Markuj 5:11-22

¹¹Ari, pwin pwik kalaimun eu mimi impan nana o, manamana jili.

¹²Irail ap poekipoeki potoan on: Re kotin kadar kit ala, pwe jen til on nan pwik oko.

¹³Iejuj ari kotin mueid on. Nen jaut akan ap koiei jan, ko on nan pwik oko. Pwik oko ap tanedi wei ni aul on nan jed ap mopila nan jed. Irail impan riakid.

¹⁴Jilepa kan ap tandaui, kaireki jili nan kanim o nan jap; re ap koieila pwen kilan duen me wiaui;

¹⁵Irail ari poto don ren Iejuj, kilan, me tanwar en tewil o a momod, o likauer, o lolekonlar; iei i me lekion mier re a. Re ap majapwekada,

¹⁶Irail me kilaner ap indai on irail duen me wiaui on me tanwar en tewil o, o duen pwik akan.

¹⁷Re ap poekipoeki, a en kotiwei jan jap arail.

¹⁸Ni a koti don nin jop o, me tanwar en tewil o poeki re a en ian i.

¹⁹A i jota mueid on i, ap majani on i: Ko on ni im om ren jau om, kaire kin ir duen manaman lapalap, me Kaun o wiai on uk er o poke uk alar.

²⁰I ari kola, kaloki jili nan Dekapolij duen manaman lapalap, me Iejuj kotin wiai on i; irail karoj ap puriamui kila.

²¹Iejuj lao pil kotela jed o on palio, pokon kalaimun eu ap ko pena re a. A kotikot pon oror.

²²Ari, jaumaj en jinakoke amen, me ad a Iairuj kotido. Ni a tu on i, ap dairukedi jan.