Micas 5

1

2

3

4

5

6

7

¹Guntaan, sikiyu is menge tig-Jerusalem, endama niw is menge sundaru niw su midliǥuyan kew te menge kuntada niw. Edlegkuten dan te tuked is buked te pengulu te Israel.

²Migkaǥi is Nengazen te, “Sikew, Betlehem Efrata, sevaha ka te kinezeisayan he inged diyà te Juda. Piru ziyà ebpuun te kenikew is etew he ebpenilbi kedì he pengulu te Israel, he is menge kepuun din nevantug dengan he menge etew.”

³Ibeǥey te Nengazen is menge etew te Israel ziyà te menge kuntada zan, piru taman dà te ked-anak te vahi he ebeliliten te maama he ebpengulu te Israel.

⁴Edumala heini he pengulu ne ed-elimahan din is menge etew te Israel he iring sikandin te perevantey te menge kerehidu. Edhimuwen din heini pinaaǥi te zesen wey gehem te Nengazen he Megbevayè din. Ne ebpengungubpaan is menge etew zin he wazè dan igkahandek su egkilelaan te menge etew te tivuuk he kelibutan is kegkemekeǥeǥehem din.

⁵Ebeǥayan din te meupiya he kebpekesavuk is menge etew zin. Emun edsurung is menge tig-Asiria kayi te tanè tew wey edselezan dan is melig-en he menge vahin te inged tew, ebpekidtebek kiw kandan he ebpurungan ebpenguluwi te menge pengulu tew.

⁶Edaaǥen dan wey egkezumala zan is Asiria he tanà ni Nimrod, pinaaǥi te menge ǥumaan dan. Umbe edlibriyen kiw zan emun edsurung is menge tig-Asiria kayi te tanè tew.

⁷“Is egkesamà he menge Israilihanen, ebpekeuwit te keupiyaanan diyà te mahabet he menge nasyun. Egkeiring sikandan te mahames he keramag wey uzan he ibpaaǥi te Nengazen su wey meketuvù is menge pinemula. Edsarig dan diyà te Megbevayà ne kenà diyà te etew.

⁸Piru ebpekeuwit daan sikandan te kezeetan diyà te menge nasyun. Egkeiring sikandan te mevurut he erimaung he ed-etaki te menge langgam diyà te ketelunan wey menge kerehidu ziyà te penebtavà. Su emun ed-etaki heini ne edlingketawan din is ebiktimahan din wey ebpengeǥaten din ne kenè ne heini ebpekelingkawas kandin.

⁹Ebpekezaag is menge Israilihanen te menge kuntada zan. Edezeetan dan sikandan is langun.”

¹⁰Migkaǥi is Nengazen te, “Ziyà te huziyan he menge andew, ebpehimetayan ku is menge kudè niw wey edweǥayen ku is menge kerwahi niw.

¹¹Edweǥayen ku is menge inged niw ragkes en is binerengbeng he menge inged.

¹²Edezeetan ku is menge hinepetan niw ne egkaawà is menge veyilan niw.

¹³Ne kenè kew en ebpekaazap te menge ledawan wey tedeman he menge vatu he mibeelan niw, su edrupeten ku heini,

¹⁴ragkes is menge tukud he simbulu te vahi he ed-ezapen he si Ashera. Ne edezeetan ku heini is menge inged niw.

¹⁵Tenged te utew ku kegkepauk, ebelesan ku is menge etew ziyà te menge nasyun he wazà mebpezumazuma kedì.”