Matiu 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ani yupa nagoa Falasia vayaene kahegi kema havilinaya anagaene Yelusalemuti Yisasite eya mage huya hae “Naa higeya kagaienema tokaeya nemaiya anagamoya taginagomogami kea ali-tagaeya kavema negahena amayana sese nohae?” huya havigae.

³Hageno Yisasia kenonaamia mage hie Naa higetama tamakinagomogami auavala akavema malaya yafe Anumaya Koti kahegi kea ago neatagayae?

⁴Anumaya Kotia agaia autamafina mage huno hu-maineane. “Tamakaya itatami afotamimogami amakia alisaga nehutama keamia veganokano ohutama amaiyaafinaga maiho. Nago kanomoga itakafokamona kamugema vaitenukahena faligane.” huno hu-maineane.

⁵Hu-maineanagi tamakaya mage hutama nehae “Nago kanomoa itaafoamogani anaya hisia monema hanesigenoma itaafoamoganima anaya ohinunoa mage huno hisie ‘Ani monea Anumaya Kotina amisua yane huna hu-mainoe.’ huno hinunoa nefana aya huno agia alisaga ohisie.” hutama nehae. Ani ke nehutama tamakinagomogami auavala akavema malaya yafe “Anumaya Koti kea afa ya kana nehie.” nehutama alitama neatagayae.

⁷Tamakaya vagala vaya mainae. Aisaiyaa Anumaya Koti aune kanomoa tamakaifena tamage huno Anumaya Koti autamafina mage huno hu-maineane “Ani nofi veamoya amavayaleti nagai nagia alisaga nehagi amakuamoa aluale hanegeya ani kavala nehae.

⁹Ma mopafi veamoya malenaya kahegi kehena ‘Mamona Anumaya Koti ke hanegi akave maleho.’ huya nehayanagi nagai nagia alisaga nehayanagi afa kava maiya nehae.” huno kae-maleneane.

¹⁰Yisasia agaite esae huno kasagoya veamogamifena ke higeya ageno mage huno hie “Tamakaya mani kea havilama hutama haviho.

¹¹Nagola tamavayafima nesaya yamoa tamakuamona alino oniyaagela ohugahigi tamavayafitima hati-lavisia yamo ali-falote hisigeno tamakuamoa oniyaagela hugahie.” huno hu-maine.

¹²Higeya agaiaenema tokaeya nemaiya anagamoya Yisasife mage huya hae “Falasia vayamoya ani kea haviteya amaipa kafa he-gataya kea ago havimainano?” huya hae.

¹³Hageno Yisasia mage huno hama-paiye “Ikapinaga mainea Nenafaa okalinesia yana agaia mevakaino hafuyaene tagasi hugahie.

¹⁴Tamakaya mani vayafena tamakesa ohaviho. Amaulaga asu hu-mainea vaya mainae. Nagoma aulaga asu hu-mainea kanomoa nago aulaga asu hu-mainea afaluamona avaleno vaiyesiana tolemogania komufi asaga hu-lavigae.” huno hie.

¹⁵Higeno Pitaa Yisasife mage hie “Kagaya mani avame kemo aepaa hugeta havimano.” huno hie.

¹⁶Higeno Yisasia mage huno hie “Tamakaya meni kanaene havilama ohunetama nehao?

¹⁷Tamakaya ohavinao? Mukia yama tamavayafi nageno tamakuafina ounogi tamaipafike taviteno haenagaa aifayolagafi tavino afa ya kana nehie.

¹⁸Afa ya kana nehianagi nago yana tamavayafitima hati-lavia kemoa tamakupiti falote huno tamakuamona alino oniyaagela nehie.

¹⁹Tamakuafinagati efalote hia yana maa huno falote nehie kanale ohu tagu tagesa nehavuna yaene vaya he-fali kavaene alu kanomo ane avayu hu yaene ane munanele kumai he yaene musufaya hu yaene havige hu-ma-te yaene kamuge vai-ma-te yaene taguafitila ali falote nehie.

²⁰Naama haya yafe tamakupina oniyaagela tamahau-mainegi veamoya amayama sese ohuya kavema naya yamoa amakupina oniyaagela ohugahie.” huno hu-maine.

²¹Yisasia nemaiya kumala ataleno Taiya kotegaene Saitoni kotegaene umaine.

