1Yisasia mukia alitalu hu-mainaya veanea amaketeno agoyafi haino mopale mainegeya agaienema tokaeya nemaiya anagamoya Yisasitega emainae.
2Ageno Yisasia avayafiti mage huno hie.
3Mukia yaamima omalenea veamoya “Tagupi nagoa kanale yana omaleanagita tagaitia kanale kavala ohugahunagi Anumaya Kotia taya hisie.” huya hisaya veamogamina Anumaya Kotia amakaila kava yagai-ma-tegahigi ani yafena muse hutama maiho.
4Hamaumana halesigeya hamau huya nemaisaya veamoya Anumaya Kotia amaya huno amaipa falu hisia yana amamisia yafena muse huya maisae.
5Amaugafama aliya nohaiya veamogamina Anumaya Kotia haenagaa mukia mopa amamisia yafena muse huya maisae.
6Anumaya Kotia fatago hu-mainea kavafena “Nelahaigeno ani yafena laga nele.” huya hisaya veamoya Anumaya Kotia amamu hisigeya maisaya fatago kavama amamisia yafe muse huya maisae.
7Mukia veamoya nagoa neamafugamife kalagi ai-mateya hamau hu-neamatesaya veamogamina Anumaya Kotia ania huno kalagi aino hauna hu-matesia yafena huya maisae.
8Mukia veamoya Anumaya Koti kema akave malesaya yafena tole amakesama ohavinaya veamoya Anumaya Kotima agesaya yafena muse huya maisae.
9Neamafugamifena “Nagoke tamaku tamakesale maiho.” huya nehisaya veamogamina Anumaya Kotia “Nagai nafaneyaga mainae.” huno hu-matesia yafena muse huya maisae.
10Nagoa veamoya fatagoma huya mainesageya nagoa veamoya amaipa kafa he-mateya ali-haviyama hu-ma-tesageya maisayana Anumaya Kotia amakaima kava yagai-ma-tenea yafena muse huya maisae.
11Tamakaya nakavema nemalageya tamaketeya kamuge hu-lama-teya ali-haviya hu-nela-mateya “Ma kavala havi kava nehae.” huya havigema hu-lama-tesagetama afaa muse nehutama maiho.
12Aniama hu-lama-taya kavala nayona Anumaya Koti amaune vayamogamina ania hu-ma-tenayane. Ani kavama hu-lama-tesaya kanafina ikapinaga anonaa kasagoya yayaga alisaya yafena tamaipamoa kanale nehinagetama muse hiho.
13Tamakaya ma mopale veamogamina hagama nehamaiya sole kana hutama mainae. Solemoa hagama nehia yamaama hano hisigetama hanaa hutama hagama nehia yamaa ali falote hugahae? Hagama nehia yamaamoa ago yagu yaguma hisiana afa ya kana hinageya ani Solea veamoya faitega ai-tagu-fe-talesageya amaiyaleti ute ete huya aye-lata-pegahae.
14Tamakaya mukia ma mopama hanea kotega kani kana veane mainae. Ala kumama agoyafima hanesiana fala okigahianagiya mukia veamoya agegahae.
15Nagoa veamoya lamua hanagaliya susufanefinaga aiso hu-nomalagi nopinaga aye-halesigeya veamoya agesayafe ani lamua sipale nemalae.
16Naa hu-mainegi tamakaya ani kava hutama lamumoa aye-hale-ma-tea kava hutama Yisasi kea hama-paitama kanale kavala veamogami amaule hisageya ageteya ikapinaga mainea Nelamafa agia alisaga hugahae.
17Tamakaya ma lamakesa ohaviho “Nayona Mosese kahegi kene amaune vayamoya hu-mainaya kene Yisasia ali-talegahe emaine.” hutama ohiho. Nagaya ani yayaga alina oatalegahugi ani kea ali falote hisugetama “Tamage nehie.” hutama hisayafe emainoe.
18Nagaya tamagelafa huna tamaha-nepauve ma mopaene ikaene fanane hugaanagi kahegi kefi mukia osi osi oagemo avoyaga afaa hanegahie. Nagoke ya kanoagela fanane ohugahigi mukiama hu-mainaya kemoa falote huno tamage-lafa hugahie.
