Namba 22:4-15

⁴Ma êsêac sêsôm gêdêŋ lau Midian nêŋ laumata gebe “Ojae, galoc lau Israel nêŋ toŋ kapôêŋ oc sêniŋ gêŋ samob, taŋ gêc aêacŋa naŋ, su amboac bulimakao seŋ gêgwaŋ aŋga kôm.” Ma Sipor latu Balak kêtu lau Moab nêŋ kiŋ gêdêŋ ŋasawa tonaŋ.

⁵Ma eŋ kêsakiŋ lau jaeŋŋa gêdêŋ Beor latu Bileam, taŋ gêŋgôŋ malac Petor, taŋ gêc gamêŋ Amauŋa aŋga bu Euprat ŋatali. Lau jaeŋŋa sebe sêkalem eŋ ma sêsôm gêdêŋ eŋ gebe “Ôlic acgom, lau-m teŋ sêwi Aiguptu siŋ sêmêŋ sêjam gamêŋ auc samucgeŋ mêŋsêŋgôŋ sêkanôŋ aêac.

⁶Amboac tonaŋ ômôêŋ sebeŋ mêŋôpuc boa lau tônê êtu aêŋa, gebe lau tau ŋajaŋa sêlêlêc aê su. Embe ôpuc boa êsêac, oc moae jatôm, gebe jaku êsêac tulu ma jajanda êsêac e sêwi gamêŋ siŋ, gebe aê kajalagac aôm embe ônam mec ŋac teŋ, oc êtap mec ŋanô sa, ma embe ôpuc boa ŋac teŋ, oc êtap kôpuc boa ŋaŋanô sa amboac tonaŋgeŋ.”

⁷Ma lau Moab to lau Midian nêŋ laumata dêdi ma sêkôc ŋaôli Bileam eoc biŋ lasêŋa gêwiŋ. Êsêac jasêô lasê dêdêŋ Bileam ma sêsôm Balaknê biŋ gêdêŋ eŋ.

⁸Ma eŋ kêsôm gêdêŋ êsêac gebe “Anêc awiŋ aê êndêŋ êmbêc tonec, go jasôm biŋ êndêŋ amac êtôm Apômtau êsôm êndêŋ aê.” Tec lau Moab nêŋ kasêga sêmoa sêwiŋ Bileam.

⁹Ma Anôtô gêdêŋ Bileam jakêsôm gebe “Asa lau sêmoa sêwiŋ aôm.”

¹⁰Bileam kêsôm gêdêŋ Anôtô gebe “Sipor latu Balak, lau Moab nêŋ kiŋ, kêsakiŋ biŋ teŋ gêdêŋ aê gebe

¹¹‘Ôlic acgom lau-m teŋ sêwi Aiguptu siŋ sêmêŋ sêjam gamêŋ auc samucgeŋ. Amboac tonaŋ ômôêŋ mêŋôpuc boa êsêac, moae jatôm, gebe janac siŋ êndêŋ êsêac ma jajanda êsêac e sêwi gamêŋ siŋ.’”

¹²Mago Anôtô kêsôm gêdêŋ Bileam gebe “Ôsêlêŋ ôwiŋ êsêac atom ma ôpuc boa lau tau atom amboac tonaŋgeŋ, gebe aê gajam mec êsêac su.”

¹³Gêdêŋ bêbêcgeŋ Bileam gêdi sa ma kêsôm gêdêŋ Balaknê kasêga gebe “Aêc amu ana nêm gamêŋ êtiam, gebe Apômtau gedec gebe aê jasêlêŋ jawiŋ amac.”

¹⁴Go lau Moab nêŋ kasêga dêdi jasêô lasê gêdêŋ Balak ma sêsôm gebe “Bileam gedec gebe êsêlêŋ êwiŋ aêac êmêŋ.”

¹⁵Tec Balak kêsakiŋ kasêga ŋagêdô kêtiam. Êsêac lau taêsam to lau towae sêlêlêc lau ŋamataŋa su.