Pakanemo 40

1

2

3

4

6

7

8

9

11

12

13

14

15

16

17

18

19

21

22

25

26

28

35

37

39

40

41

42

45

46

48

49

50

¹Kamaina bi niga kauwidi mulidimo, Idip ḡalibonana ena waen tautegolubuna bi ena buledi taugabuna tedi ḡalibona nuwana a ka gebo.

²Taunana aubaina ḡalibona nuwana i medi ena taupaula labu lisidimo

³bi tedi i panidi bi tauyava edi bada nimanemo i sivudi bi tauyava i legaudi te Diyousep bamo biliwelokonemo i miyamiyana ḡome i sivu nawedi.

⁴Bi biliweloko tauyavena edi bada Diyousep noya i vite te mba lavedi ya labedi. Tedi biliwelokomo a miya gulata.

⁵Bi dudubala ḡemota, ḡalibona ena waen tautegolubuna bi ena buledi taugabuna a lauboni ḡemota. Bi edi lauboni banidi ba tabudi bi tabudi.

⁶Laḡan i sako olaolalemo Diyousep i tava lisidimo bi i kitedi te tedi manuwaboyedi a miyamiya.

⁷Kamaina bi Diyousep i waitalayedina gado, “Bai aubaina niganana matemi a kuluva?”

⁸Bi tedi ena giu ai munena gado, “Tama ke lauboni bi aiyai ema lauboni banidi yaka maḡatidi?” Bi Diyousep i giuna gado, “Maimaituwa lisinemo ba ḡemoḡemotina te mba laubonidi banidi ya giuwaimaḡatidi. Emi lauboni ko giuwegu.”

⁹Kamaina bi waen tautegolubuna ena lauboni i gei giuwe Diyousep lisinemo, “Tagu egu laubonimo ba waen kaina e kita.

¹⁰Bi kaina lagalagana ba faiona, laḡannemo a nimanimagala ba, a buso bi a latapaledi. Bi kota waenidi ai laka te matabudi a ḡou kovi.

¹¹Bi tagu ḡalibona ena ledu nimagumo bi guleipi banidi e legaudi bi ena ledumo e buyodi bi nimanemo e sako.”

¹²Kamaina bi Diyousep tana i giuwena gado, “Em laubonina banina ba niga mainana: Kai lagalagana faiona kuna kitedina ba laḡan faiona.

¹³Laḡan faiona nopodimo, tam kaka ḡalibona biliwelokomo ya kaikamaḡem bi em noyamo ya sako munaḡem bi ena ledu nimanemo kwa sako munaḡe, maibena dolinemo kuna voivoiyena mainana.

¹⁴Laḡannemo bai matabuna lisimmo sa visuna, kwa noḡotigu bi kwa lau kivivisuvisuḡegu. Bi ḡalibona lisinemo isagu kwa vato bi kwa giuwe te tagu biliwelokomo ya kaikamaḡegu.

¹⁵Banina Ḡibulu lavedi edi dobumo tagu e miyamiya bi lava tagu egalemo a pani tavaitegu niga ḡome. Bi tagu mote bai gebona yà voiye bi biliwelokomo a sakogu.”

¹⁶Laḡannemo taulaugabu i vaiye te Diyousep waen tautegolubuna ena lauboni banina i kamaḡati bi i vaiye te i visu kauwa ba tana Diyousep i giuwena gado, “Tagu kota e lauboni, te dabagumo ba buledi poedi faiona e ava'avala.

¹⁷Bi po'a dabanemo noponemo kani gabugabudi, tabudi bi tabudi a kenakena ḡalibona aubaina. Bi mwanuwa a tava bi po'ana noponemo kani a kanikanidi.”

¹⁸Bi Diyousep i giuwena gado, “Po'a faiona kuna kitedina banina ba laḡan faiona.

¹⁹Laḡan faiona nopodimo ḡalibona kaka tam ya kaikamaḡem bi gadom ya koiḡavuki bi tubuḡim kai laganemo yai dawe bi mwanuwa sa kani.”

²⁰Kamaina bi laḡan waifaioninemo, ḡalibona ena tubuḡa laḡanna i tava bi tana soi i voiye ena tauwaibabada aubaidi. Mba laḡannemo waen tautegolubuna bi buledi taugabuna biliwelokomo i kaikamaḡedi bi i nawedi ena tauwaibabada matedimo.

²¹Bi ḡome ḡalibona waena tautegolubuna ena noya wadubonemo i sako munaḡe. Bi ena noya i waitubu munaḡe.

²²Bi buledi taugabuna tana i wai peki, maibena Diyousep lauboni i giugiuwena.

²³Bi mba laḡannemo waen tautegolubuna Diyousep ena waibaḡa nuwana i yavuḡa bi mote i noḡoti lubu.