1Bada Maimaituwa gunuwala ḡamoḡamodi i voiyedi bi mododimo mwata ba ḡamoḡamo wai kaikaiyovuna. Mwata waivini i waitalayena gado, “Giukauwa te Maimaituwa i giuwemi te kai matabudi daibi modonemo mote koma kanidi?”
2Bi waivini mwata ena giu i waimunena gado, “Kai ḡesaudi ba ka kanidi.
3Bi kai daibi modonemo, Maimaituwa i giu te mote kama kani bi kama taukoni, male ka peki.”
4Bi mwata waivini i giuwena gado, “Ei geḡa, mote koma peki.
5Maimaituwa i sibe, te sauginemo bi ko kanina ba temi maibena Maimaituwa, visu bi gebo ko sibedi.”
6Sauginemo waivini kai votana i kita te kani visuvisuna bi matanemo i wainuwa vaivai, kota i ḡoe te bai matabuna maso i sibe, taunana aubaina tana kai votana i vai te i kani. Bi kota mwanena diyanemo i vite te i kani.
7Kai votana a kanikani tedi matedi i yana bi a sibe munaḡedi te kofekofedi. Taunana aubaina tedi kailugulugu a siyaudi bi tubuḡidi ai govegovedi.
8Aubigamo oloto ma mwanena Bada Maimaituwa talelena a vaiye daibi noponaḡa i nawanawa. Kamaina bi kai nopodimo a kandavona.
9Bada Maimaituwa oloto i yogena gado, “Adam, tam bamo?”
10Bi oloto Maimaituwa ena giu i waimunena gado, “Tam daibimo talelem e vaiye bi e naila. Banina tagu kofakofagu aubaina te e kandavona.”
11Bi Maimaituwa oloto i giuwena gado, “Aiyai i giuwem te tam kofakofam? Tam kai e waiḡakena votana kuna kani?”
12Bi oloto i giuna gado, “Waivini kuna viteviteguna tana kai votana i vitegu te e kani.”
13Kamaina bi Bada Maimaituwa waivini i waitalayena gado, “Bai aubaina niga mainana kuna voiye?” Bi waivini i giuna gado, “Mwata i kaiyovuḡegu te e kani.”
14Bi Bada Maimaituwa mwata i giuwena gado, “Tam niga mainana kuna voiye aubaina. Ḡamoḡamo matabudi mododimo tam e pasilim. Te bwagammo kwa yoyo nawa, bi ḡobusa kwa kani laḡan matabuna.
15Tagu yà voiyemi te tam mwata bi waivini modomimo wai kamedimedi ya kena laḡan matabuna. Bi kota mwata natunatum bi waivini natunatuna sai ka medimedi. Laḡan muliḡa waivini natuna olotona kaka tam kunum ya vaḡosaḡosa. Bi tam mwata oloto kaḡeiwakiduna kwa kalati.”
16Bi Maimaituwa waivini i giuwena gado, “Tam em wainatuna sauginemo em yavi tagu yà kadidigi bi yavi vaitena kwa lau bewa. Tam kwa ḡoeḡoe te mwanem em waibada dibunemo ya miya. Bi geḡa te oloto ena waibada dibunemo tam kwa miya.”
17Bi Adam i giuwena gado, “Tagu ei ḡakem te kai votana mote maso ku kani bi geḡa te mwanem kalinana kuna vaiye bi kai votana kuna kani. Taunana aubaina doḡa male ya gomala bi tam kwa noya gulata. Bi laḡan matabuna poyapoyam ya tosi kaka kani kwa banavi.
18Doḡamo ḡawaḡawa waigedegedelidi sa duga bi kani sa lauwalowalo, tam male kamya kanigidava.
19Tam kwa noya gulata bi poyapoyam ya tosi kaka doḡamo male mwali matabuna kwa banavi. Tam doḡamo e patim bi kwa noyanoyaena eete kwa munaḡana doḡamo.”
20Adam mwanena i wai isana Iv banina tana lava matabudi dobumo tinedi.
21Bi Bada Maimaituwa ḡamoḡamo kwapidimo gala i voiye, te Adam ma mwanena i wai kotedi.
22Bada Maimaituwa i giuna gado, “Niga lavedi tedi mai tada, tedi visu bi gebo a sibe. Taunana aubaina mote tamai aninedi te yawasana kaina votana sima kani. Bamoda mainana sa voiyena ba sa miya nonoḡana.”
23Kamaina bi Bada Maimaituwa Adam ma mwanena daibimo i kwavivaidi bi Adam i giuwe te doḡa ya noyae, banina tana doḡanemo i voiye.
24Maimaituwa oloto i kwavai mulinemo, tana Iden daibinemo beubeu yawaninemo aneya kelubim i sako. Bi kepata vavavanina kwadikwadiyena i sako te yawasana kaina ya labe.
