NUMERA 18:12-18

¹²“Lau ese inai aniani umui dekenai lau henia: Olive dehoro namo herea, bona uaina matamata namo herea, bona uiti namo herea do idia mailaia, Israela taudia edia uma anina vara guna, bona edia vain huahua vara guna, Lohiabada dekenai idia mailaia gaudia.

¹³Idia be umui emui, bona miro lasi taudia ibounai emui ruma dekenai inai aniani gaudia idia ania diba.

¹⁴“Israela dekenai idia noho gaudia ibounai, lau Lohiabada dekenai idia henia, idia helaga, gaudia ibounai be umui ese do umui ania diba.

¹⁵“Mauri gaudia edia natuna vara guna ibounai, taunimanima edia natudia vara guna, bona ubua gaudia edia natuna vara guna, be lau Lohiabada dekenai do idia henia. Idia ibounai be umui emui. To taunimanima edia vara guna natudia, bona gau mirodia edia vara guna natudia totona, edia davana do idia karaia umui dekenai.

¹⁶“Natuna matamata, hua tamona sibona maragidia, be umui dekena amo do idia hoia lou, edia davana be siliva moni 5, Helaga Gabuna ena sikele hegeregerena.

¹⁷“To boromakau, mamoe bona nanigosi edia vara guna natudia be do umui hoia lou lasi. Idia be lauegu momokani, bona boubou totona do umui aladia mase. Edia rarana be boubou patana ena latanai do umui negea, bona edia digara be do umui gabua ore, bonana namo herea gauna lau dekenai totona.

¹⁸“Unai bouboudia edia vamuna be umui emui. Ma boubou ta, egu vairanai umui davea gauna, iena aena idibana, bona iena kemena, idia danu be umui emui.