1Ieriko ai, Ioridane sinavaina isena ai, Moab taorana ai, Iehova ese Mose ma e hereva henia, eto,
2Israel taudia ba haḡanidia, bae abia tanona lalonai Levi taudia na hanua bae henidia, mai hetabira tanodia ida.
3Hanua be bae noholaidia, bona hetabira tanodia ai edia boromakau bona edia mamoe bona edia ubu-ubu ḡaudia idau-idau bae reḡudia.
4Hari hetabira tanodia Levi taudia ba henidia na hanua maḡuna amo baela, ela bona kiubit daha-ta, hanua kahadia iboudiai.
5Hanua murimurina ai ba hahetohoa, mairiveina kahana ai kiubit daha-rua, diho kahana ai kiubit daha-rua, lahara kahana ai kiubit daha-rua, bona mirigini kahana ai kiubit daha-rua; hanua be bogaraginai. Tano unubadana bae abia, edia ubu-ubu ḡaudia na una tano ai bae reḡudia.
6Levi taudia ba henidia hanuadia tauratoi be roho-mauri hanuadia bae gwaurai, ala-ala tauna naediai baine heau kau, bena baine mauri; bona ma hanua hari-ahui rua danuba henidia.
7Levi taudia ba henidia hanuadia bae hari-ahui taurahani; iboudiai na mai hetabira tanodia.
8Ini hanua na Israel taudia ahudia amo ba henidia: iduhu badadia amo momo bavabi; iduhu maraḡidia amo gadoi mo bavabi. Iduhu ta ta ese ahudia amo Levi taudia ahudia bae henidia.
9Iehova ese Mose ma e hereva henia, eto,
10Israel taudia ba hamaorodia, baoto: Ioridane sinaavaina ba hanaia, Kanaan tanona ai ba kau, negana ai,
11hanua haida bavabidia hidi, emui roho-mauri hanuadia. Bena taunimanima ta baine hapadidia tauna na unu baine heau lao.
12Unu hanua lalodiai mase tauna varavarana ese basine alamui diba; hahepadidi tauna na basie alaia ela bona hebou ese baine hahemaoro henia.
13Levi taudia ba henidia hanuadia tauratoi be emui roho-mauri hanuadia ai ba halaodia:
14hanuatoi Ioridane sinavaina inikahana ai, bona hanua toi Kanaan tanona ai, ba henidia, roho-mauri hanuadia ai baela.
15Unu hanua tauratoiosi na rohomauri hanuadia ai baela, Israel taumui emui, bona idau taudia bogaragimui ai e noho hedoamu taudia edia: taunimanima ta baine hapadidia tauna na unu hanua baine heau lao.
16A tau ta ese bamona na auri amo baine botaia mase, ia na roroma tauna: vada bae alaia mase.
17Eiava nadi imana ai baine abia, bamona baine tutulaia, bena baine mase, ia na roroma tauna: vada bae alaia mase.
18Eiava au ta imana ai baine abia, bamona baine botaia mase, ia na roroma tauna: vada bae alaia mase.
19Mase tauna varavarana ese roroma tauna baine davaria negana ai, ia ese baine alaia mase.
20Bamona na badu ai e gwadaia mase tauna, eiava bamona ialana e bani henia tauna,
21eiava bamona na imana amo e tutua mase mai baduna ida tauna, una tau bae alaia mase. Ia na roroma tauna: mase tauna varavarana ese baine davaria negana ai, ia ese baine alaia mase.
22A tau ta, asi ena badu, ese bamona bema gwadaia, eiava bema hodoa,
23eiava nadi amo bema tutua mase, bena bamona bema mase, a ia be bamona se inai henia bona iala-masena se ura,
24hebou ese una hahepadidi tauna bona mase tauna varavarana baine hahemaoro henidia, ini taravatu heḡereḡeredia.
25Hebou taudia ese hahepadidi tauna na mase tauna varavarana imana amo bae hamauria, ena roho-mauri hanuana, e heau henia hanuana, lalonai bae hakaua vareai. Unuseni ai baine noho, ela bona hahelaḡa tauna badana, dehoro helaḡana amo e horoa tauna, baine mase negana ai.
26A nega ta hahepadidi tauna ese ena roho-mauri hanuana, e heau henia hanuana,baine rakatania,
27bena mase tauna varavarana ese una roho-mauri hanuana murimurinai baine davaria, bena mase tauna varavarana ese hahepadidi tauna baine alaia mase, ia na asi ena kerere una rara dainai.
28Badina be hahepadidi tauna na ena roho-mauri hanuana ai baine noho ela bona hahelaḡa taunabadana baine mase; a hahelaḡa tauna badana baine mase murinai hahepadidi tauna na ena tano korikori baine lou henia diba.
29Uru iboudiai bona emui noho gabudia iboudiai lalodiai ini taravatu bona ini haheḡani ba badinadia.
30Tau ta ese taunimanima ta baine alaia mase, roroma tauna na bae alaia mase, dibadia taudia edia hahebade herevadia daidiai; a tau tamona ena hereva dainai basie alaia mase.
31Roroma tauna ena mauri ibodohilaina monina eiava kohuna na basio abia: vada baine mase.
32Bona roho-mauri hanuana ai vada e heau kau tauna ena mauri ibodohilaina monina eiava kohuna, hahelaḡa tauna badana maurina ai ena tano korikori baine lou henia helaoreana, na basio abia.
33Taunabunai, ba noholaia tanona basio hamiroa; badina be rara ese tano e hamiroamu, bona tano ihaḡoevana na asi dala idauna ta, rara e habubua tauna rarana mo ese baine haḡoevaia diba.
34Umui o noholaiamu tanona basio hamiroa, badina be lau danu na noholaiamu; badina be lau Iehova na Israel taudia bogaragidiai na nohomu.
