1Ani yupa Yisasia nopinagati hati-lavino tikotumo agegayalega mopale umaine.
2Mopale mainegeya kasagoya veamoya agaitega melitalu huya yageyage haya yafe tipi kalefi hai-saga huno mainegeya yageyage haya veala ti agegayalega hetiya mainae.
3Heti-mainageno Yisasia alu ke alu kea avame kefiti mage huno hama-pai-maine “Nago kanomoa viti avina faigahe alino vie.
4Viayamo ani avina alino ai-he-lafino nefaigeno nagoa avinamoa kapi tavino hanegeno namayagamoya nageno hano hie.
5Nagoa avinamoa yafa mopafi taviteno osi mopa hanea yafe aupaa hage-maine.
6Hagetegeno yagemoa hetino amuko-nako higeno hafuya omalea yafe fayoteno asagali-maine.
7Nagoa avinayagamoa avetanafa ino hanea amunopi tavino hageanagi avetanafa hanea inoene tokaeno hageteno avetanafa inomoa ayetegeno haviya hu-maine.
8Nagoa avinamoa kanale mopafi tavino hageteno alagaama ayeana nagoa yosalela tetia (30) alaga ayegeno nagoa yosalela sikisitia (60) alaga ayegeno nagoa yosalela kasagoya alaga vani hataletia (100) ayeno vasai-mai vasai-mai hu-maine.
9Mani kea tamakesama hanesigetamahena havilama hutama haviho.” huno hie.
10Agaiaenema tokaeya nemaiya anagamoya mage huya havigae “Naa higeka avame kefitila veamogamina hama-nepaine?” huya havigae.
11Hageno Yisasia mage hie “Tamakaya Anumaya Kotia kava yagai-lama-teneanagitama falaki mainea kemona Anumaya Kotia tamaya higetama ago havi-linagi mukia veamoya avame kema hama-paisugeya amakesa havigahayanagi haviteya havilama huya ohavigahae.
12Havilama huya havilinaya veamogamina Anumaya Kotia nagoene havisaya yana amamisigeya havilama huya havigahagi ‘Hai nehavune.’ huno hisaya veamogamina havilinayamaa hamanafalegahie.” huno hie.
13Ani veamoya neagayanagi agelama huya oagegahae. Amakesa havigahayanagi haviteya havilama huya ohavisayafe avame kefiti hama-nepauve.
14Ani kavama nehaya yafena Aisaiyaa Anumaya Koti aune kanomoa hu-mainea kemoa ago falote huno tamage hie. Mage huno hu-maineane “Tamakaila tamakesamoa havime havime haigahianagi ani kemona aepaa havilama hutama ohavigahae. Tamaulagamoa ageme geme haigahianagi nago yana agelama hutama ohugahae.
15Kemona aepaa ohavisaya yafe amaku amakesa omale veane mainae. Amakesamoa ani ke ohavisiafene huno amakesamoa tile-maine. Amaulagamoa ani yana oagesayafene huno ago asu hu-maine. Havigu ani kea haviya amakua ai-yahae huya nagaitega esagena ali hilato hu-lama-teyafene.” huno higeya kae-malenayane.
16Anumaya Kotia tamakaila tamaulaga kanaleya hutama neagaya yaene tamakesama nehaviya yaene tamaminea yafena tusia muse hutama maiho.
17Tamage huna tamaha-nepauve “Nayona mukia mainaya amaune vayaene fatago kavama hu-mainaya vayaene tamakayama neagaya yana ‘Agesune.’ huya hayanagi oagenae. Nehaviya kea ‘Havisune.’ huya hayanagi ohavinayane.” huno hama-pai-maine.
18“Avina yama fai-malenea kanomo avame kemona aepaa hu-falote huna tamaha-paisue.
19Kapima tavi-mainea avinamoa maa hu-maine nagoa veamoya Anumaya Koti kava yagai-latesia kea haviteya havilama ohageno Satania eno amakuafiti anima fai-malenea kea ali-talene.
20Yafa mopafima tavi-mainea avinamoa maa hu-maine nagoa veamoya Anumaya Koti kea haviya muse huteya aupaa atafa hayanagi hafuya mopafi otavia yamoa alige atalege veane maineya osi kana kanoa osia haviya amakupi maletageya nagoa veamoya ani kea heya fala-negiya yafe havi kanamoma amakaite falote nehiana aupaa Anumaya Koti kea neatalae.
