Matiu 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ani kanafina Helotia sauve kanogino Yisasia mukiama hu-mainea kavamona avagea havimaine.

²Haviteno Helotia agaia aliya vayaahe mage huno hie “Ma kanoa Yonie, tima fale-neama-tea kanoa, fali-mainefitila ago heti-maineafe ayapitila tokiyaage avame yana nehie.” huno hie.

³Helotina aganaamo agia Filipie. Filipi amo agia Helotiasie. Helotia Helotiasina kumai a ali-tenea yafe Yonia Helotife mage huno hie “Anumaya Koti kea ali-tagaeka ali-tenane.” huno hu-mainea yateti Helotia Yonina atafa huno tokiya nofiteti nofi kiteteno kina nopi hu-tene.

⁵Nofi huteteno Helotia Yonifena “Haesugeno falisie.” huno hianagi mukia veamogamife koli hu-maine. Ani veamoya Yonifena “Aune kano maine.” huya haya yafe ohaene.

⁶Ohaenegi nago yupa, Helotina atenea kanahe, huya muse hu-taya yupa nagoa veamoya Helotiene melitalu hu-mainageno Helotiasina munaamoa mukia veamogami amunopi amoa aye-maine. Neayegeno anima ayea yafena Helotia tusiya huno musena hu-maine.

⁷Nehuno ani munafena mage huno hie “Nagaya tamage Anumaya Koti aulagafi kaha-nepauve kahaisia yafena hisanagena afaa kamigahue.” huno hu-maine.

⁸Higeno ani munamona itaamoa nagoa agu agesa amiteno mage huno hie “Yonia ti fale-neama-tea kanomo ageya fakalika agenopaa ai-fakalika yopafi maleteka me namio.” huno hie.

⁹Higenoa ala sauve kanomo aipamoa tusia kanaage higeno Anumaya Koti aulagafima huno lokiya vai-malea yafeene mainaya vayaamofeene agesa haviteno aliya vayaahe mage hie “Ani munamo kea ali hipoya hiho.” huno hu-maine.

¹⁰Huteno aliya vayaa hu-mategeya kina nopinaga Yonina ageya mo fakali-talenae.

¹¹Fakaliteya hatagama haya anumaa yopafi maleteya ani munala aliya memigeno itaamotega alino umaine.

¹²Yoni anagamoya augafaa me hipoya huya mo he-vai-teteya Yisasina mo hapai-mainae.

¹³Hapaigeno Yisasia ani kea haviteno tipi kalefi haisaga hu-maino kame kotega umaine. Vigeya mukia veamoya ani kea haviteya kumaamileti mopafi akave uya anile umainae.

¹⁴Yisasia tipi kalefiti hati-lavino ti agegayalaga maineno ageana kasagoya melitalu hu-mainaya veamogamina amaketeno kalagi ai-mateno kali nealiya veala alino kanale hu-ma-tene.

¹⁵Une kigeya agaiene tokaeya nemaiya anagamoya agaite mage huya me hae “Tagaya vaya omai kaiyaga mainonanagino hani-kisia yafe mukia veamogamina hu-ma-tesanageya kumama hanesilega ute ete huya nesaya kavela miya hisae.” huya hae.

¹⁶Hageno Yisasia mage huno hama-paiye “Naa hinageya ugahae? Tamakaitami kavela amamiho.” huno hie.

¹⁷Higeya mage hae “Tagaipina osi kave kanoa hane faefua (5) mayaene tole noyame kanoagi huno hane.” huya hae.

¹⁸Hageno “Ani kavela alitama eho.” huno hu-maine.

¹⁹Huteno Yisasia mage hie “Mukiamogatama alitalu hute hute hutama apete mopale maiho.” huno higeya mopale mainageno Yisasia faefua (5) mayaene tole noyamene alino ikapinaga age-saga huno Anumaya Kotitega huno muse huteno ani maya kolino agaiaenema tokaeya nemaiya anagaa amamigeya mukia veala amamite amamite hu-mainae.

²⁰Hageya mukia nageno amamu higeya atalaya atupa-tapaa aliya tuelufua (12) kula ai-hava-te-mainae.

²¹Kavema naya vayayaga faefu tausenia (5,000) vemoya ne-mainae. Ne-mainagi ane nafaneamia ohapalinae. Ohavunamaa ane nafanene ne-mainae.

²²Netageno Yisasia agaiaenema tokaeya nemaiya anagamogamina mage huno hama-paiye “Tamakaya nagaila nataletama tipi kalefi haisaga hu-maitama atu kaiyaga hagotetama utegena nagaya veala hu-ma-tesugeya viho.”

²³Hu-ma-tegeya utageno agaiage Anumayamotega havigegahe agoyafi haino agaiage mainegeno hani-ki-maine.

²⁴Hani-ki-geno tipi kalea ti amunopi utegeno yasimoa aulegati eno ani lipi kalea molino mo ai-yahae me ai-yahae hu-maine.

²⁵Koti avametega Yisasia timo agupile aiya aiyeme aiyeme tipi kalema hanelega umaine.

²⁶Nevigeya ani anagamoya Yisasia ti agupilema aiya ayeme ayeme eayana ageteya tusia amamayo aiteya mage hae “Hakalo neefi?” huya “Avovo.” hae.

²⁷Avovo nehageno aupaa Yisasia mage huno hie “Kolia ohutama maiho. Nagaya neogi tokiyaage hutama maiho.” huno hie.

²⁸Higeno Pitaa kenonaa mage huno hie “Anumayamogae kagayama mainenuka nagaifena ‘Timo agupile kaiya ayeme yeme eno.’ huka hugena vano.” huno hie.

²⁹Higeno Yisasia Pitafe mage hie “Kagaya elavika eno.” huno hapaigeno Pitaa tipi kalefitila hati-lavino timo agupile aiya ayeme yeme Yisasitega ugahe hie.

³⁰Ugahe hianagi ala yasimoma tokiyaage huno eayate ageteno koli huno tipi hapanesia ya huteno mage hie “Anumayamogae naugafa ali-gatio.” huno hie.

³¹Higeno aupaa Yisasia ayana hagayu huno Pitana atafa huteno mage huno hie “Kagaya nagaifena havika osi kanoa kagupina maleka kametitia hu-mainana kanomogae naa higeka tole kagesa nehavine?” huno hu-maine.

³²Naa huteana tipi kalefi haisaga hu-maiageno yasimoa taga hu-maine.

³³Taga higeya tipi kalefima mainaya vayamoya Yisasife muse huya agia alisaga huya mage hae “Tamage kagaya Anumaya Koti nafane mainane.” huya hu-mainae.

³⁴Ani ti kotumona takaeya Kenesale kotega uvayi hu-mainae.

³⁵Vigeya ani kumate veamoya Yisasina age-lama huya ageteya alu kumate kumate ke huya mage hae “Kali veala amavaletama eho.” huya hageya kali veala amavaleya Yisasite emainae.

³⁶Kali nealiya veamoya emaineya Yisasife mage huya havigae “Kenakamo atupalekeya avate hisune.” huya nehuya avate hu-mainaya veamogamina kalimoa kanale hu-ma-tene.