Marcos 4:32-40

³²meneng penga te pegtanem din, timilles iyan, aw labi pa iyan dakel diyà te kedita te doma intanem din. Dakel se menge panga niyan, aw migsalag se menge manok kidoen.”

³³Migtoladà si Jesus kandan pineokit te medita tegdeyanan iling kenyan taman te egkelebetan dan.

³⁴Impeokit din te tegdeyanan se kedita te intoladà din kandan. Meneng gayed din ipeg-indan te menge tinoledaan din dalem te wedad doma dan aw eden se kedegdagan te kedita te tegdeyanan.

³⁵Pegkeapon te aldaw sìyan, minikagi si Jesus diyà te menge tinoledaan din, “Mèpiya aw matas kidon doton dipag te lanaw.”

³⁶Penga niyan, tinenanan dan se kedita te otaw netipon kidoen te kilid te lanaw, aw simakay dan heman te belangay tapay sinekayan i Jesus. Doen heman menge doma belangay timaking kandan.

³⁷Wedà kenamay, dinetengan dan te kelamag ontò mebandes, aw nekeawop se wayeg diyà te belangay, aw agpet dan neteled.

³⁸Meneng neketedogi si Jesus diyà te olonan kidoen te olin. Linoka dan sikandin aw minikagi dan, “Sir, tebangi kay, so melemes kidon den.”

³⁹Neloka si Jesus aw sinagda din se kelamag. Minikagi sikandin diyà te balud, “Pegkelinaw ka.” Penga niyan, timunung se kelamag aw migkelinaw se lanaw.

⁴⁰Minikagi si Jesus, “Wedà pa kedì kelobos se pegsalig niyo kanak. Ikà niyo egkelemitan.”