Matiu 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Yisasia nagoene mukia vayafe avame kea mage huno hie Anumaya Koti kava yagai-mainea kumate maa hu-maine nagola sauve kanomoa agaia nafanemoa a aligahe higeno nefaa ala kave talo tala hugahe hie.

³Agaia aliya vayala hu-ma-tegahe mage huno hie “Kema hu-ma-tenoa vayatega utama hama-paisageya ani imuma ki-maloa kavela me nesae.” huno hu-ma-tegeya uya mo hama-paiyana ani vayamoya imulena omesaya ke hae.

⁴Hageno eteno nagoene alu aliya vayaa hu-ma-teno mage huno “Tamakaya utama kema hu-ma-toa veafe mage hutama hama-paiho Tamakaya haviho nagaya ve pulamakaene tali ovai afuniene ago hena mukia yana ago talo tala hu-malenogi tamakaya a alisia imule eho.” huno hie.

⁵Higeya ani aliya vayala uya mani kea mo hama-paiyanagi ani veamoya ohavisaya ke huya ataleya vageya nagoa veala hoyaamilega vageya nagoa veala mone aliyaamile vageya nagoa vayamoya ani aliya vayala amatafa huya hamayageya fali-mainae.

⁷Naa hageno sauve kanomo aipamoa haviya higeno agaia ati vayaa hu-ma-tegeya uya mo hamaeya hano hu-taleteya no kumaamia kaeya hano hu-talenae.

⁸Hu-talageno ala sauve kanomoa aliya vayaahena mage huno hama-paiye “A alisia imua ago kina talo tala hu-malogi ‘Eho.’ hunama hu-ma-toa veala amakaiamia kanale huya omesaya avamete hu-mainae.

⁹Naa hu-mainagi tamakaya kamo avayalema momakesaya veafena ‘A alisia imule eho.’ hutama hiho.” huno hie.

¹⁰Higeya aliya vayamoya anima katega momakaya veala haviya hu-mainaya veanene kanale veanene amavaleya melitalu hageno mukia sauve kanomo nafanemoma ama alisia imulela ani nopina me hiya hae.

¹¹Hageno sauve kanomoa amakegahe ani nopi haino mogeana nago kanomoa ama alisia kanalema fai-nealiya augafa kena fai-oalinegeno moge-maine.

¹²Mogeteno ani kenama fai-oalinea kanohena mage hie “Nenafugae naa higeka a alisia kanalema nefaiya kena ofaika ma nopina emainane?” huno havigegeno ani kanomoa kea ohuno maine.

¹³Afaa maigeno sauve kanomoa agaia aliya vayafe mage huno hama-paiye “Aiya ayate nofi kitetama asaga hutama haniyapinaga malaga hagayu hu-talegeno avi-neateno avekemo nehinageno agaia augafahe kalagi aino.” huno hie.

¹⁴Anumaya Kotia kasagoya veafe kea hianagi mukia veala omageya nagoke nagoke huyo-gi-malenea veaneage ehai-nefalae.

¹⁵Falasia vayamoya neuya “Hanaa huta Yisasima hisia keletila atafa hisune?” huya hu-mainae.

¹⁶Huteya keamima nehaviya vayaene Heloti vayaene Yisasite hu-ma-tageya ani vayamoya mage huya mo hae “Humave-nelina kanomogae tagaya havunana kagaya tamageage kano mainane. Kava vayaene afa vayaenefena kagesa ohavika nagoke kate tamagegeya nehuka Anumaya Koti kea hama-nepainane.

¹⁷Nagi takisi he yatela kava kanoa Sisana kanale amigahuno ifi oamisune? Na kagesa nehavipi? Taha-paiyo.” huya hae.

¹⁸Hageno Yisasia havi kavama hisaya amaku amakesa ago amaketeno “Vagala vaya mainagi amegati afa ke nehae. Naa higetama nagaila aye-navataga hutama natafa hisaya yafena nahavi-negae?

¹⁹Nagola takisima nehaya alaga monea alitama naveliho.” huno higeya aliya ave-li-mainae.

²⁰Aveligeno mage huno hie “Mani alaga monelela ta augosaene ta agiene hane?” huno hie.

²¹Higeya “Sisa augosaene agiene hane.” huya hae. Hageno Yisasia mage hie “Sisana agaia yanagi agaila amiho. Nagi Anumaya Kotina agaia yana agaila amiho.” huno hie.

²²Higeya anima kesi katema vaiyaya vayamoya anima hia kehena amamayo aigeya ataleya umainae.

²³Ani kanafina nagoa Satiusi vayamoya Yisasitega emainae. Ani Satiusi vayamoya mage nehaya vayale “Fali-mainaya vayala eteya he-otigahae.” huya nehaya vayale.

