Markus 6:30-53

³⁰Idio ta Iesus ele panua ato ad tiluagid mulian ta tiluplup pan. Ta tininipu pan ngan kadonga toa ngada oa tikakado ga ngan saoa posanga tipapaoatai ngan.

³¹Be panua busa tau tila ga tinam ta tikado ga Iesus asingada ele aluagau tirangrang ngan tian ad annga mao. Ta ikeo pagid, “Anam ta gita kekelegita tala ngan tibur modamodanga, ta aearagimi teta.”

³²Tota tidae oagaeai ta gid kekelegid tila ngan tibur modamodanga.

³³Be panua busa tigera gid tila ta tiuatai ngan led lalalanga toa oa. Ta panua busa ngan tuanga ga tuanga tiladlado labiai ga tila ta tipaket gid matad.

³⁴Idio ta Iesus itnan oaga ga idio ta igera ipom kapei toa oa ta ilolo isat ngan gid, ngansa gid mambe sipsip, be tamad eta imariala ngan gid mao. Ta ipaoatai gid ngan danga imata ede ga ede.

³⁵Idio ta ado iuangga isulug ta ele aluagau tila pan ta tikeo, “Tibur ne modamodanga, be teta pade ado idil.

³⁶Tota sula gid ipom ga tila ngan gid tibur ga tuanga gereirei boloma, ta tiuol ad annga ta tian.”

³⁷Be Iesus ikoli led posanga ta ikeo, “Gimi apan ad annga.” Ta tikeo pan bedane, “Eao oangga gai ala ta aol ad bret ngan pat buno rua ta apan gid?”

³⁸Be ibeta gid, “Gimi ami bret pida ienono? Ala agera.” Io, tigera ga kus ta tikeo, “Gai amai bret lima ga ia rua.”

³⁹Idio ta ikeo pagid ipom ta tidio timado ngan rounga ga rounga toa tanoeai oa.

⁴⁰Ngan rounga edengada panua dabad iuot buno, be ngan rounga padengada dabad iuot sangalima.

⁴¹Idio ta ibada bret lima ga ia rua ta imata idae ga ila buburiai ta iposa kemi pan Deo. Ta itei bret ta ibada ga ila pagid ele aluagau, ta gid tiuade pagid ipom. Ta ipota gid ia toa rua oa ga ila pagid toa ngada oa.

⁴²Ta gid toa ngada oa tian ga apad isum.

⁴³Ga kus ta tibada mulian annga ilialia ta tinonoi ngan karei sangaul ga igegea rua.

⁴⁴Ngan gid ipom toa tian annga oa, gid arangaranga tiuot bunoringring lima.

⁴⁵Idio ta Iesus iaoa isensen ele aluagau ta tidae oagaeai ta timuga ngan ei ga tila ngan liu isal iadag, ngan tuanga Betsaida. Be ei idio ta isula gid ipom ta tiluagid mulian led tuangai.

⁴⁶Ga kus ta itnan gid ta idae ga ila lusiai ta iraring.

⁴⁷Io, bong ta gid aluagau tiuodeode ga tila liu irabuiai, be ei kekelen imamado tanopuiai.

⁴⁸Be ei igera rai isoka gid be pakpakid ngan odenga. Io, gaga iuangga itakai be Iesus ilalala gadae ngan eau igogo ta ingata gid, be iuangga ilalala ga ila matadeai.

⁴⁹Be gid tigera ei ilalala gadae ngan eau igogo, ta tiuangga ei lausio eta, ta tingangar.

⁵⁰Gid toa ngada oa tigera ei ta timataud kapei. Be ei iposa toman ngan gid ta ikeo, “Lolomi pu! Eine gau. Amataud mao.”

⁵¹Tota idae pagid oagaeai, be rai kos ga idio. Ta gid timatala kapei tau.

⁵²Ngansa gid tiuatai kemi mao ngan ele kadonga ipu ngan ikado bret ga iuot busa. Laborad irangrang ngan ibada mao.

⁵³Iesus asingada ele aluagau tiuore ngan liu isal iadag ta tidudunga ngan tuanga Genesaret ta titado nagun.