Markungundru 5:11-22

¹¹Naka mardawanpa kalikalini piki ngami pirna marakana wonti.

¹²Ja kutji wora nunkangu ngatjina wonti ja jatana wonti: “Ngaianina jinpau pikia, ngangau ngaiani tanangu wirinanto!”

¹³Ja Jesujeli nurujeli tanangu jenia manuni kurana wonti. Ja kutji murumuru matja dunkana, tana pikini wirina wonti, ja piki ngami mardawonpa kalikalini kalikalibakana wonti ngapani; ja tana 2,000 nganana wonti; ja tana ngapani palipalina wonti.

¹⁴Ja pikingamalkanietja wora japa mindrina wonti, ja ngura pirnani ja wakani jenia kaukaubana wonti, ja tana dunkana wonti najila, mina pantjina warai.

¹⁵Ja tana Jesungu wokarana wonti, ja tanali nina kana kutjila najina wonti ngapu ngamanani, ja kati matja widmaterina, ja tjuru ngumu ngamalkanani, nulupini ngopera Legion ngamalkana warai; ja tana japali pantjina wonti.

¹⁶Ja tanali jenia najina wonti tanangu kaukaubana wonti mina kana kutjintani pantjina warai, ja bakana jenia pikini.

¹⁷Ja tanali wonina wonti nunkangu ngatjila, Nau tanani wondirandru puntinanto.

¹⁸Ja Nau botani matja wirina, nunkangu kana kutjila ngatjina wonti nunkangu jela nganala.

¹⁹Jesujeli nunkangu wata manuni kurana wonti, a-ai, nunkangu jatana wonti: “Wapau pungaia jinkanaia ja nguralaia jinkanaia, ja tanangu kaukaubamai mina pirnala Kaparali jinkangu ngankana warai, ja worderu Nau jinkangu kalumiltjamiltjarina warai.”

²⁰Ja nau puntina wonti ja wonina wonti Dekapolis mitani kaukaubala, mina Jesujeli nunkangu ngankana warai; ja pratjana ngaruparana wonti.

²¹Ja Jesus nakaldra botali dirkalani jerankana matja pararana, nunkangu kana wolara jurborina wonti; ja Nau pantuni karakara nganana wonti.

²²Ja mai, jaura pungaia kapara kulno wokarari wonti, tala nunkani Jairus, ja nulu nina najina, nau nunkangu tidnani woraterina wonti.