22Avetanafa ino hanea amunopima tavi-mainea avinamoa maa hu-maine nagoa veamoya Anumaya Koti kea haviteya ma mopafi mukia yayagaamihena amakesa haviya moneamiene yokaloamienefe kalagi aigeno ani yayagamoa Anumaya Koti kea alino aiso hu-malegeya atalageno alagamoa aye he-lafino lama nohie.
23Kanale mopafima tavi-mainea avinamoa maa hu-maine nagoa veamoya Anumaya Koti kea haviteya havilama hageno anifiti alaga mukia aye he-nelafie. Nagoa veamoya nagoke avina yosalela kasagoya vani hataletia (100) aye-maine. Nagoa veamoya nagoke avina yosalela sikisitia (60) alaga aye-maine. Nagoa veamoya nagoke avina yosalela tetia (30) alaga aye-maine.” huno hu-maine.
24Yisasia nago avame kea mage huno hama-paiye. Anumaya Kotia kava yagai-lama-tesia yamoa maa hu-maine nago kanomoa kanale avina yana hoyaafina fai-malene.
25Fai-malenegeya veamoya faeya mainageno kame kanomoa havi inomo alaga alino ani hoyafi ai-he-lafino umaine.
26Utegeno haenaga ani viti alagamoa neayegeno havi ino talamoa anifiti hageno nagopi hai-mainae.
27Haigeya aliya vayamoya hoyamona nefate mage huya mo hae “Ala kanomogae kanale avinama hoyakaafima fai-malananagi naa higeno havi ino talamoa anifitila falote nehie?” huya havigae.
28Havigageno hoyamona nefaa mage huno hie “Nagola kame kanomo mani kavala me hu-malene.” huno higeya aliya vayamoya mage huya havigae “Tagaya kanale uta havi inona vakai-talesuno?” huya havigae.
29Havigageno ani hoyamona nefaa mage hie “Aao, mo vakai-talesayana havigu kanale avinaene vakai-taleyafenagi ataleho.
30Atalegeana nagopi tokaeana haneo. Kavema afule yupa hoya aliya vayania mage huna hama-paigahue ‘Hagotetama ino talana hakaitama atafi kaesayafe haya kitetama nemaletama anile kanale avinamo yosaa alitalu hutama kave noniafi maleho.’ huna hugahue.” huno hu-maine.
31Yisasia nagola avame kea hama-paino mage huno hie “Anumaya Koti kava yagai-lamatesia yamoa maa hu-maine nago kanomoa masatati avina alino hoyafi fai-malene. Ani yosamo avina kanoa oagemo avina kanoa haneanagino mukia alu alagayagamoya ani alaga kanoa agasageno osi hu-maine.
32Nago kanomoa ani avina kanoa alino hoyafi fai-malegeno hageno ala huteno mukia hoyafima hanea yosayaga agaseno yosa haigeya namayagamoya me kale-maineya ani yosamo akopale noamia kigahae.” huno hu-maine.
33Yisasia nago avame kea mage huno hama-paiye “Anumaya Kotia kava yagai-lama-tesia yamoa kai-hamema hale-negia avamete hu-maine. Nago amoa ani kai-hamema halegisia yana alino talia (3) ala yopafi tanefa falauvaene ali havigu higeno haenagaa mukia tanefa palauvamoa halegi-maine.” huno hie.
34Yisasia melitalu haya veamogamina mukia kema hama-paiya kea avame kegeya hama-nepaino nagola kea hu-falote huno hamaopaine.
35Ani kavama hia yafena nagola Anumaya Koti aune kanomoa hu-mainea kemoa ago falote huno tamage hie. Ani kea mage huno hu-maineane “Nagaya avame kea hu-falote nehuna nayoma ma mopama taloma hu-malenea kanaletima fala-ki-mainea kea menia hama-paigahue.” huno hu-maineane.
36Yisasia anima melitalu hu-mainaya veala amataleno nopinaga vigeya agaiaenema tokaeya nemaiya anagamoya mage huya me hae “Havi inomoma hoyafima falote nehia avame kemona aepaa hu-halegeta havimano.” huya hae.
37Hageno Yisasia kenonaamia mage huno hie “Kanale avinama fai-malenea kanoa ikapinagati emainoa kanoa vayamo natenea kanoa nagaya mainoe.
38Mukia ma mopa ani hoyae. Anumaya Kotife ‘Kava yagai-lato.’ huya nehaya veala ani kanale avina mainae. Satani kema akave nemalaya veala havi ino mainae.
39Kame kanoa havi inoma fai-malenea kanoa Satanie. Kavema afulesia yupa ma mopama hano hisia kanae. Mani hoyafi aliya vayala Anumaya Kotina ensole vayaae.
