1Kamaina bi kwalabu labu mulidimo, ḡalibona i lauboni te tana gauba Naelo diyanemo i moimoito.
2Bi i wai kita te kau 7 pwatepwatedi gauba noponemo a lovotava te ḡawaḡawa kanidi ai tubu.
3Kota mulidimo kau 7 ligeligedi Naelo gaubina noponemo a lovotava bi edi lava diyedimo a moito.
4Kamaina bi kau ligeligedi a tapipila te kau pwatepwatedi a kani kovidi. Ḡome te i kena nuwasa.
5Ḡalibona matana i yaune bi i kena munaḡa te lauboni ḡesau i kita. Peḡapeḡa kaina ḡemota bi modonemo banina 7 visuvisudi i kitedi.
6Mulinemo kota peḡapeḡa kaina ḡemota bi banina 7 i sivudi. Niga peḡepeḡedi kaidi yavala i suve waiwelaidi.
7Peḡapeḡa welawelaidi a tapipila te peḡapeḡa visuvisudi 7 a gudedi. Kamaina bi ḡalibona i kenamoito bi i giuna gado, “Pai, niga gode e laulauboni.”
8Olaolalemo ḡalibona nuwana i lovo lauboni i kitakitana aubaina. Taunana aubaina Idip noponemo taubwalabwalau kaikalakalatidi bi sibe lavedi i giuwedi a tava. Ḡome tana ena lauboni i giuwedi bi mote aiyai ena lauboni banidi i giuwaimaḡatidi.
9Kamaina bi waen tautegolubuna ḡalibona i giuwena gado, “Aee, bada bai nuwagu i kaukauleyana e noḡoti, niganana matammo yà giu kamaḡe.
10Tam wala buledi taugabu kauwena bi tagu, lisimaimo kuna medi bi kuna sivunawemai biliwelokomo tauyava edi bada ena vanuwemo.
11Bi dudubala ḡemota labuimai ke lauboni bi ema lauboni ba banidi tabudi bi tabudi.
12Bi ḡome Ḡibulu olotona vaitemai. Tana tauyava edi bada ena taupaula. Tama ema lauboni ke giuwedi bi lauboni banidi i giuwaimaḡatidi.
13Bi bai i giugiuwena mainana a tubuḡa. Tagu egu noyamo kuna sako munaḡegu bi buledi taugabu kauwena gadona kuna bwali.”
14Kamaina bi Diyousep ena giu i giukamaḡe te ma ḡemota biliwelokomo ai doli tavaite. Tana i wai ḡali bi ena gala visuvisuna i kote bi i tava ḡalibona lisinemo.
15Ḡome ḡalibona i giuwena gado, “Tagu e lauboni bi egu lauboni banina mote aiyai i giuwaimaḡati. Bi gium e vaiye te tam ḡemoḡemotina lauboni banidi kwa giuwaimaḡatidi.”
16Diyousep i giuna gado, “Mm bada, tagu mote ḡemoḡemotigu bi Maimaituwa ba ḡemoḡemotina bai kwa ḡoeḡoena ba ya giuwem.”
25Ḡome ḡalibona ena lauboni Diyousep i giuwe. Kamaina bi Diyousep ḡalibona i giuwena gado, “Ḡalibona, mba laubonidi labu kuna kitedina ba banidi ḡemota. Maimaituwa bai muliḡa ya voiyena taunana lisimmo i waimaḡati.
26Kau pwatepwatedi 7 kuna kitedina ba kwalabu 7 bi peḡapeḡa banidi visuvisudi 7 kuna kitedina ba kwalabu 7. Niga laubonidi labu banidi ba maula kuna kita.
27Bi kau ligeligedi muliḡa gaubemo a lovolovotavana bi peḡapeḡa yavala i suvesuve wai welaidina ba muliḡa gomala kwalabu 7 nopodimo.
28Niganana bai ḡalibona yà giuwemna ba muliḡa bai ya tubuḡana Maimaituwa taunana i wai lovem.
29Bi kwalabu 7 nopodimo ba Idip dobuna matabuna ya maula.
