Mark 5:11-22

¹¹Apwertel atnwenth pikepik akngerr 2,000 rtnenherrenh.

¹²Arrenty-rnemel Jesus renh ilek, “Irrentey-angenh anwernenhantherr apmer arleng-warl! Anwernenhantherr atnwenth pikepik-rnem-warl thwena!”

¹³Jesus-el kel renh-rnem irrentek. Rernem kel tyerrelhek artwa arwengk-they, alhemel pikepik-rnem-warl. Pikepik-rnem kel anterrek. Rernem kwaty alay-warl aylpenhek, intem-antey. Rernem ilwek kwaty ilkwel kwen.

¹⁴Artwa ingwer-rnem pikepik arntarnt-arey-angker-rnem tawen-warl alhek. Rernem iley-alhek tawen-areny-rnem, pikepik-rnem kel ilwek kwaty ilkwa kwenel. Tawen-areny-rnem rernem-anem alhek, rernem-anem aretyek.

¹⁵Rernem artwa renh arek, rarl mwerr-anem anenh, arnkwakert-anem, rarl mwerr-anem iterremel anenh. Rernem Jesus ikwerety aterirrek, itnweng rlterrk-akert-kety.

¹⁶Rernem angkerrenh artwa ikwer pikepik-rnemek-then.

¹⁷Rernem Jesus renh ilek, “Nga apmer ilenh-they alpetyek, apmer ingwer-warl-anem.”

¹⁸Jesus nganetyek irrek rtnwewarl, artwa ra Jesus renh ayernek, “Ayeng-then ngkweng-angkwarr alhey, mwerrang ngay?”

¹⁹Jesus angkek, “Menty! Nga apmer-warl alpa, ngkwenhek-rnem ilelhey-alpa, atharl ngenh mwerrilek, Itnweng Akngey-kenh rlterrk-akertel.”

²⁰Artwa ra apmer Decapolis-warl alhek, 10 tawenel anenh-rnem-warl. Ra ilelhek ingkerrenhek, “Jesus-el ayenh mwerrilek.” Rernem apatemel awek. Rernem angkerrenh, “Ilenharl angka mwerran!”

²¹Jesus rtnwel Galilee kwaty ilkwangkwarr alhek. Akngerr Jesus-warl ingkerrenh kwaty impalth-warl akarrirrek.

²²Atyetyart Jew-rnem-kenh ra anenh, itnan Jairus.