Bdíḻ-ḻengak benne' wen da' ẕinnj ka' neda', na' choḻze bzétjgake' neda'. Bwíatezegake' neda', na' bi bsángake' da' žóngake'.

¹⁶Bsáka'gake' neda', na' ben dítjgekle' neda', na' wžía ḻáže'gake' neda' ḻo yeḻa' ẕža'a chégake'.

¹⁷X̱ana' Dios, ¿to chi'ize wíazo' da' žóngake'? Beslá neda' ḻo na'gak benne' ka' ẕžia yí'gake' neda', benne' ka' zej nake' ka bež yix̱e' ka'.

¹⁸Yapa' Le' “Žóx̱keno'” gan zej ndobe benne' chio' ka'. Wká'n ẕénteza' Le' ladjw benne' zan ka'.

¹⁹Bi go'o latje yebégekle benne' ka' bi ẕḻé'egekle' neda' chawe', na' bi be bena' chégake'. Bi go'o latje benne' ka' gon dítjgekle neda', benne' ka' ẕžá'agake' neda', na' bi be ẕia nbaga'a.

²⁰Benne' ki bi žénegekle' sóagake' ḻo yeḻa' ẕga'n chawe', na' ḻo yeḻa' wen ḻaže' chégake' ẕnnégake' chegak benne' ka' ẕbézgake' ži ḻaže' ḻo yežlyó nga.

²¹Ben dítjgekle' neda', na' wnnágake': “Ba bḻe'elto' da' bene'.”

²²X̱ana' Dios, bḻe'ekzlo' da' žóngake'. Bi so' žize. X̱ana' Dios, bi kwej yichjo' neda'.

²³Wzó ža'. Wzóa wchi'a ḻažo'o neda'. Da, X̱ana' Dios, nich gákḻeno' neda'.

²⁴Bchi'a ḻaže' neda' ḻo da' chawe' chio', X̱ana' Dios. Bi go'o benne' ka' latje wẕížegake' chia'.

²⁵Bi go'o latje nnágake': “Ba gok da' wzé ḻáže'žo”, na' bi nnágake': “Ba bzéx̱jwžo ḻe'.”

²⁶Ben ga yedoé'egekle, na' chíx̱gekle yógo'te benne' ka' žebégekle' kate' bi žak chia'. Ben ga yedoé'egekle, na' ga'ngak ka'ze benne' ka' ẕdíḻ-ḻengake' neda'.

²⁷Ben ga goḻgak, na' yebégekle benne' ka' ẕḻé'egekle' neda' chawe', nich nnágakkze': “¡Ga'n ẕen X̱anžon'!” Bennen' žak ḻaže'e ga'n chawe' benne' wen žin chie'.