Matiu 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Nagi Yisasia agoyalegati tavigeya kasagoya veala akave umainae.

²Akave nevageno nagola fugitayamo augafa alino hayagino atalako hu-mainea kanoa Yisasite eno ape huno mage huno havige “Anumayamoga kahaisigekahena nagaila alika hilato hu-natateasine.” huno hu-maine.

³Higeno Yisasia ayana hayo huno augafale avate hu-lineno mage huno hie “Nagaya nahaigena kaugafamoa menia kanale hino huna nehue.” huno higeno anile aupaa kalia hano hu-tene.

⁴Yisasia mage huno hapaiye “Ali hilato hu-ga-toa yafena nago kanoa haopaika mono nopi kava kanomote uka kalikaama ali kanale hu-ga-toa kema mukia veamoya havinuyahena kagaya mono nopi kava kanomoa kaugafa kamota huno kage-tesigeka kaugafama ali hilato hu-ga-toa yafena Mosesema ‘Ma yama Anumaya Kotina amio.’ huno hu-mainea yana Anumaya Kotitega atalo.” huno tokiyaage ke hapaiye.

⁵Yisasia Kapaneamu uvayi higeno nagola Lomu ati vayate kava kanomoa mage mo havige “Anumayamoga naya hisano? Aliya kanonimoa muki augafa avayu hu-lavigeno tusi agata aigeno nopi nemaiye.” huno hie.

⁷Higeno Yisasia mage huno hie “Nagaya kalia mo alina kanale hu-tegahue.” huno hie.

⁸Higeno Lomu ati vayate kava kanomoa mage hie “Anumayamoga nagaya kanale ohunoa kanomoni nopi esanana okategahigi afaa malegati aliya kanonimo kaliahena kea hu-tesanageno kalia falu hu-tegahie.

⁹Nagaya kava kano mainoe. Nagaima kava yagai-natenea kanoa anale nagaseno maigena nagaya ania huna nagoa ati vayatela kava huna mainoe. Nago kanomofema ‘Vuoma.’ hugenoa umaine. ‘Enoma.’ hugenoa emaine. Aliya kanonihe ‘Naa huo.’ hugenoa ania hu-maine.” huno hie.

¹⁰Yisasia ani kea haviteno agesa kumoa tusiya huteno akavema nevaya veamogamifena mage huno hie “Tamage tamaha-nepauve ma kanomoa tusiya huno nagaifena havino agupi maleno ametitia hu-maine. Ma kanomoma hia ya huya nagaifema haviya amakupi maleya ametiti hu-mainaya veala mukia Yuta veane mainaya kumatela oagenoe.” huno hie.

¹¹Tamaha-nepauve mukia veamoya yagemoma tavi nefalelegatiene evayi nehilegatiene Anumaya Kotima kava yagai-mainea kumatela taginagomoya Apalahamuene Aisakiene Yekopuene siale mo maineya kavela negahae.

¹²Negahagi nagoa Yuta veamogamina nayoma Anumaya Kotia “Kava yagaisua kumate maigahae.” huno hu-maineanagi agaifema haviya amakupi omalaya yafe Anumaya Kotia amavaleno hani yapi amatalesigeya anifi avi neateya amave kemoa hugahae huno hie.

¹³Yisasia Lomu ati vayate kava kanomofe mage huno hie “Nokalega eteka vuo. Aliya kanokama ali falu hu-tesua kea havika kagupi maleka kametiti hana kea hu-ga-tegahue.” huno higeno ani kema hia kana kanoale ani aliya kanoa kanale hu-tene.

¹⁴Yisasia Pita nopinaga umaineno ageana Pitana aamona itaamo alekanoa tusia amukonako kali alino mainegeno moge-maine.

¹⁵Mogeteno ayate avate nehigeno amuko-nako kaliamoa agola kanale hu-tetegeno ani amoa hetino kavela kaeno amamine.

¹⁶Ani unena mukia ani kumate veamoya vayaamima Kefo Avamumo amakusafima mainea veala amavaleya Yisasite ageno Yisasia Kefo Avamumogamifena hu-mategeya amataleya vageno mukia kali veala alino kanale hu-matene.

