Matiu 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Yisasia tipi kalefi haisaga hu-maino tikotumona takaeno agaia kumatega eteno umaine.

²Umainegeya nagoa vayamoya nago kanomona aiya aya fali-mainea kanoa hagifanale faeno mainegeya avaleya Yisasite emainae. Ageno Yisasia ageteno mage huno agesafinaga havimaine “Ma vayamoya nagaife haviya amakupi maleya amametiti nehae.” huno agesa haviteno ani kali kanohe mage huno hapaiye “Nafanenimoga kaha-nepauve menia kolia ohuo nagaya ago aige-ka-tena kefo yakaa atale-nega-toe.” huno hapaiye.

³Higeya kahegi kema havi-linaya anagamoya amakaiami amakuafiti mage huya hae “Ma kanomoa Anumaya Kotife hu-haviya hu-neate.” huya hae.

⁴Hageno Yisasia amakupinaga haviya kea haviteno mage huno hie “Naa higetama tamakaya tamakesafinaga havi kea nehae?

⁵Nagayama hutena hisua kea hana kemo kanaagela hu-maine? ‘Aige-ka-tena kefo yakaa atale-neka-toe.’ huna hisua kemoo? Ifi kali kanomofe ‘He-ti-ka ka vuo.’ huna hisua kemoe?

⁶Nagaya ikapinagati emainoa kanoa vayamo natenea kanomona ma mopale mainena aige-tama-tena kefo yatamia atale-lama-tesua tokiyania hane hutama havisaya yafe nago kavala huna tamave-ligahue.” huno kalima nealia kanomofena mage huno hie “Hetika hagifanaka nealika nokalega vuo.” huno hu-maine.

⁷Higeno hetino nomaalega umaine.

⁸Naa higeya mukia alitalu hu-mainaya veamoya ageteya tusi amamayo aiteya Anumaya Kotima tokiya yaama vayamogamima amamia yafena Anumaya Koti agia alisaga hu-mainae.

⁹Anile neamataleno vilegati nago kanomo agia Matiue musufaya huno vaya amaugafaleti takisi mone ali-liteno nehia kanoa opisi nomaale mopale mainegeno Yisasia ani kanoa mogeteno mage huno hie “Kagaya nakave eno.” huno higeno Matiua hetino Yisasina akave umaine.

¹⁰Vigeno Yisasia Matiu nopi umaineno kave negahe musufayama huya amaugafaleti takisi mone nealiya vayaene nagoa kefo yama nehaya vayaene ani nopi Yisasiene agaienema tokaeya nemaiya anagaaene tokaeya maineya ne-mainae.

¹¹Nenageya Falasia vayamoya Yisasienema tokaeya nemaiya anagafe mage huya hae “Naa higeno tamakaima hu-lamave-nelia kanomoa amaugafaleti takisi monema nealiya vayaene kefo yama nehaya vayaenena kavela nene?” huya hama-vigae.

¹²Hageno Yisasia ani kea ago haviteno mage huno hama-paiye “Kalima noaliya veamoya tota kanomotega ougahagi kali veamoyage tota kanomotega ugahae.

¹³Nagaya ania huna ‘Fatago veane mainone.’ huya nehisaya veanehe ke hugahe nagaya omenogi kefo yama nehaya veanehe ke hugahe emainoe. Anumaya Kotia agaia hu-mainea kea mage huno hu-maineane Afu heya kolamaa takiya naminaya yafena onahaunegi kalagi ai-ma-taya yafekeya nenahaiye huno hu-maineane. Hu-maineanagitama tamakaya ani kemo aepaa mo havilama hutetama ani kavala hiho.” huno hu-maine.

¹⁴Yoni anagamoya Yisasite mage huya me havigae “Tagaya Yoni anagamogataene Falasia vayaene nagoa kavela mo-nesunanagi naa higeya kagaienema tokaeya nemaiya anagamoya mukia kavela nenae?” huya havigae.

¹⁵Hageno Yisasia mage huno hie “Nago kanoa aama faiya esagenoa avaya hesia imu kisia yupa vayaamoyaene mainesigeya ani vayamoya hamauna hu-tesao? Aao hamauna hu-oategahayanagiya haenagaa nago kanama falote hisigeya kame vayamoya ama alisia kanoa atafa huya amakaipiti avale-talesageya ani kanale vayaamoya hamau hu-teteya mosigahae.

¹⁶Nago kanomoa haegafa kena alino atafa kenalela maleno ohatigahie. Maleno hatisiana haegafa kena atalaga huno ali haviya hugahie.

¹⁷Nagi nago kanomoa haegafa nofi alagamo timaa atafa mememo augafa ti keayopina takino ovaigahie. Takino vaisiana timaamoa kanuka hesigeno ti kena falo huno taki-lavinageno ti kena ali haviya hugahie. Haegafa nofi alagamo timaa hefino haegafa meme augafamo ti keayopi takino vaino. Ania hisayana tiene keayoene kanaleya huno hanegahie.” huno hu-maine.

