Matiu 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Anumaya Kotia kava yagai-mainea yamoa maa hu-maine. Nofi alagamo hoyamona nefaa kege aluganale ani hoyafi aliya alisaya vayafe ke hugahe umaine.

²Uno mage hie “Nagoke yupa kanoa aliyama alisagenahena nagoke vani (1) kina tamamite tamamite hugahue.” huno higeya nagoke amaipa hageno hoyafi hu-ma-tegeya umainae.

³Umainageno yagemoa naeni (9) kilokile haigeno vaya atagu-nefaya kumapi viana nagoa vayala afaa hetiya mainageno momake-maine.

⁴Momaketeno mage hie “Tamakaienena nofi alagamo hoyanifi aliya molisagena miyana fatago huna tamamigahue.” huno higeya umainae.

⁵Umainageno yagemoa amunokano higeno ania hu-maine. Yagemoa alitulu huno lavigeno ania huno nagoa vayafe “Aliya moliho.” huno hie.

⁶Higeno unena aupaa velo hugahe higeno nagoa vayala afaa heti-mainageno momaketeno mage huno hie “Naa higetama ayaaya kanagefa heti-taletama afaa mainae?” huno hamavi-ge.

⁷Hamavi-gegeya mage hae “Nago kanomoa aliyana otamigeta afaa mainone.” huya hageno “Kanalelagi tamakaya nagai hoyafi aliyana moliho.” huno hama-paiye.

⁸Hama-paigeya mo-nealigeno une velo hilega nofi alagamo hoyamona nefaa agaia aliya kava kanohe mage huno hapaiye “Aliya vayafe ke hugeya egeka miyana amamio. Haenagama amavaloa vayamogami miyana amamiteka hagotenama amavale-mainoa vayala haenaga amamio.” huno hie.

⁹Higeya une avavema amavalea vayamoya ageno nagoke vani kina amamite amamite hu-maine.

¹⁰Amamite amamite higeya hagotenoma amavalegeya aliyama meli-mainaya vayamoya mage huya amakesa haviye “Ala miya aligahune.” huya haviyanagi nagoke vani kinageya ali-mainae.

¹¹Aliteya hoyamona nefafena tusiya huya kea-makiya mage hae “Haenagama amavale-mainana vayala yagemoa osi kana kanoa nagoke kana nehigeya aliyana meli-mainagi tagaya afaa hetita omainonagi tusia amukonako hia aliya ali-mainonanagi nagoke avamete havi miya nelamine.” huya hae.

¹³Hageno ani hoyamona nefaa amunoamifi mainea kanohe mage huno hie “Nenafuga havio nagaya havi kavala hu-notama-toe. Natema tamaha-vi-gogetama ‘E, nagoke vani kina aligahune.’ hutama hagetila naa higetama mani kea nehae?

¹⁴Aliyama alitama aliya monea alitama notamilega viho. Nagaya nahaiya avamete huna haenagama amavaloa vayaene nago avamete miyana nelamamue. Nagaini yanagi haile.

¹⁵Ani monea nagainia mone. ‘Nagayama hugahue.’ huna hisua yafena ‘Ohuo.’ hutama nehao? Nagaya vayama kauva yafe tamaipa haviya nehao?” huno hu-maine.

¹⁶Yisasia mage hie “Nagaya ania hugahue. Haenagalafa mainesaya veala hagoteya maigahae. Hagoteya mainesaya veala haenagalafa taviya maigahae.” huno hu-maine.

¹⁷Yelusalemu haigahe katega neuno Yisasia tuelufua (12) anagaamogamina amahaote amavaleno moma-teteno mage huno hie “Haviho tagaya Yelusalemu haisunageya ikapinagati emainoa kanoa vayamo natenea kanomonia nagaila nagesi hinageya mono note kava vayamoyaene kahegi kema havilinaya anagaene kame vayamogami amayapi navaleya na-teteya ‘Haegeno falino.’ huya hugahae.

¹⁹Yuta vea omainaya vayate navaleya momamisageya nagaye hisifa kea hu-nateya hu-haviya hu-na-teteya hegi kayoteti nahaeteya yafaga yosale nili nahaeya asaisagena faligahue. Falisugeya he-vai-natesagena tole yupa komufi maitena tagufa (3) kanale fali-mainesufitila Anumaya Kotia ali he-ti-na-tegahie.” huno hu-maine.

²⁰Sepetina aamoa netalamaaene Yisasite eya ani amoa nago yafe havigegahe aiyafi aleya meye-maine.

²¹Aye-mainegeno Yisasia mage huno havige “Naa hu-gatesue?” huno higeno mage huno hie “Kava yagaisana kumate umainesanageana mani tole nenimogania kavate maineana nagomoa tamaga kayatega maisigeno nagomoa hauga kayatega maisie.” huno havige.

²²Havigegeno Yisasia mage huno netalamaamogania hana-paiye “Nahavi-gea yana ohavinae. Falisua yana satuage hu-mainea timo avamete ti hanea keayopiti negahugi tanakaya kanale negao?” huno higeana “E, tokiyatia haneanagitaa negahue.” huana hae.

²³Haageno mage huno hie “Tamage satuage hu-mainea tina negaanagi ala vaya mainelega tamaga nayategaene hauga nayategaene siale maisaya yana nagaini yana omalenegi Nenafaa ani yana nagoa vayafe ago talo tala huno fatago hu-ma-tene.” huno hie.

²⁴Higeya tenia (10) anagaamoya ani kea haviteya ani kanolafe amaipa haviya haviya hu-na-tenae.

²⁵Yisasia “Nagaitega eho.” huno higeya ageno mage huno hie “Ma mopale ala kava vayamoya ‘Tusia ala vaya mainone.’ huya Yuta vea omainaya veafe ke amama-kiya aliya ke hu-ma-teya kava vayamogami avamete nehae.

²⁶Naa nehayanagi tamakaya ani kavala ohiho. Tamakaipina ‘Nagi hanea kanoma maigahue.’ huno hisia kanomoa aliya kanotami maino.

²⁷‘Uhagotena maigahue.’ huno hisia kanomoa mone oali aliya kanotami maino.

²⁸Nagaya ikapinagati emainoa kanoa vayamo natenea kanomona vayamoya naya huya kanaleya hu-na-tesaya yafe omenogi nagaya amaya huna aliya kanoami maisua yafe emainoanagina mukia veamoya kefo yama hageno ai-gagi-ma-tenea yapiti kalu he-ma-tesua miya atalesua yafe faligahe emainoe.”

²⁹Yisasia agaiaenema tokaeya nemaiya anagamoya Yeliko kumala ataleya ugahe hageya kasagoya veamoya amakave umaine.

³⁰Nevageana tole anaulaga asu hu-mainea kanolamogania kate mopale mainanageya “Yisasia tanakaseno nevie.” haya kea haviteana ala kegefafiti mage huana hae “Anumayamogae, Tevitina aginagomogae, taagaila kahauna hu-laato.” huana hae.

³¹Haageya umainaya veamoya kenama-kiya “Ke ohutana maio.” huya hayanagi nagoene ala kefiti keha keha hae “Anumayamogae, Tevitina aginagomogae, kahauna hulaato.” huana keha keha hae.

³²Haageno Yisasia haviteno aupaa anile heti-maineno “Naa hu-lana-tesue hugetana nehae?” huno hie.

³³Higeana “Museka nehuagi taagaya etetaa taaulaga agesue hutaa nehue.” huana hae.

³⁴Haageno Yisasia kalagi ai-na-teno anaulagale aya malegeana aupaa anaulaga neageana Yisasi akave vae.