Maaku 9 - Bibeli Luayãtaalá

Maaku 9

Click on verse(s) to share them!

¹Ɔ̃ a ònɛ́: Sĩana málɛ oɛ́, gbɛ̃́ pↄ́ kú laeↄ ga kía pↄ́ Lua kpà mↄa ń gbãao esaio.

²Gↄↄ soolo gbɛa Yesu Piɛɛ ń Zaakio ń Zãao sɛ̀ à dɛ̀dɛńnↄ gbɛ̀sĩsĩ lɛsĩwa ńtɛ̃ɛ. Ɔ̃ à lì ń wáa,

³aà pↄkasaↄ lɛ́ tɛkɛ púntaitai. Gbɛ̃e ku dṹnia guu kɛ́ a fↄ̃ pↄ́ pí à puakũ màao.

⁴Bee kpɛ Ɛlia ń Mↄizio bↄ̀ mↄ̀má, aalɛ yã'o ń Yesuo.

⁵Ɔ̃ Piɛɛ ò Yesuɛ: Dii, wá kua la maaɛ. Wà lákpɛ dↄ mɛ̀n àaↄ̃, n pↄ́ do, Mↄizi pↄ́ do, Ɛlia pↄ́ do.

⁶A dↄ̃ lá álɛ oo, asa vĩa ń kṹ maamaaɛ.

⁷Luabɛpuana pìla kùńla, ↄ̃ aa lↄↄe mà a guu à mɛ̀: Gbɛ̃́ɛ beeá ma Nɛ́ mɛ̀ndona yenzideɛ, à aà yãma.

⁸Kã́ndo gↄ̃̀ↄ kɛ́ aa gugwàgwa, aai gbɛ̃e e lↄo, sema Yesu ado.

⁹Kɛ́ aalɛ pila gbɛ̀sĩsĩpiwa, ↄ̃ Yesu ònɛ́ aasu yã́ pↄ́ aa èpi o gbɛ̃e mao e Gbɛ̃nazĩn Nɛ́ gɛ bↄò gau.

¹⁰Aa yã́pi kũa, ń beeo aalɛ kↄ̃ lala aa mɛ̀: Bↄa gau yã́ bee dɛa ni?

¹¹Ɔ̃ aa aà là aa mɛ̀: Bↄ́yãi Mↄizi ikoyãdanɛdeↄ ì o Ɛlia mɛ́ a dↄaa mↄi?

¹²A wèmá à mɛ̀: Ɛlia a dↄaa mↄ́, i yã́pii kɛkɛ zɛ́zɛ, ãma kɛ́ a kɛ̃a láu wà mɛ̀ wa saka Gbɛ̃nazĩn Nɛ́gu, i taasikɛ maamaa sↄ̃ bɛ?

¹³Málɛ oɛ́, Ɛlia mↄ̀ kↄ̀, ↄ̃ wà ń pↄeã dàɛ̀ lá wà aà yã'ò taalauwa.

¹⁴Kɛ́ aa sù ń gbɛ̃́ kĩniↄwa, aa è bíla liaańzi mɛ́ Mↄizi ikoyãdanɛdeↄ lɛ́ lɛkpaakɛńnↄ.

¹⁵Kɛ́ bíla Yesu è, aà yã́ bↄ̀ ń saɛ, ↄ̃ aa bàalɛ̀ gɛ̀ fↄkpàwà gↄ̃̀ↄ ḿpii.

¹⁶Ɔ̃ à a ìwaↄ là à mɛ̀: Bↄ́ lɛkpaa álɛ kɛńnↄi?

¹⁷Ɔ̃ gbɛ̃́ pↄ́ kú zã guue wèwà à mɛ̀: Dii, ma mↄnɛ ń ma nɛ́oɛ, tã́a mɛ́ aà lɛ́na nàalɛ.

¹⁸Tó à dɛ̀dɛwà, ì aà nɛ zĩ́lɛɛ, ↄ̃ ìↄ lɛ́'ifula bↄlɛ, ìↄ swaalↄlↄkↄ̃wa, ì gbã́gbã tèlele. Ma mↄò n ìwaↄnɛ aa tã́api go, ↄ̃ aa fùa.

¹⁹Ɔ̃ Yesu ònɛ́: Gbãgbɛ̃ luanaaikɛnsaiↄ, máↄ kúánↄ e bↄɛ ni? Máↄ mɛnakɛánↄ e bↄɛ ni? À mↄmɛɛ ń nɛ́pio la.

²⁰Kɛ́ wà mↄ̀oɛ̀, kɛ́ tã́api Yesu è gↄ̃̀ↄ, ↄ̃ à nɛ́pi zĩ̀azĩa à aà pã̀lɛ zĩ́lɛ kpɛ̃̀baũ. Ɔ̃ àlɛ gbeembo, àlɛ lɛ́'ifula bↄlɛ.

²¹Yesu nɛ́pi mae là à mɛ̀: À aà lè màa za bↄɛ ni? A wèwà à mɛ̀: Za aà nɛ́fɛ̃nɛn zĩ́ɛ.

²²Ìↄ aà zu tɛ́ ń ío guu mↄ̀ↄmↄↄɛ, ìↄ ye aà dɛɛ. Tó ńyↄ̃ fↄ̃ ǹ pↄe kɛ, wá wɛ̃nagwa, ní dↄwálɛ.

²³Yesu òɛ̀: N mɛ̀ tó má fↄ̃ɛ lò? Yã́pii zɛvĩ gbɛ̃́ pↄ́ lɛ́ ma náaikɛɛ.

