NARONA 22:4-15

⁴Ben Mↄabunↄ bè Midiã gbɛ̃nsinↄnɛ: Parii kɛ̀kii é pↄ́ kɛ̀ ligawaziinↄ ble píngi lán zù è sɛ̃̀ ble nà.

⁵Ben Balaki gbɛ̃nↄ zĩ̀ Bɛↄ nɛ́ Balamua ai Peto, Yuflati saɛ à bɛ bùsun. À bèńnɛ aↄ̃ à sísi à mↄ́ aↄ̃ benɛ: Gbɛ̃kenↄ bↄ̀ Igipiti aↄ̃ dàgula aↄ̃ↄ káɛ ma saɛ.

⁶N yã nna! Ǹ mↄ́ ǹ ń kámɛ, zaakɛ aↄ̃ gbãaa dɛmala. Wègↄ̃ dↄ̃ro ke mɛ́ e mà zĩ̀ bleḿma mà pɛ́ḿma bùsu kɛ̀n gwɛɛ. Má dↄ̃ kɛ̀ gbɛ̃ kɛ̀ n sa maaa ònɛ égↄ̃ dɛ aubarikadee ũmɛ. Gbɛ̃ kɛ̀ sↄ̃ n sa zaaa ònɛ, eégↄ̃ dɛ kana pↄ́ ũmɛ.

⁷Mↄabu kↄ̃n Midiã gbɛ̃nsinↄ dà zɛ́n, aↄ̃ↄ màsokɛna gbaa kɛ̀ aↄ̃é da Balamunɛ kũna. Kɛ̀ aↄ̃ kà à kiia, aↄ̃ yã kɛ̀ Balaki ń zĩo ònɛ.

⁸À bèńnɛ: À i kɛ̀, mɛ́ yã kɛ̀ Dii é omɛɛ oare. Ben Mↄabu kínɛ pìnↄ ì Balamu bɛ.

⁹Ben Luda bↄ̀ à mↄ̀ Balamuzi à à là à bè: Dénↄn gbɛ̃ kɛ̀ aↄ̃ↄ kúnyo kɛ̀kiinↄ ũu?

¹⁰À wèàla à bè: Zipo nɛ́ Balaki, Mↄabunↄ kína bé à ń zĩma. Aↄ̃ bè

¹¹gbɛ̃ kenↄ bↄ̀ Igipiti aↄ̃ dàgula. Ben à bè mà mↄ́ mà ń káare lɛ à e à zĩ̀ bleḿma à pɛ́ḿma.

¹²Ben Luda bènɛ: Ǹton tɛ́ńziro. Ǹton sa zaaa ońnɛro, zaakɛ ma aubarika dàńgu kↄ̀.

¹³Kɛ̀ Balamu fɛ̀ɛ kↄngↄ, à bè Balaki kínɛnↄnɛ: À tá a bùsun, zaakɛ Dii gìmɛ mà tɛ́azi.

¹⁴Ben Mↄabu kínɛ pìnↄ fɛ̀ɛ wà tà Balaki kiia aↄ̃ bè: Balamu gì mↄ́waozi.

¹⁵Balaki ɛ̀ara à kínɛ pãndenↄ zĩ̀ dↄ, aↄ̃ pari kↄ̃n ń gakuio dɛ gbɛ̃ káakunↄla.