²²Umainegeno nagola anile mainea Kenani amoa, Yuta vea omainea amoa, agaife ke huno mage me hie “Ala kanomogae, Tevitina aginagomoga, nagaila kahau hunato. Kefo Avamumoa nagai munala aguafi faleno maineno tusi havi kava hu-nea-te.” huno hie.

²³Higeno Yisasia nagola osi ke kanoa ohunegi agaiaenema tokaeya nemaiya anagamoya agaife mage me hae “Ani amoa tagai takave neeno tusiya huno keha keha nehuno tutu nehigi kagaya hu-tegeno vino.” huya hae.

²⁴Yisasia mage hie “Isalelima vayagi-mainea sipi sipileke Anumaya Kotia hu-na-tegena emainoe.” huno hie.

²⁵Higeno ani amoa Yisasi aiyafi aleya meye-maineno mage huno hie “Ala kanomogae naya huo.” huno hie.

²⁶Higeno Yisasia mage huno hie “Havigu nafaneyagamogami kave hama-faleya kalamogami amamisagi nagaya Isaleli veala amatalena alu vayane amaya hisuana haviya hugahie.” huno hie.

²⁷Higeno ani amoa mage huno hie “Ala kanomogae tamage nehananagi kalamogamina neamafaya nenageya kalamoya sipaletima asaga hu-lavia atupaa yogiya nenae. Kagaya ani kava huka nagaya Isaleli a omainogi osia nahamao.” huno hie.

²⁸Higeno Yisasia mage hie “Amogae tusiya huka nagaifena havika kagupi maleka kametiti hanafe nahavigana yana kamigahue.” huno nehigeno ani kana kanoale munaamona kanale hu-tene.

²⁹Yisasia ani kumala ataleno Kalili ti kotumo agegayalega uteno nago agoyafi haino mopale maine.

³⁰Mainegeya kasagoya veala agaite melitalu nehuya aiya avayu hu-mainea veanene aiya aya haviya hu-mainea veanene amaulaga asu hu-mainea veanene age tagane-mai veanene nagoa kali veanene amavaleya Yisasina aiyafi mematageno alino kanale hu-ma-tene.

³¹Kanale hu-ma-tegeya mukia veala agayana higeya tusia amamayo ai-mainae. Age tagane-mai veamoya kaiyeke hageya amaiya amayamo kayagi-mai veamogamina amaiya amayamoa kanale higeya amaiya haviya hu-mainea veamogami amaiyamoa kanale higeya nevageya amaulaga asu hu-mainea veamogami amaulagamoa kanale higeya amaulaga age-mainae. Naama haya yate ageteya Isaleli veamogami Anumaya Koti agia alisaga hu-mainae.

³²Yisasia agaiaenema tokaeya nemaiya anagafe ke higeya ageno mage hie “Mani veamoya talia (3) yupa nagaiene mainageno nesaya kaveamia omalea yafe nahau hu-neama-toe. Havigu amatalesugeya katega nevisageno amakatesigeya amaugetunatu huya takatiyafena nonahaiye.” huno hie.

³³Higeya agaiaenema tokaeya nemaiya anagamoya mage huya hapaiye “Mani kotega vaya omai kotegagi hanateti kosa hesia maya alita ani veanea amamisune?” huya havigae.

³⁴Hageno Yisasia mage huno hama-vige “Tamakaya namagi maya hane?” huno higeya mage hae “Tagaya sevenia (7) mayaage hanegi nagola osi noyame kanoa hane.” huya hapaiye.

³⁵Hageno Yisasia mukia veafena “Mopale maiho.” huno hama-paigeya mopale mainae.

³⁶Mopale mainageno Yisasia ani sevenia (7) mayaene noyamene alino Anumayamotega muse huno havigeteno kolite kolite huno agaiaenema tokaeya nemaiya anagala amamigeya mukia veamogamina amaminae.

³⁷Amamigeya mukia veala nageno amamu higeya atalaya maya atupayaga agaiaenema tokaeya nemaiya anagamoya alitalu huteya sevenia (7) kupi ai-hava-te-mainae.

³⁸Ani kavema ne-mainaya venenea fo tausenia (4,000) vemoya ne-mainae. Nafaneyagaamiene aneyagaamiene nayanagi ohapalinae.

³⁹Netageno Yisasia hu-mategeya utageno agaia tipi kalefi haisaga hu-maino Magatana kaiyaga umaine.