1Jisasame baanya disaipele kingi ita mende-kisa dee lapoma dutupa epena latala, enjele koo watao pyapengepi, endakali yaina tata tatame pyapaepi, papa tambotaepi dupa mee injisepengepi, pupu lapae doko dokaita-kisa setea.
2Aposele kingi ita mende-kisa dee lapoma dutupanya kenge dupa datupa: wambao doko Saimone kenge mende Pita lengema dokopi, baanya kaiminingi Endutupi, Sepete ikiningi Jemesapi, baanya kaiminingi Jonepi, Pilipapi, Batolomyupi, Tomasapa takisa nyingi akali Matyupi, Aopiasa ikiningi Jemesapi, Tatiasapa Saimonekenge mende Kenanayosa lengema dokopi, Jisasa enge nyiamo akali Jutasa Isaketiote dokopi dutupa.
5Jisasame akali kingi ita mende-kisa dee lapoma dutupa kalai pyaa pena lao pituu dapa pyepape lea: “Nyakamame endakali tata waka dupanya yuusa napupape. Dee Samatiamanya yuu taono mendenya napupapeaka.
6Dopa napinya Isataele tata dupanya mendapua mena sipisipi alu petae joo kalyamino dupanya pupape.
7Pupala, ‘Kaitinya Katenge dokome isingi doko tengesa petelyamona,’ lao pii lamaiyepape.
8Endakali yaina pyapae dupa saka nyalapape. Kumapae dupa lenge tasalapape. Kopetali dupa mee injisalapape. Enjele koo dupa watao pyakamaiyepape. Nyakamame mee nyepelyamino dokonya meaka pyakamaiyepape.
9Nyakamame muni mendaipi mende manja nayao mee pupape.
10Kaitini paanya nokaina mende manja nayao, yonge pee laponge doko namandyuu, moko pee napyoo, pangali naminao pupape. Kalai pingi akali mende neepi opale kapa pena lao baa maipenge.
11“Nyakama yuu taono andake mendenya tamopi yakane mendenya tamopi pupala endakali mendepa nyakama kapa pao awapa katapengepe lao kutao kanjepape. Kutao kandatala baapaka tole katapala paanya pituu ongopa baa yakinatala pupape.
12Nyakamame anda dokonya kolandao pituu dokonya palenge endakali dupa kandao mona lyuu lao petena lamaiyepape.
13Endakali dupame nyakama taeme ipamini lamo lao lanyetamino kandao doko, nyakamanya mona lyuu lasingi pii epe doko dupa-kisa seta. Dopa napitamino kandao doko, nyakama tange-kisa pilyeta.
14Dee andaka mendenya tamopi yuu taono mendenya tamopi nyakama taeme ipamini lamo lao lanyala nayawapi, nyakamame pii lamaitamino dupa nasowapi piami kandeno doko, nyakamame yuu doko yakinatala pupape. Pao pituu nyakamanya mokonya kuni kungumapi patatamo dupa lyanda lanya nepalapape.
15Goteme endakali dupa mokosetamo gii dokopa yuu taono dokonya kenda pipae ipatamo dokome yuu taono Sotoma Gomotapanya kenda pipae ipatamo doko ita minatana lao nambame nyakama kiningi langilyona,” Jisasame lea.
16“Kandeleno! Nambame nyakama mena sipisipi jepae dupa yana kapua dupanya kainanya pupa lelyo. Dopana kanopato dupame waa katengemali pyoo nyakama kandao isoo katao, yaka maileo dupame mona epe mendai palyoo petengemali pyoo kalyepape.
17Endakali mendapuame nyakama anjoo soo kanjole dupa-kisa kosimi laa patami. Dopa pitaminopa dupame nyakamanya losuu anda dupanya nyakama konjame pyatamina kandao isoo kalyepape.
18Nyakamame namba watao payataminosa endakali dupame nyakama laminao pao kapomane andakepi kiŋipi dupanya enombanya katasetamiaka. Dopa pitamino dokonya-kaita nyakamame dupapi endakali tata waka dupapi nambanya lao pii lamaitami.
19Endakali dupame nyakama kosimi laanya anjoo soo patamino dokopa nyakamame aipa lamanape aipa pimanape lao nea nakayalapape. Nyakamame kosa latamino gii dokopaka pii lapenge dupa Goteme nyakama dita.
20Nyakamame pii latamino dupa nyakama tangeme masetala laa nayatami. Nyakamanya Takangenya Oli Sipitisa dokome nyakama lungu petala lata.
21“Akali mendapuame nyakamanya kaiminingi etete dupa enge nyepala pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala nyakamanya endangi takangepi dupa pyao kumasina lao maitamiaka.
