Mumutara Ŋic 20:30-44

³⁰Eme hae mocwâc fureme Israe ŋic jaŋe Benjamiŋte guru râsi fisi‐jarerâ bâbâni embiŋ iŋuc ehuc Gibea hae mocwâc orâŋkembiŋ.

³¹Ehame Benjamiŋte guru jaŋe Israe ŋic jopaniŋte haeonec waharâ rambiŋ. Eme Israe ŋic jaŋe eatuc‐jopahuc wisepie bâjâpec‐joparâ rambiŋ. Ehuc bâbâni embiŋ irec sâc ehuc hae sahao Israe ŋic jâpec‐jopa raku Bete â Gibea hae hata sosohoc‐jekicko ira ŋic 30 jopambiŋ.

³²Ehuc Benjamiŋte guru jaŋe mumbiŋ: “Bâbâni bawahac‐jopambeŋ iŋuc bawahac‐jopaŋgopeneŋ.” Ehame Israe ŋic jaŋe ine mumbiŋ: “Nâŋâc eatuc‐jopahuc wisepene hae beherâ hatao fânʒepieŋ.”

³³Iŋuc murâ Israe ŋic jaŋe dodoma‐jeŋickonec âte sue rarâ Baali‐Tama haeo birickembiŋ. Eme Israe ŋic gâcne Geba haere ʒoaŋ huhunaopec ira somâ râerâ fombiŋkonec quruŋ herâ faharembiŋ.

³⁴Eme Israe guru sâc irecnec ŋic 10 tauseŋ bâwosâec‐jopakicne jaŋe Gibea hae râsi ecnehuc fisipie ʒikazi ɋârâŋke‐jâmbâŋkewec. Ehame Benjamiŋte guru jaŋe sisipiriczi bâmbeŋ‐joparâ fowec i moc mi ʒâŋitambiŋ.

³⁵Ehame Wofuŋzi Israe ŋic jaŋere ʒâŋe faio Benjamiŋte guru bawahac‐jopawec. Eme Israe ŋic jaŋe ʒoaŋ ira Benjamiŋte guruonec ŋic ʒika‐jeŋichec 25 tauseŋ â 100 jopa miziembiŋ.

³⁶Iŋuc fuame Benjamiŋte guru jaŋe dockembiŋ hâcne. Eme Israe ŋic jaŋe ŋic gâcne Gibea hae somâckerâ foniŋte râec‐jopambiŋ jaŋe manapaŋ‐jopahuc Benjamiŋte guru hae hejarembiŋ.

³⁷Eme somâ râerâ fombiŋ ŋic i jaŋe bâruŋ jaha Gibea haeo ferâ ŋic ŋokac ʒikazi imac‐jopambiŋ.

³⁸Erâ Israe ŋic guru sâko â ŋic gâcne somâ râerâ fombiŋ jaŋere ma ine hae turuŋkepie ʒahuc hosâc sâko fahareocte musereckembiŋ.

³⁹Eme guru sâko jaŋe honerâ ʒika qaniŋte forisiembiŋ. Ehame Benjamiŋte guru jaŋe fuŋkerâ jâpec‐jopa raku Israe ŋic 30 jopambiŋ. Ehuc ʒiŋuc mumbiŋ: “Bâbâni ʒika qahuc ejarembiŋ irec sâc imac‐jopaŋgopeneŋ hâcne.”

⁴⁰Iŋuc muhapie ma mukicne hosâc izi haeonec ŋezuhuc feme Benjamiŋte guru jaŋe forisierâ honehuc weaŋkembiŋ.

⁴¹Ehame Israe ŋic jaŋe risiepie Benjamiŋte guru jaŋe sisipiriczi maic‐jopawec i honerâ hâbi‐jeŋic ŋeŋgoroŋkewec.

⁴²Ŋeŋgoroŋkeme Israe ŋic râpec‐joparâ mâreŋ burocnaopec wisehapie ʒikazi rocjopawec wâc. Ehame Israe momori gâcne haeo jumbiŋ jaŋe waharâ âgofâc‐jeŋic bafic‐jopapie orâŋ bârâŋ ejarehuc jopambiŋ.

⁴³Ehuc Benjamiŋte guru jopa jâpec ejare raku Gibea hae ŋifecne ʒoaŋ wewefunaopec toma‐jeŋicko fisirâ bawahac‐jopa‐jâmbâŋkembiŋ.

⁴⁴Eme Benjamiŋte guruonec ŋic momori wânʒâŋ 18 tauseŋ jaŋe hâmombiŋ.