Maleko 7:18-34

¹⁸Iya ye hededelau udiyedi ye wane, “Idohagi to nige kwa nuwatulobai? Komiu taba kabina kwa kata saha tamowai ye kai na ye dobi bogana luwanawai nige ye hebiki.

¹⁹Kana kao ede nige ye dobi nuwana unai, na ye dobi bogana luwanawai, na kabo ye miyagabaei.” (Teina hedehedede ta unai Yesu ye hededehemasalaha meta kai maudoidi se aꞌa.)

²⁰Kabotaki ye wane, “Saha tamowai nuwanawai ye pesama meta iya ye hebiki ede,

²¹matawuwuna saha nuwanawai se pesama wa siya ede teina: nuwatu yabayababadi, laulaubikibiki, kaiwahali, kaiunu,

²²ganawali, samagogo, henunu, kailupolupo, matabado, kaikalomagigili, monunu, nuwasaesae, yo walobayao.

²³Teina ginauli yabayababadi maudoidi ne meta tamowai nuwana unai se laoma yo siya tauhebikina ede Yaubada matana unai.”

²⁴Temenai kabo Yesu ye dahalai ye lau Taiya yo Sidona tehana ne unai. Na ye mwalaesae numa hesau kalona unai. Yona nuwatu meta bena tabu iya se kita. Na iyamo nige gonowana ye tauwadam.

²⁵Magai wa unai waihiu hesau, iya dagela waihiuna Siliya tehana tupwana Penisiya unai ye laoma. Natuna sinekuku meta yaluwa yababana ye luwu iya unai. Na waihiu wa Yesu wasana ye lapui ede ye laoma ye tulibono iya talanuwana unai na ye kaibwada Yesu unai taba yaluwa yababana wa natuna wa unai ne ye hededehepesa.

²⁷Na Yesu ye hededelau iya unai ye wane, “Sola wawayao ya hekaibagunaedi. Tabu wawayao kadi kai ya gabalae kedewa udiyedi, temeta nige ye namwa.”

²⁸Waihiu wa ye hededebui ye wane, “Guiyau, mamohoi! Na iyamo wawayao saha se kaidi na mapuladi se bekudobi hatahata gunina ne unai meta kedewa kabo se kaidi.”

²⁹Na kabo Yesu ye hededelau unai ye wane, “Yom hedehedede ta ye namwakalili. Unai ku lau yom numa. Yaluwa yabayababana wa natum ye pesagabaeyako.”

³⁰Waihiu wa kabo ye uyo numa, metai natuna wa ye kita ye kenokeno, na yaluwa yabayababana wa ye pesagabaeyako.

³¹Yesu Taiya kana sigasiga ye laugabaei na ye lau Sidona yo ye dobi Galili Gabwana, na kabo ye lage Dekapolisi tehanawai.

³²Temenai tamowai beyakolakolana yo ye unaꞌuna se woyaiyama Yesu unai. Na se kaibwada Yesu unai bena nimana ye tolesae iya unai.

³³Boda wa luwadiyena Yesu tamowai wa ye woyahesuwala. Kabo ye kabilau beyana duhadi udiyedi, yo ye kaiso nimana unai na ye kabilau memenana unai.

³⁴Ye kitasae galewa ne unai na katekamkamna nuwana ye mwayau, na ye hededelau tamowai wa unai ye wane, “Epata”, kaniyona ede, “Ku malapai.”