Mareko 5:11-22

¹¹Au kub puakara ge lewer erolare maike paserdege.

¹²Able dimoni Iesuim bagwi, “Ma kerbi kei demarkare puakaem mage kerbi dikerare ki naba yabidoge nabarte.”

¹³Iesu eudige iaglag baida. Ege dimoni adem bausi able lelam bakiauda puakage tabarti. Able kemerkemer maike 2,000 puaka korider bamri deibge barkarki a batweri wege gurim baragda a guni baiterda.

¹⁴Able puaka aseseredle korider adem bamri mir lege ebreredlare muige utebge a gako yabidoge dorgele ge sumesge urder. Mitkar able le tabakiauda wadasmerda nalu lu ge akaida.

¹⁵Wi tabakiauda ge Iesui doge wige able le erdarda ge abra aukaka mitkar dimoni abidoge urder. Wige geumge bakeri ableglam e ge irmireder abra wali damireder e nole ko urker ge dawer.

¹⁶Nalegize ge abi erdarda, wader le daratagerlare nalu ge akaida able leem a able dimoniem a able puakaem.

¹⁷Wi eudige bakeri Iesui itmerda e yaba uteb odikairti.

¹⁸Nawar ga Iesu akawerter narge able le ya abra dimoni waduridli Iesuim bagwi e abidoge obakiamuda atiem.

¹⁹Ege Iesu nole lagkak dawer abi waigardi taba doge. Ege able le detagri, “Ma bakiamu gedim mari buaiem yabi daratagrawem nalu marim Oplelut ikaida a e nalu debele marim dali.”

²⁰Ege able le bakiamuda 10 Utebem ge wader le daratagelare nalu Iesude abim akaidari. Na iegize ge abi asorda wige bazigmuarti.

²¹MRK 5.21-43 Iesu ko akomedari narge bakiamuda nerut pekge ni keperge. Nade lera nikidetreder tabakiauda abi dairumareta maike ni keperge.

²²Netat sunago kirimle abra nei dikereder Zairus takabiamuda Iesuim. Nadege e Iesui erdari, Zairus tababu akaida kokmamu emridari aukelarkelar Iesuim bagwi, “Kara kebi neur no tididli e maike weteumi. Kape marim bagwi, ma taba mara tag abidoge tadakmerik ya waiakai abra gim wadesemu ei mena wadawer.”