Maika 5

1

2

3

4

5

6

7

¹Va nama i sari mua tie varipera, agoi na vasileana tadi tie varipera, ura ele vari likoho ni gita rini. Kote seke ia rini sa baṉara pa Izireli na kolu kote seke nia rini sa paparana.

²Zama se Zihova, “Ba agoi, Betilihema Eparata, agoi si keke butubutu hitekemu pa Ziuda, ba koa goi si kote va vura ia Rau si Asa sapu kote Baṉara nia sa butubutu Izireli, sa tutina Sa si mae guana tu pukerane, pa totoso sapu pukerane hola.”

³Gua ke sa butubutu Izireli si kote ta veko la koari nana kana osolae kamo sa totoso pude podopodo si asa pu korapa ta sigiti, meke pa totoso asa kote pule mae sari turaṉada ta raovodi pude somana pule koari na tie Izireli.

⁴Kote turu si Asa meke sepati nia sa Nana rovana sipi pa korapa ṉiniraṉira te Zihova, pa korapa Pozana tolavaena sa Baṉara Zihova sa Nana Tamasa. Meke pa totoso asa si kote koa pa binule meke lopu matagutu si arini, ura sa Nana linavata si kote kamo la pa doduruna sa popoa pepeso.

⁵Meke kote na dia binule si Asa, pana mae rapata ia sa qeto minate Asiria sa nada popoa meke ene nuquru gua koari nada vasileana ṉiṉiradi. Kote garunu lani gita sari doduru tie tuturaṉa meke sa qeto minate varipera pude la raza i.

⁶Pa vedara kote baṉara nia rini sa popoa Asiria, na vedara ta lobusu vurana kote kopu nia si pa popoa te Nimirodi. Sa Baṉara sapu sa sepati pa butubutu Izireli si kote harupu gita koari pa Asiria pana mae rapata ia sa sa nada popoa meke ene nuquru pa nada voloso.

⁷Sari ka visavisa tie koa holadi te Zekopi si kote koa pa vari korapadi ri soku butubutu guana puni sapu maena koe Zihova, guana ruku pa duduli, sapu lopu kote lavelave nia sa tie babe hukata ia.

⁸Sari ka visavisa tie koa holadi te Zekopi si kote koa dia pa vari korapadi ri na butubutu, pa vari korapadi ri soku tinoni, guana laione koari na kurukuru pinomo pa soloso, guana tuna laione koari na rovana sipi, sapu va matei sa meke ganigani gana meke loke tie si boka la harupi.

⁹Sa limamu si kote ta ovulu sage pa minataqara koari mua kana, meke doduru pu kana igo si kote tava mate.

¹⁰Zama vura gua se Zihova, “Koasa rane asa, si kote va mate i Arau sari mia hose meke huara i sari mia totopili varipera.

¹¹Kote huari Rau sari vasileana lavata pa mia popoa meke huara goreni sari mia vasidi ṉiṉiradi.

¹²Kote huari Rau sari mia tie sabusabukae pude lopu kote boka pela pule tie si gamu.

¹³Kote huari Rau sari mia kineha ta peqodi meke sari dedegere patu hopedi pa vari korapa mia; pude lopu kote todoṉo pule si gamu koari na tinavete pa limamia.

¹⁴Kote rabutu pani Rau pa vari korapa mia sari na beku kinehana sa tamasa barikaleqe sapu se Asera meke huari sari mia vasileana lavata.

¹⁵Kote tubehe hobequ si Arau pa binugoro meke tinaṉaziri koari na butubutu baṉara sapu lopu va tabe mae koa Rau.”