Judges 20:30-44

³⁰Ma aram e bin dalip e rran nranod i yan nga m’on ni ngar chamgad ko fa raba’ i salthaw ko Benjamin miyad tay e pi salthaw rorad nga tagil’rad ni yad ba sap nga Gibeah, ni bod rogon nrined nsom’on.

³¹Me yib piyu Benjamin nga wuru’ e binaw ni ngar chamgad min waliyrad i yan nga wuru fare binaw. Ma ku aram rogon nrin’ed som’on, miyad tabab i thang e fan rok boch yu Israel u daken e tafelfel’, ngu lan e wo’ ni yan nga Bethel ngu daken e wo’ ni yan nga Gibeah. Miyad thang e fan rok gonap’an guyey piyu Israel.

³²Me ga’ar fapi girdi’ nu Benjamin, “Kad gelgad ngorad ni ku bod ko som’on.” Machane ke puruy’nag piyu Israel ni ngar milgad rorad ya ngar waliyed yad i yan nga orel ko fare binaw, nga daken e kanawo’.

³³Ere nap’an e sul fa raba’ i salthaw ni gelngin yu Israel nga ta’bang ngar yu ulunggad bayay u Baaltamar, ma fapi salthaw nra longbiyed yu Gibeah e rabad ra bogorgad nib tomgin nga tamilang ko gin ur pachgad riy u fithik’ e war nib liyeg fare binaw.

³⁴Ragag bbiyu’ e salthaw nri yad bmel’eag u fithik’ yu Israel ni ga’ngin, nranod ra maelgad ngak yu Gibeah, ere ni cham nib almirin. Piyu Benjamin e dar nanged nike chugur ni ngan thirifrad u but’.

³⁵Me pi’ SOMOL e salthaw rok Benjamin nga pa’ piyu Israel. Piyu Israel e ra thanged e fan rok 25,100 e pi to’ogor rorad,

³⁶me nang piyu Benjamin ni kar waergad. Fa raba’ i salthaw ni gelngin yu Israel e ra milgad rok piyu Benjamin ni bochan e be pagan’rad ngak e tin e salthaw ni kan tayrad ni yad be pach ni kar longbiyed yu Gibeah.

³⁷Pi salthaw ney e ra milgad nrib pay i yan nga Gibeah; miyad wear u lan fare binaw ngar thanged e fan rok gubin e girdi’ u rom.

³⁸Fa raba’ i salthaw ni gelngin yu Israel nge fapi salthaw ni ur pachgad e kar duwgiliyed reb e pow. Nap’an ni yad ra guy bangi ath nib dub’ag nike yan ngalang ko fare binaw,

³⁹ma pi salthaw nu Israel ni yad bay u gil’ e mael e ngar chelgad ngar sulod. I taw ko ngiyal’ney ma ke mu’ yu Benjamin i thang e fan rok fare guyey i girdi’ nu Israel. Me lungurad rorad, “Errogon, kad gelgad ngorad ni ku bod fa yanem.”

⁴⁰Ma aram me yib i m’ug fare pow; ni fare gi ath e ke puw ke yan ngalang ko fare binaw. Me sap piyu Benjamin nga wuryal rorad mri balyangan’rad ni kar guyed fare binaw ni ga’ngin nike bugor e daramram riy ngalang.

⁴¹Ma aram me cheal fapi salthaw nu israel u but’, ma piyu Benjamin e ke li’rad e marus ni bochan e kar nanged ni aram e ngan thirifrad u but’.

⁴²Miyad cheal u but’ ngar milgad rok e salthaw nu Israel ni yad be mil i yan u daken e tafelfel’, machane de yag ni ngar thaygad. Kar me’chathalgad u thilin fa gal raba’ i salthaw: ni fare raba’ i salthaw ni gelngin yu Israel nge fapi salthaw ni aram e yad be sul i yib nga wuru’ fare binaw, min thang owcharad.

⁴³Fapi Israel e ra thabey niged e pi to’ogor rorad, ni yad be lol’ograd i yan ni dariy e tal nge mada’ ngabang ni bay ko ngek u Gibeah, ni yad be thang e fan rorad i yan.

⁴⁴18,000 ko tin th’abi cheag ko pi salthaw ko Benjamin e nli’rad ngarm’ad.