Matiu 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Anumaya Kotina Alu Aotake Avamuamoa Yisasina veane omai kame kotega avaleno vigeno Satania Yisasife “Havi kava huo.” huno aye-vataga hu-maine.

²Umaiyana fotia (40) yupagefa felugaene kegeene kavela oneno maigeno tusia agate-maine.

³Agategeno Satania agaite uvayi huno mage hie “Kagaya Anumaya Koti nafanema mainenukahena ma yafayaga hapaigeno maya hapaeno.” huno hie.

⁴Higeno Yisasia mage huno hie Anumaya Koti avopi kemoa mage huno hu-maineane “Veamoya mayaagema nesayana kanaleya huya omaigahagi mukia Anumaya Kotima hu-mainea kene haviya nenesageno amaku nafanemoa kanaleya huno maigahie. huno hu-maineane.” huno hapaiye.

⁵Satania Yisasina Yelusalemu tusia ala kumate avaleno ala mono nomo agotofule motene.

⁶Moteteno mage huno hapaiye “Kagaya Anumaya Koti nafanema mainenukahena ma nomo agotofuleti mopafi asaga hulavigena agano. Anumaya Koti avopiti kemoa mage hu-maineane ‘Anumaya Kotia ensole vayaahe ‘Kava hiho.’ huno hu-ma-tesigeya amayateti kavalesaga hu-lisageka tavisanageno yafatela kaiyamona aye kofa ohugahie huno hu-maineane.” huno hie.

⁷Higeno Yisasia kenonaa mage huno hie “Nagoene Anumaya Koti avopina mage huno kae-maleneane ‘Anumaya Kotikamona afa yafena ‘Tokiya kava huo.’ huka aye-vataga ohuo.’ huno hu-maineane.” huno hie.

⁸Higeno Satania Yisasina avaleno nago ala agoyafi haiteno mukia ma mopafima hanea ala kumayagaene afenoyamaaene ave-li-maine.

⁹Aveliteno Yisasife mage huno hie “Kagaya nagaifema ‘Tusia ala kano mainananagina kagai kagi alisaga nehue.’ huka kagesama havi namika mopafi kaleyama ayesanagenahena mukia ani kumayagaene afenoyaene kava yagaisanafe kamino.” huno hie.

¹⁰Higeno Yisasia mage huno hie Sataniga mai haleka amulega vuo. Anumaya Koti avopi kae-malenaya kemoa mage huno hu-maineane “Anumaya Kotikamona akaiagefe ‘Tusia ala kano maine.’ huka kagesa havi havi huka agai agia alisaga huka agai aliyamaage alio huno hu-maineane.” huno hapai-maine.

¹¹Higeno Satania anile ataleno vigeno ensole anagamoya Yisasina meya huya kava hu-tenae.

¹²Yisasia “Yonina nofi hu-tenae.” huya haya kea ago haviteno Kalili kotega umaine.

¹³Viana Nasaletia ataleno Kapaneamu umaine. Ani kumala Kalili ti kotumona agegayale haneanagino Sepuluni nofi veamogamiene Napatali veamogamiene koamia haneane.

¹⁴Nayona Anumaya Kotia aune kanoamona, Aisaya avayafiti mage huno hu-maineane

¹⁵“Sepuluni nofi veamogamiene Napatali veamogamiene mainesaya kaiyaga ala tikotu visaya katega haneanagiya Yotani lina takaeya vaaya kotega, Kalilie, Yuta veane omainaya veamoya nemaiya kumale.

¹⁶Ani kotega mukia veamoya hani yapi mainayanagino menima aye-hale-matesia yana age-mainae. Mukia veamoya afaa maineya faligahe hayanagi Anumaya Koti kemoa ago aye-vasa hu-matene.” huno hu-maineane.

¹⁷Ani yupa Yisasia aepa heno Anumaya Koti kanale mono kea hu-haleno hama-pai-maine. Mage huno hie “Ikapinagati Anumaya Koti kava yagaisia yana aupaa evayi hugahigi tamakaya tamakua aiyahae hutama kefo yatamia ataleho.” huno hu-maine.

¹⁸Kalili ti kotumo agegayalega neuno Saimonina, nago agia Pitae, aganaamo agia Etaluene anakeana noyame kuya nehaa kanolatana maineana ala kukonogo hagayu huana ti kotupi nemalaageno anake-maine.

¹⁹Anaketeno Yisasia mage huno hana-paiye “Nakave eo. Nakave eagena noyame kuyama haa avamete huna veane amavalesaa auava yana tanavelino.” huno hie.

²⁰Higeana aupaa kukonogoania neataleana Yisasi akave umainae.

²¹Vaageno Yisasia anakeana Sepetina netalamaamoagani Yemesigani Yonigania tipi kalefi neanafaene maiana kukonogo nefakaniageno Yisasia momaketeno anakaife ke hie.

²²Ke higeana aupaa Sepetia neanafaene tipi kalene neataleana akave umainae.

²³Yisasia mukia Kalili kotega ute ete huno mono nopi Anumaya Koti kava yagai-latesia kanale mono kea mo hama-nepaino mukia kaliamima hanea veanene mukia veamogami amaugafama ali haviya nehia yana alino kanale hu-ma-tene.

²⁴Alino kanalema hu-ma-tea avagemoa mukia Silia kotega ute ete higeya haviteya mukia veamoya kalima aliya veanene alu kali alu kalima aligeno amaugafa amakata neaiya veanene Satani Avamuma amakuafi mainea veanene mananiya neamakia kali veanene amaiya amaya avayu hu-lavi-mainea veanene amavaleya Yisasite ageno alino kanale hu-ma-tene.

²⁵Alino kanale hu-ma-tegeya kasagoya veanea Kalilitiene naya-tolea kumayagaletiene Yelusalemutiene Yutiatiene alulega mainaya veanea Yotani tina takaeya Yisasina akave umainae.