19Tamage-lafa hu-mainayafe nagoa veamoya ani kahegi kea osi kanoa “Akavela omalegahunema.” huya alu veamogamife “Ania hiho.” huya hisaya veamoya Anumaya Kotia kava yagai-mainea kumatela osi nafane kana veane maigahagi nagoa veamoya mukia kahegi kema ali hipoya huya “Ma kava hiho.” huya hama-paisayana Anumaya Kotia kava yagai-mainea kumatela ala huno agase-mainea amakiene veane maigahae.
20Nagaya tamagelafa huna tamaha-nepauve Falasia vayaene kahegi kema havilinaya anagaene hu-mainaya fatago kavala tamakaya agasetama tusia kanale hu-mainea fatago kavama ohisayana amuha ohunayanagino tokiyatamia omaleneanagitama Anumaya Kotia kava yagai-mainea kumatela haitama omaigahae.
21Tamakaya ago havilinae nayoma mainaya veamogamina mage huya hama-pai-mainayane “Veala hamaetama fali-oamateho. Veama haemaetama fali-matesayana kaiyeke hu-lama-tegahae.” huya hu-mainayane.
22Nagi nagaya menia tamaha-nepauve nagoa veamoya neamafufema amaipa kafa hetesayana Anumaya Kotia kaiyeke hu-ma-tegahie. Nagoa veamoya neamafufema “Havi kavakeya nehana kano mainane.” huya hisayana ala kaiyekele he-tigahae. Nagoa veamoya neamafufema “Kagaya aifonafo kano mainane.” huya hisayana hani yapima tegelege nehia atafi ugahae.
23Naa nehaya yafe tamakaya Anumaya Kotina nago yama amigahena mono nopi haitama mainetama “Veha nenafuna haviya hu-tenoanagino aipamoa haviya nehie.” huka kagesa haviteka Anumaya Kotina amisana yana anile neataleka negafutega tanaipa mo-li-falu hutetana eteka esanaamoga amisana yana Anumaya Kotina memio.
25Nago kanomoa “Havi kava huna-tananagina kaiyekea hu-gategahe nehue.” huno kavalenoma vinagetana neutana “Nenafuga kaipa falu hisia yana kamigahue.” huka hapaiyo. Ania ohisanana kavaleno kaiyekema hu-gatesia kanomote vinageno haviteno ati kanomo ayapi katesigeno kavaleno nofila mo hu-gategahie.
26Nofila mo hu-gategahigi tamage tamaha-nepauve kaiyekema hu-gatenea kanomoma “Mone namio.” huno hu-mainesia monema oaminesanana nofipitila ataleka omegane huno hu-maine.
27Tamakaya nayo kea ago havimainae mage huno hu-maineane “Kumai he kavala ohiho.” huno hu-maineane.
28Nage hu-maineanagi nagaya menia tamaha-nepauve nagoa veamoya nago amona aulagafiti age haye huno “Ani amofena naa hu-ga-tegahue.” huno aguafinaga havino hayema hiana ani atela ago kumai kava hu-maine.
29Tamaga kaiyaga tamaulagamoma agea yafema kefo kavama hisaya tamaku tamakesa tamamisigetama ani tamaulaga ali fayitama atalesagenoa nago tamaugafa atupaa omalenea yafe kanaleya hutama maigahae. Aniama ohinutamahena muki tamaugafa hanimo aguafi tegelege nehia atafi hagayu hu-lama-talegahie.
30Tamaga tamayamoma tamavayu huno kefo kava hisaya tamaku tamakesama tamamisigetama ani tamayana he-fakalitama ataleho. Naafene? Nago tamaugafa atupaa omalenea yafe kanaleya hutama maigahae. Aniama ohinutamahena muki tamaugafa hanimo aguafi tegelege nehia atafi hagayu hu-lama-talegahie.
31Nayona mani kea hagetama havimainae. “Nagoa vayamoyama aamima hu-tesayana ani vayamoya aamimofena ‘Ago hu-negatoe.’ huno avona kaeno amino.” huno hu-maineane.
32Hu-maineanagi nagaya menia tamaha-nepauve aamoma kumai ohenesigeno anauamoma atalesigeno ani amona alino kumai nehia a kana hu-tene. Nago kanomoa anima atalenea ama aliteana ani kanomoene kumai he yana nehie.