¹⁷Naa hu-maineafe nayona Anumaya Koti aune kanomoa, Aisaiyaa hu-mainea kemoa agola falote huno tamage hie. Mage huno hu-maineane “Agaya agaia kalima nealuna yana ali-talene. Taugafamoa fulu fuluma nehuno akavima nohia yaene ago ali-talene.” huno hu-maineane.

¹⁸Kasagoya veamoya Yisasite meye-kove hageno Yisasia agaiaene tokaeya nemaiya anagafe mage huno hie “Tikotumona atu faliga vigetao.” huno higeya umainae.

¹⁹Umainageno nagola kahegi kema havilinea kanomoa Yisasite eno mage huno hie “Hu-mave-lina kanomoga mukia kumate visanana nagaya kakave ugahue.” huno hie.

²⁰Higeno Yisasia kenonaa mage huno hapaiye “Kepu yagamoya faesaya komuamia mopafinaga hanegi namamogamina noamia haneanagi ikapinagati emainoa kanoa vayamo natenea kanomona faesua nonia omalene.” huno hie.

²¹Nagola agai kema nehavia kanomoa mage huno hie “Anumayanimogae nenafana falisigena alina he-vai-tetena kakavela ugahue.” huno hie.

²²Higeno Yisasia mage huno kenonaa hapaiye “Atalo nagai kea ohavinesaya veala amaku amamemoa fali-mainaya veamoya falia kanomona aliya he-vai-tegahae amakaiami yanagi kagaya nakave eno.” huno hu-maine.

²³Yisasia tipi kalefi haisaga hu-maigeya agaiene tokaeya nemaiya anagamoya agaiene umainae.

²⁴Nevageno aupaa anileti ala yasimoa nealigeno timoa ai-galato huno ani tipi kalefi haiyanagi Yisasia aufaeno maine.

²⁵Faeno mainegeya agaiene tokaeya nemaiya anagamoya agafa huya mage huya hae “Kava kanomogae kava kanomogae tagaya ti nakaita falisuna kava nehunagi Anumayamoga hetika taugafa ali-gatio.” huya hae.

²⁶Hageno mage huno hama-vi-ge “Naa higetama kolia nehae? Nagaifena havitama tamakupi maletama tamametitima nehaya yamoa aupa nehio?” huno huteno hetino ani limofeene yasimofeene tokiyaage ke huno “Taga huo.” huno higeana alava hu-mainae.

²⁷Alava haageya mukiamoya amamayoma aiya yafena mage hae “Mani kanoa hana augafa kano mainegeno timoene yasimoene kea haviteya akave nemalae?” huya hu-mainae.

²⁸Ala tikotuna takaeya ame kaiyaga agegayamona Kelasasa veane mainalega uvayi hae. Uvayi hageana tole kanolana Kefo Avamuyaga anakuafi mainea kanolana matimatipinagati Yisasite emainae. Ani kanolatana tusi aifonafo nehaa yafe veamoya koli huya ani katela novayane.

²⁹Ovageana ani kanolatana ala kefiti mage huana hae “Anumaya Kotina neamogae naa hu-laategahe neane? Taagata aisia kanamoa falote ohunegi taagata aisia kava hu-laategahe neano?”

³⁰Haageya kasagoya afuyagamoya aluale maineya kavela nenae.

³¹Nenageya Kefo Avamumoya Yisasife mage huya hu-mainae “Anakusafinagatima hu-latesanana ani afuyagamo amakuafi hu-lategeta vamano.” huya havigae.

³²Havigageno Yisasia “Anifi viho.” huno higeya ani Kefo Avamumoya ani kanolatamogani anakuafitila hati-laviya afuyagamogami amakupi hai-falageya ani afuyagamoya amaiya-yeya nagola aulufi kapi taviteya tipi asaga hu-laviya ti nakaiya fali hano hu-mainae.

³³Fali hano hageya ani afuyagale kava vayamoya ageteya faleya ala kumate mainaya veamogamife “Kefo Avamumoya anakuafi mainea kanolatamoganina na kava na kava hu-nateno higeta neone.” huya hama-pai-mainae.

³⁴Hageya ani ala kumatema mainaya veamoya ani ya agegahe eya Yisasina megeteya “Tagai kumala neataleka alu kumate vuo.” huya hu-mainae.