¹⁸Yisasia ani kea nehigeno nagola soka kanomoa Yisasi aiyafi aleya meyeno Yisasina mage huno hapaiye “Munaniamoa ago fali-mainegi kagaya kayana augafale me malesanageno fali-mainefitila eteno he-tisie.” huno hie.

¹⁹Higeno Yisasia hetino anilega vigeya agaienema tokaeya nemaiya anagala akave umainae.

²⁰Nevageno nago amoa tuelufua (12) kafu aigu nopinaga mukia kanale nemaiya amoa Yisasina akavelegati eno kenaamo atupale mevate hie.

²¹Avate nealino agupi mage huno hie “Kenaaleke avate alisugeno kalinimoa hano hu-nategahie.” huno avate nealie.

²²Avate higeno Yisasia mai-yahae huno ani amona ageteno mage huno hapaiye “Ma amoga kolia ohuo nagaifema havika kagupi maleka kametitima hana yamo kagaila alino kanale hu-negate.” huno higeno aupaa kaliamoa kanale hu-tene.

²³Kanale hu-tegeno Yisasia soka kanomo note uvayi huno hamau nehuya kapufama haya veanene avima ataya veanene ali-talu huya maineya tusi ke-yesoma haya kea haviteno mage huno hie “Viho mani munala fali lavata ohunegi afaa faeno maine.” huno hama-paiye. Higeya ani munama faligeya age-mainaya yafenagiya kigi hu-tenae.

²⁵Hu-teteya kumatega umainageno Yisasia nopinaga haino ani munamo ayate atafa nehigeno aupaa hetie.

²⁶He-ti-teanagi Yisasima hia yamo avagemoa ute ete higeya mukia ani kotega veamoya havi-mainae.

²⁷Yisasia ani kumala ataleno nevigeana tole kanolana anaulaga asu hu-mainea kanolana akave neuana ala kefiti mage hae “Kagaya Tevitina aginagomogae taagaila kahau hu-laato.” huana hae.

²⁸Nehaageno Yisasia nopinaga hai-falegeana anaulaga asu hu-mainea kanolana agaite aageno Yisasia ani kanolafena mage huno hana-vige “Nagaya tanaulaga alina hale-lanatesua tokiyania hanea yafena tanakupina malenaao?” huno higeana “E, Anumayamogae kagaya ania hu-laatateasine.” huana hae.

²⁹Nage haageno Yisasia anaulagale aya maleno mage hie “Tanakaya nagaife havitana tanakupi malaa yafe hu-lana-tegahue.” huno hie.

³⁰Higeana ani kanolamogani anaulagamoa ai-gali hu-maine. Higeno Yisasia anakaifena tokiyaage ke huno kahegi ki-nateno mage huno hie “Mani yama hu-lana-toa yafena nagoa veala hamaopaio.” huno hie.

³¹Hianagi ani kanolamogania uana mukia ani kotega veamogamina Yisasima hu-na-tea avagea hu-liteana hu-mainae.

³²Ani tole kanolana utaageno nago kanomona Kefo Avamumoa aguafi maineno avefuna alino ai-yahae higeno agea noaiya kanoa Yisasite avaleya ae.

³³Ageno Yisasia agema noaiya kanomo aguafiti Kefo Avamula anati-talegeno agea aino kea kea higeya alitalu hu-mainaya veamoya ageteya tusia amamayo neaiya mage hae “Mani augafa kavala nayona Isaleli kotega oagenaya kavale.” huya hu-mainae.

³⁴Hayanagi Falasia vayamoya mage huya hae “Pielesepulia Kefo Avamuyagale kava hu-mainea kanomoa tokiya amigeno Kefo Avamumona anati-neatale.” huya hu-mainae.

³⁵Yisasia ala kumateene nagoa ala kumayagaleene osi kumayagaleene neuno mono nopi huge amave-lige huno Anumaya Koti kava yagai-ma-tesia kanale mono kea hama-nepaino mukia kalia alino kanale hu-ma-tene.

³⁶Hu-neama-teno kasagoya melitalu hu-mainaya veala amaketeno hau hu-ma-tene. Ani veamoya kana yapi mainageno amakesa kumoa tusiya higeya sipi sipi kana huya mainayanagi kava yagaisaya vayala omainaya yafe Yisasia kalagi ai-matene.

³⁷Kalagi ai-mateteno Yisasia agaienema tokaeya nemaiya anagafe mage huno hama-paiye “Nagai kema havisaya veala kasagoya kavemoma hoyafima afule-mai-lemai hia kava hu-maineanagi hoyafima aliya alisaya veala osi kanoa mainayafe ani hoyamona Nefafena havigegeno nagoa aliya veala hu-matesie.” huno hu-maine.