Mark 6:30-53

³⁰Mwerin woaroakkok ahr pwurpene, arai pokonpene ipen Jesus pwa arai en kajalehioang me ohroj ma irai ne wiahda apel padahk ohroj ma arai kawoahwoahda.

³¹Armaj dir kin pwurpwuroa Jesus apel nah sohnpadahkkok kahrehda johla anjoau in arai mwinge. Ioar Jesus pwehngkihoang sohnpadahkkok, “Kisai inla kalahpwukla mijkoalkoal nehn japwsoahnno, wijahu ma kamwai kak koammoal.”

³²Arai ken doauda pohn pohs oau pwa arai en inlahng kalahpwukla wija kij.

³³A armaj dir kapang arai mwoakid doahr ken kidal da. Arai ken kijoulahng wijahu jang nehn kahnihmmwok, arai lelo mwohrai.

³⁴Nehn en Jesus doaudihjang pohn pohsso, ih kapangda pokon koalik oau, ih ken ipwilkihda irai. Pwa arai doahroar polohn jihpw oau ma ne joh jileperai. Doari, ih ken sapda kawoahwoahng arai joang dir.

³⁵Injoausik pene, nah sohnpadahkkok indoa ipoa, pwehng ih, “Maing, ne pwong a japwsoahn oau me.

³⁶Ken kadarpijoang pokon oauwe, pwa irai en alwe nehn kahnihmw siksik kan apel koujapw koaroan kan pwa irai en pein dupukda kanrai mwinge.”

³⁷A Jesus japoang irai pwa, “Kamwai kapwa kamwinge irai.” A irai pwehng ih, “Doari, koawoa mwehuki kamai en inla dupukda mwinge woahroar mwani silper riepwiki kamwingehki irai?”

³⁸Jesus idoak, “Lopwonin pilahwa doapoa mine ipamwai? Kamwai kapang apel wadek.” Nehn ahr ne wadekda irai pwehng ih, “Lopwonin pilahwa limoau apel mwumw roahmen.”

³⁹Jesus pwehng sohnpadahkkok en wiahda pwihn siksikpwi pokonno apel kamwindihoang irai pohn re kan.

⁴⁰Irai ken mwindi in pwihnpwi, epwi wadepwiki a epwi wad limeijek.

⁴¹Doahr Jesus ken pwoakda lopwonin pilahwa limoau apel mwumw roahmen, jardahla nehnloannge kaping kalahngan oang Koahs. Ih ken sipwangpijoang pilahwahk kioang nah sohnpadahkkok pwa irai en nehkkoang armajjok. Ih pel nehkkoang arai ohroj mwumw roahmenno.

⁴²Armaj ohroj mwinge oaroh moadla,

⁴³Sohnpadahkkok dowihda luhwen pilahwahk apel mwummwok wiahda kiam eijek riahu.

⁴⁴Woal ma pwili kang pilahwahk, irai me limekid.

⁴⁵Mwerin me Jesus pispis pwehng nah sohnpadahkkok, arai en doauda pohn pohs oau jeila Bethsaida mwohn ih, oaloap jeddo, nehn ah pirin kadarpijoang pokonno.

⁴⁶Nehn kadarpijoang arai, ih doaudahla pohn dol oau pwa en kapkap.

⁴⁷Injoausikdi, pohsso ne mine oh nehn pwungen lehu, a Jesus kalkalahpwuk in poahrinjeddo.

⁴⁸Ih kapang doahr en sohnpadahk kan engdehn jeijeijei nehn lehu pwa arai jei pallan enngo. Doari inlahng injohrehn, nehn pwungen kiloak jiluh apel wonou, ih inla iparai alu pohn lehu,

⁴⁹a irai kapang ah allalu pohn lehu, irai pwa eni men,

⁵⁰ioar irai rahukihda majpwehkda nehn irai kapangda Jesus. Ih ken pispisinnoar lallahng irai, pwa, “Kamwai sihkei! Ngoahi me, kamwai joah majpwehk.”

⁵¹Ih ken doauda pohn pohsso pwilihda arai; anjoauwohr enngo uhdi. Sohnpadahkkok pwuriamweikihla

⁵²Pwa arai johpwa woahwoahki manmanno ma Jesus kamwingehki armaj limekiddo, pwa nehn kapehdirai pe ros oar.

⁵³Irai kosohla lehu, lellahng Gennesaret peidi ipen jappwo, piroahdi pohsso.