33Nago kea nayoma hama-pai-mainaya kea ago havimainagi naa hu-maine “Kagaya ‘Anumayamo aufina tamage nehuanagina naa hugahue.’ huka hisanana fatago huka ani kavala huo.” huno hu-maineane.
34Hu-maineanagi nagaya tamaha-nepauve tamakaya “Anumaya Koti aufina tamage nehue.” hutama ohiho. Tamakaya “Ikamo agile tamage nehue.” hutama ohiho. Ikapinaga Anumaya Kotia kava yagai-mainea kuma hanegetama agaife nehae.
35Tamakaya “Mopamo agile tamage nehue.” hutama ohiho. Ani mopalega Anumaya Kotia aiya hayo hu-maleno mainea mopa hane. Tamakaya “Yelusalemu kumamo agle tamage nehue.” hutama ohiho. Ani Yelusalemu kumala ala sauvetimoa Anumaya Koti kava yagai-mainea kuma hane.
36Tamakaya “Nanuteti huna lamage nehue.” hutama ohiho. Tamakaya tamayolagefahena “Anupa nayolegefaene tuhi nayolegefaene falote hino.” hutama hisaya tokiyatamia omalegi ani kea ohiho.
37“E,” hinutamahena ani keage hiho. “Aao.” hinutamahena ani keage hiho. Nago kenema hisayana Kefo Avamumoa ani kea ali falote nehie.
38Nayona mani kea hagetama ago havimainagi “Nago kanomoa kaulagama ai-lagatisigekahena ani kanomo aulaga anonaa ai-lagatio. Kavema ai-halalima hisigekahena anonaa agaila ania huka avela ai-halali huo.” huno hu-maineane.
39Hu-maineanagi nagaya tamaha-nepauve nago kanomoa havi kavama hu-ga-tesigekahena kayona oamio. Nago kanomoa kagalamesalema kaiko-lisigekahena nago kaiyagakaa mai-yahae hugeno kaiko-lino.
40Nago kanomoma “Haviya hu-natea kanoe.” huno kaiyekema hu-gateno “Anonaa kagaia siota namio.” huno hisigekahena ala yasi siotakaene amio.
41Nago kava kanomoa tokiyaage ke huno “Afenoyania nago kilomita alika vuo.” huno hisigekahena ani kilomita mogaseka nagoene tole kilomita alika vuo.
42Nago kanomoma “Nago yaka namio.” hunoma hisigekahena afaa hagayu huka amio. Nago kanomoma “Namisanagena yoka alitena etena kamigahugi namio.” huno hisigekahena afaa amio.
43Nayoma hama-pai-mainaya kemoa ago havimainagi “Kumatamile mainesaya nelama-fugamifena tamahau tamayamopafi tamahainagetama kame vayatamihena tamaipa kafa he-mateho.” huya hu-mainayane.
44Hu-mainayanagi nagaya menia tamaha-nepauve “Kame veatamimofena tamahau tamayamopafi tamahaino. Haviya hu-nelamataya veamogamina ‘Amaya huo.’ hutama Anumayamotega havigo.”
45Ani kavama hisayana ikapinaga mainea Nelamafana nafanea maigahae. Anumaya Kotia kanale veaneleene havi veaneleene yagemona hu-tegeno nago avamete huno aye-hale-matene. Anumaya Kotia fatago nehaya veaneleene havi kava nehaya veaneleene kola hu-tegeno nago avamete huno kola neaiye.
46Veamoya tamakaifema hamau amayamopafi neha-mainagetamahena tamakaya ania hutama amakaifema tamahaisiana ani kavamoa afa yanagino anonatamia oaligahae. Kefo kava nehuya amaugafaleti takisi mone nealiya vayamoya ania kavala nehae.
47Nelamafuenekeyama kea kea nehisaya yana afa yanagi. Yisasi ke ohavinaya veamoya ania kavala nehae. Kame vayatamimoene kea kea hiho.
48Ikapinaga Nelamafaa ala huno kanale kavakeya hu-maineanagitama tamakaya ania augafa veane mainetama ala hutama kanale kavakeya nehutama maiho.
