Mika 5

1

2

3

4

5

6

7

¹Ämi chon Jerusalem, oupwe amwichafengeni nöümi kewe sounfiu. Ekewe chon oputakich ra pwelifeilikich fän pisekin maun. Repwe pösapei ewe chon nemeni Israel ren efoch wok.

²En Petlehem Efrata, inamwo ika ka kisikis me lein ekewe telinimwen Juta, nge ewe mi towu senuk epwe samolun Israel, a nonom seni lomlom, seni fansoun esepop.

³Iei mine Israel epwe sechila tori ewe fansoun neminewe mi cheuchen fam a nöünöüla. Mürin pwin kewe lusun mi oola repwe liwinsefälito o chu ngeni ekewe chon Israel.

⁴Iwe, lupwen ätewe epwe war, epwe nemeni nöün aramas fän pöchökülen ewe Samol mi Lapalap, pwal fän lingen iten ewe Samol mi Lapalap an we Kot. Iwe, ekewe aramas repwe nonom fän kinamwe, pun lon ena fansoun an tekia epwe föüla won unusen fanüfan.

⁵Iwe, i epwe atoto kinamwe. Lupwen ekewe chon Asiria repwe tolong lon fanüem o ataelong äm kewe imwen maun mi pöchökül, äm aipwe tinala nöüm kewe souemwen mi fokun pöchökül pwe repwe maun ngeniir.

⁶Repwe liapeni ewe fanü Asiria, ewe fanüen Nimrot fän kenin ketilas. Repwe angasakem seni ekewe chon Asiria, lupwen repwe tolong lon fanüem.

⁷Mürin ekewe mi chüen manau seni mwirimwirin Jakop repwe wewe ngeni amurenipwin seni ewe Samol mi Lapalap me lein chomong mwü, repwe pwal wewe ngeni üt won fetil. Resap eäni apilükülük aramas ika älälei och seni chon fanüfan.

⁸Iwe, chokewe mi chüen manau seni mwirimwirin Jakop repwe nonom lein chon ekewe mwü usun eman laion lein ekewe manmwachon lein wöllap, usun eman nienifön laion mi nom lein epwi pwiin sip, epwe puriretiu o atatakisiir, nge esap wor eman a tongeni amanaueer.

⁹Chon Israel repwe akufu chon oputeer meinisin o aroserela.

¹⁰Iei alon ewe Samol mi Lapalap, “Lon ena fansoun üpwe angei senikemi nöümi kewe oris o ataela wämi kewe woken.

¹¹Üpwe ataela ekewe telinimw lon fanüemi o atatakisietiu ämi kewe leni mi pöchökül meinisin.

¹²Üpwe aükätiu ämi angangen rong, nge esap chüen wor nöümi souasisil.

¹³Üpwe ataela ämi kewe uluulun anümwäl o pöküetiu ämi kewe ür mi pin pwe ousap chüen fel ngeni angangen pöümi kewe.

¹⁴Üpwe üttätä uluulun ewe anüfefin Asera seni lon fanüemi o ataela ämi kewe telinimw.

¹⁵Fän ai song me lingeringer üpwe ngeni chon ekewe mwü resap aleasochis chappen ar föför.”