MAKO 7:18-34

¹⁸Yesusini onondo nimbale: “Kiniá kepe naa pilkimiliye? Yombo senga kangina ultu lepale sukundu pulimú mélse yunga konopuna naa pumba, olona sukundu pumba ultu omba le-muruna kamu pulimúmunga yu kalaro manda naa mondolemo mele naa pilkimiliye?” nirimu. (Yesusini aku sipa nirimumunga “Kere-langimane pali yomboma kalaro se naa mondolemo.” nimbando nirimu.)

²⁰⸤ “Kerena sukundu pulimú mélemane aku sipa unguri naa selemo.” nimbale⸥ yuni kelepa nimbale: “Yombo senga konopuna sukundu pepale wendo olemo kanu mélemane yombo se ⸤Pulu Yemo popo tomba aulkamo pipi silimú⸥ kalaro se mondolemo. Ulu-pulu-kirima u konopumuni pilkuli ⸤pe kamu selemelemonga⸥ “Konopuna pepale wendo olemo mélemane kalaro mondolemo. ⸤We naa selemele.⸥” ⸤nikiru.⸥ Kanu mélema i-sipa: Konopumuni ulu-kirima pilielemele; wa ulu-kirinale lupa lupama andoko selemele; wa nolemele; yomboma toko kondolemele; ambo ye pulima molo ye ambo lilima yombo lupama kinia ulu-kirinale selemele;

²²yombomanga méle taltolemelema ‘Na liembo.’ nilimili; ulu-pulu-kiri lupa lupama selemele; kolo tolemele; yombomane kanokole pipili kololemele uluma pipili naa kolko sumbi siku selemele; yombo lupama molemele mele kepe ononga mélema yama mengo ‘Yu malo.’ konopu lemele; ‘Yomboma pipili kolko molko kinjangi!’ ningu ungu-bulkundu nindilimili; ‘Na imbi ola molemo. Na pilipa kondoli olandopa pelemo. Yombo lupama tondolo se naa pelemo.’ ningu kara pulimili; amu toli uluma selemele; ulu-pulu akuma pilku selemele.

²³Aku ulu-pulu-kirima pali yombomanga konopuna sukundu pepa wendo olemomane yomboma kalaro mondolemo, yomboma ⸤Pulu Yemonga kumbikerena pungí aulkamo pipi silimú⸥ kalaro mondolemo. ⸤Ultu lepa olona pulimú mélemane unguri naa selemo⸥.” nirimu.

²⁴Kanu-kinia Yesusi molorumu kolea ⸤Geneserete⸥ mundupa kelepa ⸤Juda yomboma moloringi kolea Gallilli disiriki ultukundu⸥ kolea-awili Taya kinia Saidonotolo lierimu koleana sukundu purumu. Akuna purumu kinia yombomane yu ‘naa kanangi.’ nimba ulka senga sukundu pumba molorumu-na-kolo yu omba molorumu mele yomboma pilieringi.

²⁵Yesusi yu omba molorumu akumu pilipale ambo se yu molorumuna sumbi sipa omba yunga kumbikerena mania molopa tamalu perimu. Kanu ambomo yu ⸤Pulu Yemonga⸥ Juda yombomanga talapena ultukundu ambo se, kolea Siria poropinji sukundu kolea Ponisia disiriki yunga pulu koleamo. Ambomonga lemenunga konopuna kuru se molopa ambolorumu-kulu Yesusi molorumuna omba mania molopa tamalu pepa yundu mawa sepa nimbale: “Nanga bolamo kuru se konopuna sukundu molemo kene yu ⸤kondo kolko⸥ kurumu toko makorou.” nirimu.

²⁷⸤Ambomo yu ambo-lupa, Juda ambo se mólo, nimba kanopale⸥ Yesusini ambomondo ⸤ungu-iku se topa⸥ nimbale: “Bolangoma kere-langi u nangi olo sepili. Ononga kere-langima lipu owáma simulú kinia manda naa sembá.” nirimu.

²⁸Ambomone yundu nimbale: “Ye-Awilimu, sika nikinu-na-kolo owámane kepe bolangomanga kere-langi pundu mania pulimúma liku nolemele kanumu.” nirimu.

²⁹Kanu-kinia Yesusini yundu nimbale: “Ambomo, nu aku siku nikinumu papu nikinu. Aku siku nikinumunga kuru kanumu nunga bolamonga konopuna sukundu molopa omba wendo pumu kene nu ⸤konopu peanga lelko⸥ pu.” nirimu.

³⁰⸤Yesusini aku sipa nirimu pilipale⸥ ambomo kelepa ulkando pumba kanorumu kinia lemenu konopuna kuru se naa molopili uru peli polona ola we molorumu kanorumu.

³¹Yesusi kolea-awili Taya mundupa kelepa kolea-awili Saidono sukundu omba pumba, ‘Kolea-Awili Rureponga Talo’ niringi koleana sukundu omba pumba, Gallilli nomu kelona ⸤sukundu⸥ orumu.

³²Akuna moloringi yombomane yu molorumuna ye komu sipa ungu sumbi sipa naa nirimu ye se mengo ongo “⸤Yu peanga liepili⸥ nunga kimuni ambolou.” ningu tondolo munduku mawa seringi.

³³Kanu-kinia yombo kakapu seko moloringima mundupa kelepa “Oltolo molambili.” nimba kanu yemo senga memba pumbale nirimumuni, komutolonga ki-sundu sukundu mundupa, elkambe topa yemonga alimbolomo kimuni ambolopale,

³⁴mulúna olando sipa kanopa, tondolo mundupa múlu lipa, Juda yombomanga ungu lepa yemondo nimbale: “Epata!” nirimu. (Kanu ungumunga pulumu “Komumuni piliei!” nirimu.)