²⁴Vayalegiya Yisasina mage huya me havigae “Humave-nelina kanomogae Mosesea mage huno hu-maineane ‘Nago kanomoa nafanema oate kanomoa aama ataleno falisigenoa aganaamoa ani aala ali-tesigeno fali-mainea kanomofe huno anonaa nafanea atesie.’ huno kae-maleneane.

²⁵Sevenia (7) koganamoya tagaipina mainayanagino nepuamimoa aala ali-teneanagino nafanea oate kano maineno faligeno anile aganaamoa aamona ali-tene.

²⁶Ali-teanagi nafanea oate kano maineno faligeno anile aganaamoa eteno ali-tene. Ania hute hute hayanagi mukia sevenia (7) konagamoya ani aala ali-tayanagi nafaneamia oateya afaa fali-mainae.

²⁷Faltageno haenagalafa ani aala fali-maine.

²⁸Sevenia (7) konagamoya ani aala ali-tenayanagiya fali-mainesafitima hetisaya kanafina hana kanomo ani aala alikahie?” huya havigae.

²⁹Havigageno Yisasia mage huno hama-paiye Anumaya Koti kema kae-malenaya kene tokiya yamaaenefena havilama hutama ohaviya yafe tamakaya havi lamakesageya nehaviye.

³⁰Veamoya fali-mainesafitima hetisaya kanafina nago vemoa anea oaligahianagi amoa venena oaligahie. Ensole vaya kana huya maigahae.

³¹Fali-mainaya veama he-ti-saya kea Anumaya Kotia tamakaifema hu-mainea kea avopina mage huno hu-mainea kea hapalitama ohavinao?

³²Mage huno hu-maine “Nagaya Anumaya Kotina Apalahamunagi Aisakinagi Yekopugami Anumaya Kotiami mainoe.” huno hu-maineane. Ani anagala fali-mainayanagi “Anumaya Kotiamimona mainoe.” huno hu-maineafe amaku amamemoa ofalinegi afaa mainae huno mani kea hu-maine.

³³Higeya melitalu hu-mainaya veamoya haviteya anima hia kehena amamayo ai-mainae.

³⁴Yisasima hia kehena Satiusi vayamoya kea ohuya maiya yafe Falasia vayamoya haviteya Yisasite melitalu huya mainae.

³⁵Maiya vayamogami amunopina nagola kahegi kema havilinea kanomoa Yisasina aye-vataga hugahe mage huno havige.

³⁶“Hu-lave-nelina kanomogae hana kahegi kemo mukia kahegi kemona amakaseno uhagoteno tokiyaage kea hane?” huno havige.

³⁷Havigegeno Yisasia mage hie “Anumaya Kotia alakamofena tusiya huno kahaino. Kaguafinagatiene kagu kametetiene kahaino. Aliyama nealina himamukaene kagesama nehavina yaenena ami hano huka amio.

³⁸Mani kemoa uhagoteno amakase-mainea ke hane.

³⁹Anilema molia kemoa ani kemoma hia avamete hu-mainea kemoa mage huno hu-maine ‘Kagaikaa kaugafahema kahaisia avamete mukia veamogami amaugafahena kahaino.’ huno hu-maine.

⁴⁰Mukia Anumaya Koti amaune vayamogami kene Mosese kemoenena ani tole kefi aepaa hane.” huno hie.

⁴¹Falasia vayala melitalu hageno Yisasia mage huno hama-vige “Kalaisifena naane tamakesa nehaviye? Ta nafane maine?” huno higeya “Teviti nafane maine.” huya hae.

⁴³Hageno “Naa higeno Tevitia Avamumo hapaiya ke huno Kalaisifena ‘Anumayanimogae.’ hunoma hu-maineana ani kemo aepaahena naane hutama nehae? Tevitia mage huno hu-maineane

⁴⁴Anumaya Kotia Anumayanimofena mage huno hie ‘Tamaga nayatega, ala vaya mainalega hanea siale emainesanagena kame vayakaa kaiyafinaga ama-tesugeya kagaifena ‘Ago tagasane.’ huya hugahae.’ huno kae-maleneane.

⁴⁵Tevitia Kalaisifena ‘Anumayania mainane.’ huno hu-maineanagi naa higeno Tevitia haenagama atesia aginagomofena ‘Anumayania mainane.’ huno hu-maineane?” huno hama-vi-ge.

⁴⁶Hama-vi-geanagi nago kanomoa kenonaa nago kea ohunegi ani kanaleti aepa heya kolia huya nago yafena haviokenae.