Matoosa 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹“Inte bolla pirdetonta mala hara asa bolla pirdofte.

²Inte pirdida mala inte bollakka pirdettana. Inte makkida miishara intes makettana.

³Ne ayfen diza gita mitha beyonta dashe ne isha ayfen diza qeeri buura aazas xeellay?

⁴Ne ayfen gita mithi dishin ne isha ‘Ane ta ne ayfeppe qeeri buurayo kessays’ gaanas waana dandayay?

⁵Neno qoodheppe qommon hanizaysso kasetada ne ayfen diza gita mitha kessaycha. Hessafe kaallada ne isha ayfen diza buura kessanas lo7etha xeellandasa.

⁶Ba tohon yedhonta malanne simmidi intena saxi daakerethonta mala anjettidayssa kanata sinthan yeggofte; qasse inte worqakka guddunthata sinthan yeggofte.

⁷“Woossite intes imettana; koyite inte demmana; kare qoxite intes doyettana.

⁸Woossida ubbas imettana; koyiza asi demmana; qoxizades karey doyettana.

⁹Inte giddofe issades nay uketh woossikko shuch immiza aaway dandee?

¹⁰Woykko mole woossikko shoosh immizadey dandee?

¹¹Histin inte iitata gidi uttidi inte naytas lo7o miish imo erizayta gidikko inte salo Aaway iza woossizaytas waanidi aadhdhiza lo7o miish imenee?

¹²Hessa gish hara asi intes ooththana mala inte koyizayssa, inteka haratas ooththite. Muse wogaynne nabeti hayssan kuuyettes.

¹³“Xuuntha pengera gelite; dhayoso efiza ogey gita; pengeykka aaho; daro asay he pengezara gelees.

¹⁴De7os gaththiza ogey gidikko xuuntha; pengeykka xuuntha; gelanaytikka guuthata xalala.

¹⁵“Istas giddo baggay Kana suyte mala gidi uttidinne dorsa ite may7idi inte giddo gelidi giddora ooththiza wordo nabetappe naagettite.

¹⁶Inte ista, ista ooson erandeta. Aguntha worappe woyney, kindicho agunthafe balase ayfey maxetizee?

¹⁷Hessathoka lo7o mithi wuri lo7o ayfees; iita mithika iita ayfe ayfees.

¹⁸Lo7o mithi iita ayfe ayfanas dandayontayssa mala iita mithi lo7o ayfe ayfanas dandayenna.

¹⁹Lo7o ayfe ayfonta mithi wurikka qanxetananne taman yegettana.

²⁰Hessa gish inte ista isti ayfiza ayfen shaakki erana.

²¹“Salon diza ta Aawa shene polonta dishe tana ‘Godo! Godo!’ gizay wuri Salo Kawoteth gelenna.

²²He gallas daroti ‘Godo! Godo! Nuni ne sunthan tinbite yootibekonii? Ne sunthan daydanthi kessibekonii? Ne sunthan daro malata ooththibekonii?’ gaana.

²³He wode ta istas ‘Ta intena mulekka erikke! Inte iitati taappe haakkite’ gaada qoncera ta istas yootana.

²⁴“Histikko hayssa ta qaala siydi ooson peyshizadey ba keeththe zaalla bolla keexizade misatees.

²⁵Deexo iray bukkin; haroyka harottides; carkoyka carkides; keeththaka sugides shin zaalla bolla keexettida gish kundibenna.

²⁶“Hayssa ta qaala siydi ooththontadey gidikko ba keeththe ace bolla keexida eeya asa mala.

²⁷Deexo iray bukkin haroyka harottides; carkoyka carkides; he keeththaka sugides; keeththayka iita kundeth kundides” gides.

²⁸Yesusi tamarsi wursin asay iza timirtezan malalettides.

²⁹Gaasoyka Muse woga tamarsizayta mala gidonta izi godateththi diza asa mala tamarsides.