40Ani havi inoma alitalu huya mukia atafi kae-talesaya yana ma mopama hano hisia yupa ania hugahae.
41Ikapinagati emainoa kanoa vayamo natena kanomonia ensole vayania hu-ma-tesugeya mukia veamoya neamafugamina ‘Kefo kava hiho.’ huya ali haviyama hu-mainesaya veanene Anumaya Koti kema ali-tagae-mainesaya veanene Anumaya Kotia kava yagai-mainea yapitila amavaleya hagayu hu-talegahae.
42Ala atagefafi hagayu hu-ma-talegahae. Ani atamoa teno neamasagalisigeya amakata yana nealiya avovo huya avi neateya amave kemoa hugahae.
43Havi veanea atafina kaegahayanagi fatago amaku amakesaene veala Neamafaa kava yagai-mainea kumatela hai-faleya maineya yagemoma aye halea kava hugahae. Agesama hanesia kanomoa havilama huno havisie.”
44Anumaya Kotia kava yagai-mainea yamoa maa hu-maine nagola mone keayola hoyafi he-vai-malenaya avamete hu-maine. He-vai-malenegeno nago kanomoa mopafiti moli-falote huteno eteno anifi he-vai-maleteno tusi muse huno aupaa “Ma mopa miya hisugeno nagai ya hapaesie.” huno mukia afenoyamaa moli meli huno monea aliteno ani mopa miya hu-maine.
45Anumaya Kotia kava yagai-mainea yamoa maa hu-maine. Nago kanomoa kitana kana yafena atiyege yegeteno nagola miyamoa hai-mainea kitana kana yana alino falote hu-maine. Higeno “Ala mone namio.” huno higeno mukia afenomaa moli meli huno mukia yamaa ataleteno monea alino ani kitana kana yana miya hu-malene.
47Nago kene hugahue. Anumaya Kotia kava yagai-mainea yamoa maa hu-maine nagola noyame kukonagoma ti kotupima hagayu hu-talegenoa alu noyamea alu noyamea hagagino fale-mainea avamete hu-maine.
48Ani kukonagopina hiya higeya ti agegayalega he-vayu huya maleneya kanale noyameyaga yopafi yogiya nemaleya havi noyamea aliya hagayu hu-neatalae.
49Ma mopama hano hisia yupa ani kava hugahae. Ensole vayamoya kefo yama hu-mainesaya veanene fatago kavama hu-mainesaya veanene amunopiti ali fako hugahae.
50Huteya ani kefo veala amavaleya tusia ata nelesia atafi hagayu hu-talesageno atamoa teno neamasagalisigeya amakata aisigeya avovo huya amave kemo nehuya avitegahae.
51Yisasia mage huno hama-vige “Tamakaya mani kemona aepaa havilinafi ohavinae?” huno higeya “E, havilinone.” huya hae.
52Hageno mage huno hama-paiye “Tamakaya mono kea havilinaya vayamogatama menia nagai kea nehaviya veane mainagi ania hutama nayoma Anumaya Koti kea hu-mainaya kene menima tamaha-nepauva kea Anumaya Kotia kava yagai-lama-tesia kenena havitetama ala afeno nomona nefaa atafa kanale yaene haegafa kanale yaene nopiti alino neamamia avamete hutama atafa kene yaufa kene hu-haletama hiho.”
53Yisasia ani avame kea hu-hano huteno ani kumala ataleno umaine.
54Uteno ko aepaalega Nasaleti uvayi huno mono nopi haino Anumaya Koti kea hama-paigeya mukia veamoya atali talu huteya mage hae “Mani kea haviyaami hanea vayamogami avamete kea mukia hanateti alia ke nehie? Ayapitima tokiyaa avame yama hu-mainea tokiyaa hanateti ali-maine?
55Mani kanoa noma negia kanomo nafaneo? Malia nafaneo? Yemesiene Yosefeene Saimoniene Yutasienena aganaamoya mainao?
56Mukia asaamoya tagaiene nagopi mainagi agaya mukia tokiya yana hanateti ali-maine.” huya hae.
57Huteya amaipa kafa heteya amakaveno hu-tageno Yisasia mage huno hie “Anumaya Koti kema nehisia kanomoa mukia kumatema mono kema hama-paisiana agia alisaga hugahayanagi agaia afamoene no kumaale veanenena agia alisaga ohugahae.” huno hu-maine.
58Higeno agaife haviya amakupi maleya amametitima ohaya yafe ani kumatela kasagoya tokiya avame yana ohune.
