1YAWEI, mi prei langa yu. Lisin langa main preya. Kaman kwikbala blanga album mi.
2Jinggabat main preya jis laik im gudsmelwan medisin langa yu. Wen mi lidimap main bingga blanga prei langa yu, jinggabat tharran deya wulijim speshalwan ofring blanga yu.
3YAWEI, holdim main mawus, en nomo larram mi tok nogudwei.
4Nomo larram mi blanga wandi jinggabat blanga dum nogudwan ting. Nomo larram mi weistimbat taim dumbat nogud ting garram ola nogudwan pipul. Nomo larram mi joinin en dagat daga brom detlot nogudbala pipul.
5Wen detlot pipul hu jidan trubalawei langa yu streitinimap mi, en panishim mi garram det raitwei blanga yu, ai garra larram olabat. Mi oldei prei blanga stapam ola nogudwan ting weya ola nogudbala pipul oldei dumbat.
6Wen YAWEI garra tjakamdan ola big bosmob brom det haiwan rok, ola nogudbala pipul garra sabi tharran main wed bin trubalawan orait.
7Blanga olabat boun garra leidan ebriweya langa greibyad, jis laik ola ston weya sambodi bin smeshimap.
Ola Saam 141
Ola Saam 141:1-7