SAN MARCOS 4:32-40

³²Te ná ni jequin i, te cáne te jéhnu ga vēsú tāca gá yucū, te cúnáhnu ndaha. Te tācá saa chi sáha tɨ tacā tɨ̄ nuū cuándahū xinī ún. Achí yá.

³³Te cuehē jnūhun yátá súcuan ni cahān yā jiín ñáyuu, núu nasaa cánda i jecūhun ni i.

³⁴Te tāca jéē ni stéén yā, máni máá jnúhun yátá ní cahān yā jiín i. Te nuū tēe cáscuáha jíín yá chi ni nacastūhun cájí yá jnūhun ún.

³⁵Te jeē cuácuaa quɨvɨ̄ ún, te ni cahān yā jiín tée cáscuáha jíín yá: Na yáha yó quíhīn yō ɨnga lado mar, achí yá.

³⁶Te ni casquéndōo de ñayuu cuehē ún, te ni quɨ̄vɨcoo de ini barco nuū je íne Jesús, cuangoo de jíín yá. Te suni cuangoo jecu gā barco jiín de jíjnáhan de.

³⁷Te ni jequɨ̄hɨ ɨɨn tachī níhin, te ni stónda ndute mar, te ni quɨ̄vɨ ini barco. Te je yajni chitú ndute ini barco.

³⁸Te Jesús cátú yá yatā de ini barco, quíxí yā te yɨ́hɨ ɨɨn sahma cástíhi xinī yā. Te ni castónda de ya, te ni cacahān de: Maestro, ¿á tu sáha ní cuenta jeē quēe yó chíji ndute te cuu yō? achí de.

³⁹Te ni ndocuɨñɨ̄ yā, te ni cahān yā nuū tachí níhin un jíín núū mar: Jecuɨñɨ̄ te nayúú‑ni coo ró, áchí yá. Te ni jecuɨñɨ̄ tachī, te ni cuu nayúú íī‑ni.

⁴⁰Te ni cahān yā jiín de jíjnáhan de: ¿Naun cáyūhú ndasɨ́ ró? ¿Naun tu cácandíje ró jéē cācu ró sáha ri?