Pakanemo 2

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Niga mainana Maimaituwa galewa, dobu bi mwali matabudi i voiyedi.

²Tana kaikana ena noya i wai kovi bi laḡan wai 7-nemo ḡome tana i waiyawasi.

³Bi Maimaituwa laḡan wai 7-na, i kavisuvisu te laḡan laukaina bi i voiye te waiyawa bi ani vivila, banina tana mwali matabudi i wai kovidi bi mba laḡannemo i waiyawasi.

⁷Bi Bada Maimaituwa doḡa i vai bi oloto i voiye. Maimaituwa yawasina yawayawasanina i suve nawe oloto isuna bwadanemo bi oloto i moito i miya.

⁸Bi Bada Maimaituwa beubeu yawaninemo daibi i wadiwadina dobu Idenmo, ḡome oloto i voivoiyena i sako.

⁹Bada Maimaituwa doḡamo kai visuvisudi tabudi bi tabudi i voiyedi te a duga bi banidi kitedi wainuwavaivaidi ani kani. Bi daibi modonemo kai labu: Yawasana kaina bi kota visu bi gebo sibena kaina.

¹⁵Bada Maimaituwa oloto i vai bi daibimo i sako te ya labe bi ya noyae.

¹⁶Bi Bada Maimaituwa oloto i giuwena gado, “Kai votevotedi ḡesaudi kwa kanidi.

¹⁷Visu bi gebo sibena kaina daibi modonemo, mote kuma kani bi kuna kanina ba kwa peki.”

¹⁸Bi Bada Maimaituwa i giuna gado, “Oloto mote i visu te taunaḡa ya miya. Tagu ena tausagu, yà voiye te ya sagu.”

¹⁹Bi Bada Maimaituwa, ḡamoḡamo dobumo bi mwanuwa sawasawamo matabudi i voivoiyedina i natomedi oloto lisinemo te oloto yai isedi. Tana ḡamoḡamo bainewa i wai isana ba taunana isana.

²⁰Bi oloto mwali yawayawasanidi i wai isedi, mwanuwa sawasawamo bi ḡamoḡamo dobumo. Bi Adam mote bamo ena tausagu kauwa.

²¹Kamaina bi Bada Maimaituwa, oloto i voiye te i kena i wai nuwayavuḡa. Bi Bada oloto giligilina gemota i kaikamaḡe bi tubuḡina i gudu munaḡe.

²²Bi Bada Maimaituwa, oloto giligilinemo waivini i voiye bi i natome oloto lisinemo.

²³Bi oloto i giuna gado, “Eee! Niga waivinina siliena ba tagu siliegu, bi tubuḡina ba tagu tubuḡigu. Tana yài isana waivini banina tana olotomo a voiye. Tana oloto giligilinemo Maimaituwa i voiye.”

²⁴Taunana aubaina oloto tamana bi tinana ya gosedi bi mwanena vaitena sa miya ḡemota, te tedi tubuḡa ḡemota ya tubuḡa.

²⁵Ḡome oloto mwanena vaitena ma kofekofedi bi mote ai tunimayaḡa.