Mise 5

1

2

3

4

5

6

7

¹Bɛtɛlɛũ Ɛflata ń kɛ̃́sãa Yuda bùsu wɛ̃́lɛↄzi, ãma n guu gbɛ̃e a bↄu, iↄ dɛmɛɛ Isailiↄ kía ũ. Ɔ̃mɛ kú za káaukaau, aà fɛlɛa ku à gɛ̃̀gɛ̃.

²Ayãmɛto Isailiↄ aaↄ ku vũaaa e gↄↄ pↄ́ nɛ'ina a gɛ nɛ́pi iò, aà gbɛ̃́ kĩniↄ i su ń Isailiↄ sãnu.

³A fɛlɛ ń dã́dãkɛ ń Dii gbãao ń Dii a Lua zↄ̃ↄkɛo. Aà zↄ̃ↄkɛ a ligua e dṹnia lɛ́wa, aaiↄ ku niɛ guu.

⁴Ɔ̃mɛ aↄ dɛ ń aafia ũ. Tó Asiliↄ sì wá bùsuu, tó aa ↄ̃zↄ̃̀ wá wɛ̃́lɛ bĩ́ideↄwa, wá tó dↄaana gbɛ̃ↄn soplaↄ fɛlɛńnↄ, kíapiↄ ka se swaaↄ̃.

⁵Aa kible Asili bùsuwa ń fɛ̃ndao, aa gbãable Niũlodi bùsupiwa ń fɛ̃ndao woa a kpɛ́u. Tó Asiliↄ sìwágu mɛ́ aa ↄ̃zↄ̃̀ wá bùsuwa, kíapi mɛ́ a wá bↄ ń ↄzĩ.

⁶Yakↄbu bui kↄ̃naↄ ku buiↄ guu lán fíi pↄ́ bↄ̀ Dii kĩ́i kpaawa, ìli sↄ̃́a gbɛ̃nazĩnazio, lán lou'i pↄ́ fã̀fã sɛ̃wawa, ìli gbɛ̃e dão.

⁷Yakↄbu bui kↄ̃naↄ aaↄ ku buiↄ guu, bùsu pↄ́ aaↄ ku a guuↄ aaↄ dasi, lán nↄ̀ↄmusu kua líkpɛ nↄ̀bↄↄ guu ge nↄ̀ↄkusi kua sã kaauwa. Gↄↄ pↄ́ àlɛ pãa, ì kusimá à ń taitai, gbɛ̃e ku à ń bↄ aà ↄzĩo.

⁸Á ↄloo á ibɛɛↄla, í á wɛ̀lɛpiↄ dɛdɛ píi.

⁹Ma Dii ma mɛ̀, gↄↄ bee má á sↄ̃́ↄ midɛ á guu, mí á sↄ̃́goↄ wíwi.

¹⁰Má á bùsu wɛ̃́lɛↄ dɛ̃ↄnzↄ̃, mí a zɛgikĩiↄ kwɛ́.

¹¹Má á gbɛ̃kↄↄlɛkɛnaↄ bãdɛ, pↄdamadeↄ aaↄ kú á guu lↄo.

¹²Má tã́a pↄ́ á ã̀ↄ ɛ́'ɛ, má gbɛ pↄ́ á pɛ̀lɛↄ wíwi, á kúlɛ á pↄkɛapiↄnɛ lↄo.

¹³Má Asetaati líↄ wolɛwolɛ, mí á wɛ̃́lɛↄ yaa.

¹⁴Bui pↄ́ aai ma yãmaoↄ sↄ̃, má tↄsimá ń pↄkũmao ń kyã̀wãaoɛ.