Soukapwüng 20:30-44

³⁰Iwe, ekewe re Israel ra feila pwe repwe maun ngeni chon Peniamin lon aülüngatin rän. Ra atettelisefäliir pwe repwe maun ngeni Kipea usun me mwan.

³¹Nge ekewe chon Peniamin ra towu pwe repwe maun ngeni ekewe aramas. Iwe, ra toauela seni ewe telinimw o popuetä le niela ekoch lein ekewe re Israel usun me mwan. Ra niir me lon ekewe alelap, efoch mi ale ngeni Petel, nge efoch ngeni Kipea pwal lon ewe amassawa. Ra niela ina epwe ükükün ilik re Israel.

³²Iwe, ekewe chon Peniamin ra apasa, “Ra pwal kuf rech usun chök me mwan.” Nge ekewe re Israel ra apasa, “Ousipwe sü seniir o panirela ngeni ekewe alelap toau seni ewe telinimw.”

³³Nge lupwen ekewe re Israel meinisin ra mwöküt seni lenier o atetteliir me lon Paal-tamar, chokewe mi op ra pwal sä seni lenier me pelilotoun Kipea.

³⁴Iwe, ükükün engol ngeröü mwän mi kefil seni lein unusen chon Israel ra maun ngeni Kipea. Ewe maun a fokun weires, nge ekewe chon Peniamin resap silei pwe ra arap ngeni feiengau.

³⁵Iwe, ewe Samol mi Lapalap a akufu chon Peniamin mwen ekewe re Israel. Lon ewe ränin, ekewe re Israel ra niela ükükün rüe me limungeröü ipükü re Peniamin, ir meinisin mwän mi sile maun fän ketilas.

³⁶Mürin, ekewe chon Peniamin ra mefi pwe ra kuf. Ekewe re Israel ra tipin sü me mwen ekewe chon Peniamin, pun ra lükü ekewe mwän mi op pwelin ünükün Kipea.

³⁷Iwe, ekewe mwän mi op ra müttir towu seni ar lenien op o cheri Kipea. Ra niela chon ewe telinimw meinisin ren ketilas.

³⁸Nge mi wor eu asisil ekewe re Israel me ekewe chon op ra tipeeufengen won, pwe lupwen epwe wor och ötüöt mi ötütä seni ewe telinimw,

³⁹ekewe re Israel mi tipin sü repwe kulsefäl o maun. Iei chon Peniamin ra fen popuetä le niela ina epwe ükükün ilik re Israel. Iwe, ra apasa, “Ellet, ra kuf rech usun me mwan.”

⁴⁰Nge lupwen ewe ötüöt a ötütä seni lon ewe telinimw, ekewe chon Peniamin ra nenesökür o küna pwe unusen ewe telinimw a kar.

⁴¹Mürin, ekewe re Israel ra kul, nge ekewe chon Peniamin ra rükö, pun ra mefi pwe repwe le feiengau.

⁴²Iei mine ra sü me mwen ekewe re Israel o sü ngeni ewe fanüapö, nge resap tongeni sü seni ewe maun. Pwal ekewe re Israel mi towu seni ewe telinimw ra niela ekewe chon Peniamin ikenan.

⁴³Iwe, ra appafengeni ekewe chon Peniamin, ra tapweriir o niretiu seni Noha tori akawenewenen Kipea me peliötiu.

⁴⁴Iwe, ükükün engol me walungeröü chon Peniamin ra mäla, ir meinisin sounfiu mi pwora.