Markus 7:18-34

¹⁸Ye isaav padi ighaze: “Wai, yam paam lemim ŋgar maau? Aghilaal sone? Mbeb to tamtoghon tigham di ve tighan di, eta irau igham di tasami ila Maaron mata ne maau.

¹⁹Pasa, mbeb tovene igham mbeb eta pa lolodi maau. Izila pa apodi moghon, ve mala maau timbebeghazi ilale.” Yesu saveeŋ toni tonene ipaghazoŋan ghiit ighaze mbeb to naol ne, nene poia pa ghaniiŋ. Eta irau igham ghiit tasami ila Maaron mata maau.

²⁰Ve Yesu isaav muul ighaze: “Ŋgar samsamia to tineep ila tamtoghon lolodi ve tivotvot, tauto tigham di tisami ila Maaron mata.

²¹Pasa, ŋgar samsamia to tineep ila tamtoghon lolodi ve tivotvot, tauto tipamundigin di ve tigham ŋgar samsamia naol inimale: tighur maat, tiyub, tirab tamtoghon imaat, tiwaghamun vaiuuŋ, matadi aniiŋ, tigham didiaaŋ, tigham kaarom, matadi samia tinimale ŋgavuun ve ŋgai, tighur koi pa nditadi to ledi mbeb katindi, tipiyaav saveeŋ samia pa nditadi ve Maaron paam, tipait taudi izadi, ve tigham ŋgar samsamia pida paam tinimale yes to tikankaan pa Maaron.

²³Ŋgar samsamia naol tonene to tineep ila tamtoghon lolodi ve tivotvot, tauto tigham di tisami ila Maaron mata.”

²⁴Yesu ipamundigin laghooŋ toni muul, ve ipul ndug tonowen, ve ilaagh ila ivot taan suruvu to ndug tiina Tair ineep pani. Ghoro ilooŋ ila ruum eez to ndug tonowen ve ineep. Ina to nepooŋ tonowen, ye ighaze tamtoghon tiwatagi malep. Eemoghon maau. Pasa, tamtoghon tighita wa.

²⁵Liva eez to ndug tonowen, avuvu samia izeev natu liva. Liva tonowen, ye Yuda maau. Ye Grik tidi to taan Ponisia to ineep ila taan suruvu to Siria. Ye ilooŋ Yesu varu, ve rikia moghon iŋarua Yesu ila, itap izi Yesu aghe pughu, ve itaŋ rorani ighaze indiir avuvu samia tonowen ighau pa natu liva.

²⁷Yesu isaav pani tovene: “Ighaze tasad aniiŋ to ndipain, ve tapiyaava rikia moghon ila ŋgavuun tighani, nene deŋia maau. Ndipain tighan muuŋ le apodi isuŋ, ghoro tapiyaav aniiŋ pida ila pa ŋgavuun tighan.”

²⁸Liva tonenen ipamuul aliŋa ighaze: “Tiina, aliŋam poia. Eemoghon ŋgavuun paam tisasaŋan. Ighaze ndipain tighanghan, ve aniiŋ ŋgiira ŋgiira itaptap izi taan, nene inim ŋgavuun adi pa tighan.”

²⁹Yesu ilooŋ saveeŋ tonene, ve isaav pani muul ighaze: “Yom upamuul aliŋag le deŋia kat. Tovenen umuul ula pa ruum toman lolom poia. Pasa, avuvu samia ighau pa natum liva wa.”

³⁰Tovenen liva tonenen imuul ila pa ruum, ve ighita natu liva ighengheen izala watiiŋ toni. Avuvu samia ighau pani ve tini poia wa.

³¹Yesu ipul taan suruvu to Tair, ve isakia laghooŋ toni ila ivot ndug Sidon. Ghoro iluvut muul inim, ve imbut taan suruvu to Dekapolis, ve ila ivot ya naliu Galilaia muul.

³²Ye inepneep tonowe, ve tigham ŋgeu eez ila toni. Ŋgeu tonowen, taliŋa ipam, ve irau isavia saveeŋ ighazooŋ maau. Tovenen titaŋ roran Yesu tighaze ighur nima izala ŋgeu tonenen pogho, leso tini poia.

³³Yesu ighami ve yesuru tila saguan ris pa ival tiina, ghoro izeev nima u ru ilooŋ ila ŋgeu tonenen taliŋa. Le isob, ghoro iŋazub ila nima, ve ighur nima ila ŋgeu tonenen yama.

³⁴Ghoro mata iza pa sambam, iyavan, ve isaav pani ighaze: “Epata!” (Saveeŋ tonene, pughu tovene: ‘Ukaak.’)