²⁴Ɔ̃ nɛ́pi mae ò gↄ̃̀ↄ: Má n náai vĩ. Ǹ n náai pↄ́ lɛ́ kɛ̃́sãa kã́fĩmɛɛ.

²⁵Kɛ́ Yesu è bíla lɛ́ naɛmá, à gì tã́apiɛ à mɛ̀: Tã́a swãdo, málɛ onɛ, go nɛ́piwa. Ńsu ɛa suwà lↄo.

²⁶Ɔ̃ tã́api wiilɛ̀ à aà zĩ̀a pãsĩpãsĩ, ↄ̃ à gòwà. Nɛ́pi gↄ̃̀ lán gɛwa, ↄ̃ gbɛ̃́ daside mɛ̀ à gàɛ.

²⁷Ɔ̃ Yesu aà kũ̀ a ↄwa à aà fɛ̀lɛ, ↄ̃ à gↄ̃̀ zɛa.

²⁸Kɛ́ Yesu gɛ̃̀ ua, zĩ̀loe kúńnↄ lↄo, ↄ̃ aà ìwaↄ aà là aa mɛ̀: Bↄ́yãi wa fua tã́api goi?

²⁹Ɔ̃ a wèmá à mɛ̀: Wabikɛa ado mɛ́ ì fↄ̃ tã́a bee taa go.

³⁰Kɛ́ aa bↄ̀ we, ↄ̃ aa pã̀ Galilea. Yesu ye wàↄ a kúkĩi dↄ̃o,

³¹asa àlɛ yãdada a ìwaↄnɛɛ. A ònɛ́: Wa Gbɛ̃nazĩn Nɛ́ kpámá, wi aà dɛ, i vu a gↄↄ àaↄ̃dezĩ.

³²Aai aà yã́pi midↄ̃o, mɛ́ aa yã́pi laawà vĩakɛ̀.

³³Ɔ̃ aa kà Kapɛnaũ. Gↄↄ pↄ́ a ku bɛ, à a ìwaↄ là à mɛ̀: Bↄ́ lɛkpaa álɛ kɛ zɛ́ guui?

³⁴Aa nì kpã̀uu, asa zɛ́ guu aalɛ lɛkpaakɛ dɛnla yã́ musuɛ.

³⁵Ɔ̃ à zↄ̃̀lɛ à gbɛ̃ↄn kuɛplapiↄ kã̀aa à mɛ̀: Tó gbɛ̃́ ye kɛ mide ũ, aàↄ kɛ̃́sãa gbɛ̃́piizi, i kɛ an baade píi dↄnlɛde ũ.

³⁶À nɛ́ sɛ zɛ̀ ń aɛ, ↄ̃ à aà sɛ kpà a kùɛ a ònɛ́:

³⁷Gbɛ̃́ pↄ́ nɛ́ɛ beeↄ do dìlɛ ma ìwakɛ yã́i, ade ma dilɛɛ. Gbɛ̃́ pↄ́ ma dilɛ sↄ̃ i ma dilɛ madoo, à gbɛ̃́ pↄ́ ma zĩ dìlɛ sↄ̃ɛ.

³⁸Ɔ̃ Zãa òɛ̀: Dii, wa gbɛ̃e è, àlɛ tã́ago ń n tↄ́o, ↄ̃ wá ye giɛ̀, asa wá gbɛ̃́ no.

³⁹Ɔ̃ Yesu mɛ̀: Ásu giɛ̀o, asa gbɛ̃e a fↄ̃ dabudabukɛ ń ma tↄ́o, a ɛa ma tↄbɛ̃ɛsi gↄ̃̀ↄo.

⁴⁰Gbɛ̃́ pↄ́ i íbɛlɛsɛwanↄo, wá bàakpɛɛɛ.

⁴¹Sĩana málɛ oɛ́, gbɛ̃́ pↄ́ á gbá imia á dɛa Kilisi pↄ́ ũ yã́i, ade a kua a aseawao.

⁴²Tó gbɛ̃́ tò nɛ́ pↄ́ lɛ́ ma náaikɛɛ́ↄ do fù, a maa yãa ń adeo wà wísilↄgbɛ gbɛ̃̀nɛ dↄ aà nↄɛɛ, wi aà zu ísiu.

⁴³Tó n ↄ mɛ́ ì to ǹ fu, zↄ̃. Gɛ̃a àizãna guu kↄ̃̀ↄ ũ maa dɛ n taa tɛ́ gasai guu ń ↄ mɛ̀n plaola.

⁴⁵Tó n gbá mɛ́ ì to ǹ fu, zↄ̃. Gɛ̃a àizãna guu ɛɛ ũ maa dɛ wà n zu tɛ́ guu ń gbá mɛ̀n plaola.

⁴⁷Tó n wɛ́ mɛ́ ì to ǹ fu, bↄ. Gɛ̃a kpala pↄ́ bↄ̀ Lua kĩ́i guu wɛdode ũ maa dɛ wà n zu tɛ́ guu ń wɛ́ mɛ̀n plaola.

⁴⁸Wekĩi an kↄ̀ↄbii lí láao, mɛ́ a tɛ́ lí gao.

⁴⁹Wa tɛmↄ baadeɛ an kɛkɛa ń wisio ũ.

⁵⁰Wisiá pↄ́ naɛ. Ń beeo tó wisi í na tà, kpelewa wa kɛ à nakũ lↄi? À to wisi àↄ kú á guu, íↄ na ń kↄ̃o.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Maaku 912345678910111213141516

Maaku 9
1
2
3
4
5
6
7
8
9
10
11
12
13
14
15
16