22Nyakamame nambanya lao pii lamaitaminosa endakali dupa pitakame nyakama imbu kaengyetami. Dopaka doko, endakali mendeme kyoto joaka katao baa etatamo doko pyoo nyepae katata.
23Dopana endakali dupame nyakama yuu taono mendenya watao pyatamino dokopa waka mendenya paka pupape. Nambame nyakama kiningi langilyona, nyakamame Isataele yuu dokonya taono dupa pitakanya kalai pyoo etapala nayataminopa Endakalinya Ikiningi doko ipata.
24“Mana nyingi akali mendeme baa mana lamaingi akali doko ita naminingi. Kendemane mendeme baa isingi doko ita naminingiaka.
25Dopana mana nyingi mendeme baa mana lamaingi akali dopale joo katatamo kandao doko, mona yaepapenge. Dee kendemane mendeme baa isingi akali dopale joo katatamo kandao doko, mona yaepapengeaka. Endakali dupame endakali isingi doko kandao kenge koo Belesapulu latamino kandao doko, baa tata dupa kandao kenge etete koo mendapua latamina,” Jisasame lea.
26“Dopana, nyakamame endakali dupa paka nakayalapape. Sanga pyatae silyamo dupa pitaka tenda lopalyeta. Yalo petae silyamo dupa tenda panasetaka.
27Nambame pii elyakao nyakama langingi dupa panao lamaiyepape. Pii kakateme singima dupa puu lao wii lee pyoo lamaiyepape.
28Yonge doko pyao kumasetala imambu apata kapa pao pyao kumasala nayatamili dupa nyakamame paka nakaenya, yongepa imambupa lapota yuu koo dokonya koyasepenge doko paka kayalapape.
29Endakali dupame muni toya mendaimi yaka pimbinakae lapoma sambengema daape. Dopa pingimaka doko, nyakamanya Takange dokome kaka nasilyamo kandao doko, yaka dupanya mendaipi mende isa mangala naenge.
30Dee Goteme nyakamanya iti dupa pitaka itaki pyatayaka kalyamino.
31Dopana, nyakamame yaka longo dupa ita minao alyasale joo kalyaminona paka nakayalapape!” Jisasame lea.
32“Endakali mendeme endakali dupa-kisa ‘Namba Kataisanyana,’ lao lao panatamo doko kandao, nambame nambanya Takange kaitinya katenge doko-kisa ‘Baa nambanyana,’ lao lao panatoaka.
33Dopaka doko, endakali mendeme endakali dupa-kisa ‘Namba Kataisanya daana,’ latamo doko kandao, nambame nambanya Takange kaitinya katenge doko-kisa ‘Baa nambanya daana,’ latoakana,” lea.
34“Nambame yuunya endakali dupa mona mendai paliuu katena lao epe yuu yongasalanya epeena lao masala nayalapape. Daa! Nambame epe yuu yongasala naepeona, ŋiliŋali lenge mana doko sakatasala epeo.
35Ikiningimi takange-pipa ŋiliŋali lena wanengeme endangi-pipa ŋiliŋali lena, akali mendenya etanengeme ayange-pipa ŋiliŋali lena lao lungu pisala epeo.
36Kini endakali mendenya palu dupame baa kandao kapa pao yandapipi jetami.
37“Endakali mendeme baanya takange tamopi endangi tamopi mende auu kayapala, namba auu kayalakao nakayatamo doko kapa pao nambanya joo nakatata. Dee endakali mendeme baanya ikiningi tamopi wanenge tamopi mende auu kayapala, namba auu kayalakao nakayatamo doko kapa pao nambanya joo nakatata.
38Dee endakali mendeme baanya ita poko doko nyoo soo namba watao payala nayatamo doko kapa pao nambanya joo nakatataka.
39Endakali mendeme namba lao masetala baa tange yakinatamo kandao doko, baa auu pyoo katata. Dee endakali mendeme baa tange yakinala nayatamo kandao doko, baa koyatana,” Jisasame lea.
40“Endakali mendeme nyakama lanyetamo dokome namba lanyeta. Namba lanyetamo dokome namba puu leamo doko lanyeta.
41Endakali mendeme nambanya pii minao paenge potopesa mende baa potopesana lao lanyetamo dokome potopesa dupame yole nyetaminoli pyoo nyeta. Dee endakali mendeme akali tolatae mende baa tolataena lao lanyetamo dokome akali tolatae dupame yole nyetaminoli pyoo nyeta.
42Dee endakali mendeme namba watao paenge endakali mee datupanya mende nambanya endakalina lao masetala endaki kii napae mende iki nena lao kambuoo maitamo endakali dokonya yole doko eteteaka kapa pao sulu soo setana lao nambame nyakama kiningi langilyona,” Jisasame lea.