30Bi mulinemo kota kwalabu 7 nopodimo gomala dididiga ya tubuḡa. Mba saugidimo maula noḡotidi sa laukava banina gomala Idip dobuna ya ka lolalola.
31Bi maula noḡotidi sa kovi banina gomala i didiga gulata.
32Ḡalibona lauboni ma labu kuna kitana banina Maimaituwa bai i waimaḡatina ba kamaina ya tubuḡa.
33“Niganana ḡalibona nuwauyauya bi kauwa taukitabanavidi lavana kwa vine te Idip dobuna yai badaye.
34Bi tam kota waibabada ḡesaudi kwa vinedi te tedi kwalabu 7 nopodimo kani sai damdi te dubu 5 bi dubu wai 5-na ba kalaḡi sa sako bi sa labe kauwe.
35Tedi maso ḡailisi kuna vitedi te maula laḡandimo kani sai dam gulate bi sa labe kauwedi te gomala ya natonatona aubaina.
36Nigamai kaka kani kaikai gulate ya kena te gomala ya natonatona ani waisanana.”
37Diyousep ena giu ḡalibona ena taupaula vaitedi a vaiye te i visu.
38Taunana aubaina ḡalibona i giuwedina gado, “Bamo bena aiyai ta banavi mai niga olotona. Tana Maimaituwa Aluwina noponemo.”
39Kamaina bi ḡalibona Diyousep i giuwena gado, “Maimaituwa bai matabuna tam lisimmo i kamaḡatidi bi bamo mote aiyai nuwauyauyana bi kauwa taukitabanavidi mai tam.
40Taunana aubaina niganana Idip dobuna bi egu lava matabudi tam kwai badayedi. Bi em waibada ba tagu gabuligumo.”
41Kamaina bi ḡalibona Diyousep i giuwena gado, “Tagu niganana tam waibadamo yà sakosakom te Idip dobuna matabuna kwa labe.”
42Ḡome ḡalibona waibada matailina kalima nimagalanemo i kaikamaḡe te Diyousep nimagalanemo i sako. Bi gala waimatakanikanina i wai kote bi dona i wai gadoi.
45Ḡalibona Diyousep i wai isana, Safanet-Peniya. Ḡome ḡalibona Fotifela natuna waivinina isana Asanet i vai te Diyousep i wainaḡi. Fotifela ba dobu isana On pilisina. Kamaina bi Diyousep i modina bi Idip dobuna matabuna i nawa yaḡosi.
46Diyousep ena kwalabu 30 bi ḡalibona aubaina noya i waitubu. Tana ḡalibona i gose bi i nawa Idip dobuna matabuna i vakita nawe.
47Kwalabu 7 nopodimo mba dobunemo maula i dabalala.
48Mba kwalabudimo malagai matabudi nopodimo Diyousep kani i laitupa bi kani vanuwidimo i susuḡudi.
49Tana kani i susuḡuna i didiga gulata te maibena nisa diyanemo gimoli bi mote ḡemoḡemotina te maso i iyevi nawe. Taunana aubaina iyava i kaisako.
53Kwalabu 7 nopodimo Idipmo maula i nuwayebusi.
54Bi kota kwalabu 7 nopodimo gomala i wai tubu, Diyousep i giugiuwena mainana. Bi dobu matabuna gomala i nawa yaḡosi. Bi Idip taunaḡa ba maula i kenakena.
55Laḡannemo Idip lavedi kani a pekipeki ba a nawa ḡalibona lisinemo kani a waibaḡaye. Bi tana i giuwedina gado, “Ko nawa Diyousep lisinemo bi bai ya giugiuwemina mainana ko voiye.”
56Gomala dobu matabuna i nawa yaḡosi bi i ka gebogebo. Taunana aubaina Diyousep kani vanuwina i kaikamaḡe bi wai kunekune i wai tubu Idip lavedi lisidimo.
57Bi dobu ḡesaudi lavedi a tava Diyousep lisinemo bi kani a kunekunedi. Banina dobu matabuna gomala i ka gebogebo.
