Maka 7:18-34

¹⁸Le nga Yesu iwete pang di nen, “Ona, ang nga o taukamim lo galanga lapau, too? Nga yelei, ang nga ke be kakap betanga kiau palbe tiap, too? Kalongo, so yo be tool ikani ye koonoo a ilo kapono lono i, in ke be igarungu le giri leu ye Maro matana tiap,

¹⁹yesoo bong so yo nen nga, ngan lo igarungu tool tani in lono tiap. Bong ole lo iken ye matuk le kodokodo ki leu, lo ngan be itoo dada ki a idu pang tana.” Ngan tina Yesu iwete nen nga le ipagalanga lodi nen, be kaningi tina yo matana matana nga le imot, ngan dook mata ke be takan.

²⁰Motong la iwete mulu nen, “So yo iken tool lono, lo ngan be ipas ye koonoo a isi in la be igarungu le giri leu ye Maro matana i.

²¹Inbe dada tina yo awete ye be ipas ke tool lono a isi pang diki, ngan nen; lono dook tiap pang tool san, inbe ikapsap ye dada ke di kerenge, inbe iyei dada dook tiap ke pinnau le raumatenge di tooltool a timmata, inbe iyei bauk.

²²Inbe dada dook tiap yo ke matana so in iso panga, inbe lon kases pang di diene, inbe ikap lungunu ye di tooltool, inbe taukan moomoonoo ye dada dook tiap yo iyei mallangana nga, inbe matana gorengana ye so kidi diene a lono dook tiap pang di, inbe illung pang di tooltool a igarung edi, inbe koon payiti a iyei dada dook tiap kapala ben di tooltool yo lodi galanga ye Maro tiap nga.

²³Ngan dada dook tiap tina nga le imot iken tool lono, lo ngan be ipas a isi ke diki nga, ngan ole igarungu tool le giri leu ye Maro matana.”

²⁴Motong la Yesu imadit a iyege malala tani, inbe ipa le ila ye ni yo iken potai pang ye malala mai Taia i. Ngan lono be di tooltool tikamata tiap, le nga idewe a ilo rumu atu lono. Bong ngan tikamata le di tooltool lodi galanga ye ni yo iyepe ye i.

²⁵Ngan garup atu yo so sadi idiwidiwi natunu garup kase i, in ilongo tina yo Yesu iman iyepe nga, le nga palbe leu be ila le la igun turunu du kene punu, inbe itoru a imangmang ye be inganga so sadi a ikoo ye natunu garup tani. Ngan garup tani in ipa ye rara kidi Yuda tiap, inbe tinana ipasuiu la Ponisia ke tana mai Siria ngo.

²⁷Le nga Yesu iwete panga nen, “Kumata be takap kaningi kidi kakase a takatte muku pang di gaunu be tikan nga, ngan in dada dook tiap. Bong kulkulunu ngan ole tapakan di kakase le kapodi sung go, lo ngan be takatte kaningi naunu naunu yo kidi nga, ngan pang di gaunu kooti.”

²⁸Motong la garup tani in iraua betanga ki nen, “E, Tool Mai, betanga kiong in moolmool. Bong ye kene yo di kakase tikan so ye in nga, ngan di gaunu yo tiyepe kookoowoo parmana nga, ngan ole tikan kaningi moromorana kidi yo imaruru du kookoowoo parmana, ngan lapau.”

²⁹Yesu ilongo tina yo iwete nen nga, le nga iyei ne, “Ong in kuraua betanga kiau dook mata san, le lom ponana, inbe kumulu a kula pang rumu kiong. So sadi iyege natum garup tani oo.”

³⁰Motong la imulu a ila pang rumu ki, ngan ikamata natunu tani in so sadi iyege a ila inbe tinini dook mata a ikenen mie pono ki.

³¹Motong la Yesu imadit a iyege tana mai yo malala mai Taia iken ye i, inbe ila pang ye malala mai san yo ene Saidon i, motong la be imulu ngan iwakai le ipa kataunu ye tana yo ene Dekapolis i, le du pombe ye ran Galili.

³²Idu pombe le iyepe nango, motong la di tooltool pattu tikaua tool atu a tila pang ye. Ngan tool tani in talngan dikidiki, inbe men modo le ke be iwetewete tiap lapau. Le nga tila, motong la titoro Yesu a timangmang ye be itara baene lo tool tani in pono, a be nen ngan tinini dook mata mulu.

³³Le nga Yesu ikaua tool tani in a yaru tiyege di tooltool malala mai tina le tila manga mooloo kasin, inbe itar baene buruburene lo tool tani in talngana lono. Motong la ikoronai ngoonoo lo ye baene buruburene, inbe itar lo ye tool tani in mene.

³⁴Motong la itada le matana lo pang ye malala ke Maro, inbe itang le iparama amunu a iwete pang tool tani nen, “Epata!” Ngan betanga tani in punu nen, “Kupanganga!”