Lucas 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Potpotgoka Apu Teofilo, Aduwon dat nangipasnoka nangikanglit sidat paspasamak un natungpal situn igaw taku.

²Ingkanglit da dadit dingngoḻ da un impadamag dat nakaila manipud sit nanlugiyan dat pasamak, kan dida’d nangiwalwalagawag sidiya damag.

³Nadayawa Apu, maabus mana inam-ammaaka inadaadaḻ datu un naknakwa manipud sit nanlugiyan da, nasomsomok ku un napiya nin nu ikanglit ku kan sika si nauḻnus

⁴daḻapnu manigammuwam un sadat naisuḻu kan sika dida’d katuttuwaan.

⁵Utdit timpu un nan-aliyan Herodes ud Judea, inggaw osa’n padi un mangngadan kan Zacarias un osa utdat bungguy di papadi un kaganakan Abias. Sat asawana un si Elisabet kaganakan Aaron un ap-apun dat papadi utdit.

⁶Nalintog da un man-asawa utdin man-iilan Apudyus. Naida taḻon mapabaḻawan da utdin manungpaḻan da utdan losana bilin kan lintog na.

⁷Yoong maid abeng da ta lupot si Elisabet kan osa pay naḻakay daon.

⁸Sin aḻgawan, nadtong dit batang da Zacarias un manselbi utdit timplu.

⁹Sat gagangaya ugali da, mambubunutan da nu sin dit koon dit kada osa kan dida. Si Zacarias dit nabunut un lumnok sit timplu un manogob sidit insensu.

¹⁰Utdit manobgana adu pay dat tagu’n manluwaḻu utdit lasin.

¹¹Utdi, nampaila kan siya dit anghel Apudyus un sumisikad sit madiwanan dit sosobgan.

¹²Mailan man Zacarias, nabulung kan amod dit kimut na.

¹³Yoong kinnanan dit anghel un, “Adika umogyat Zacarias ta dingngoḻ Apudyus dit inluwaḻum. Man-abeng si Elisabet un asawam. Laḻaki dit abeng yu ot ngadnom kan Juan.

¹⁴Amoda manlagsakan yu ot manlagsak pay dan adu’n tagu’t din maiyanakana.

¹⁵Ta siya ud napotoga tagu utdin man-iilan Apudyus. Masapul un adina uminum si kumpolmi’n makabuuk. Manipud sin maibugiyana inggawon si Ispiritu Santu kan siya.

¹⁶Adu dat iyIsrael un mangulinona’n manuttuwa kan Apudyus.

¹⁷Mamangpangu nu si Kristu un Apu. Ot awad dit pannakabalin Ispiritu Santu kan siya un padan propeta Elias sidit. Mantutunusona uman dat man-aama. Mapabalbaliw na dat nasukil ot mansomsomok da un padan dat nalintog. Siya datu ud koona daḻapnu masasaggana dat tagu utdit dumakngan Jesus,” kinnanan dit anghel.

¹⁸Kinnanan Zacarias sidit anghel un, “Inon nat mantitigammuk situ? Naḻakayakon kan bakbakot pay si asawak.”

¹⁹Insungbat dit anghel un, “Sakon si Gabriel un manselselbi kan Apudyus. Imbaunak un mangibaga kan sika uttuwa Nabaḻu’n Damag.

²⁰Yoong gaputa adika manuttuwa man-umoḻ ka agingga si matungpal tuwa imbagak kan sika.”

²¹Sadat tagu’t dit lasin un manguuway kan Zacarias, masmasdaaw da nu apaya nabayag sidit daḻom.

²²Lumaksun man adinaon makabagbaga kan dida. Ot natigammuwan da un awad nampaila kan siya utdit daḻom dit timplu. Ot mansinsinyasa lawa kan dida ta nan-umoḻon.

²³Utdit nagangput dit koon Zacarias sit timplu nangulin sidit boḻoy da.

²⁴Adina nabayag nabugiyon si Elisabet un asawana. Ot si Elisabet adina lummaklaksun si lima’n buḻan. Kanan Elisabet un,

²⁵“Kinaasiyanak kan Apudyus ta antu un nabugiyak un siya’d naibabbainak sidat uduma tagu dit kinalupot ku.”

²⁶Utdit maikanoma buḻanon ud Elisabet un nabugi, imbaun Apudyus si anghel Gabriel ud Nazaret un osa’n ili’d Galilea,

²⁷ta umoy sit osa’n babai un daan payyan di laḻaki un aduḻon un mangngadan kan Maria. Si Maria naipaada maiyasawa kan Jose un kaganakan Ali David.

²⁸Ummoy dit Anghel kan siya ot kinnanana un, “Manlagsak ka, sika un naidumduma’t potog. Awad si Apu kan sika.”

²⁹Yoong nabulung si Maria utdit imbagan dit anghel ot simsimmok na nu ngadan dit piyaona’n ugudon dit imbaga na.

³⁰Ot kanan dit anghel kan siya un, “Maria, adika umogyat ta naidumduma nat potog nu kan Apudyus.

³¹Ilam! Mabugi ka ot iyabeng nu ud osa’n laḻaki un ngadanom kan Jesus.

³²Siya ud madayawa tagu kan gattoka anak Apudyus un kangattuwan. Mambalinon Apudyus si Ali un padan Ali David un inapu na.

³³Itulayana dat kaganakan Jacob si inggaingga, ot maid patinggan dit mangiyapuwana.”

³⁴Summungbat si Maria un, “In-inon dinata makwa? Maid payyan asawak.”

³⁵Summungbat uman dit Anghel kan siya un, “Mabugi ka maipagapu’t pannakabalin Ispiritun Apudyus. Siya’d gapuna un sat iyabeng nu nasantuwan, siya’d gattoka Anak Apudyus.

³⁶Ilam si kabagiyama Elisabet un kanan da un lupot yoong nabugi ulay nu bakbakoton ot sat bugi na laḻaki. Kanoma buḻan naon.

³⁷Ta maid adi makwa nu si Apudyus dit mangwa.”

³⁸Summungbat si Maria un, “Manselbiyak kan Apudyus. Matungpal kan sakon nat imbagam.” Ot tinaynan dit anghel.

³⁹Utdi, nangkamukamu un nanlakkat si Maria ta umoy sit boḻoy da Zacarias sit ili un sakup din kabatbateledana ili ud Judea.

⁴⁰Dumatong man sidi giningaana si Elisabet.

⁴¹Magngoḻ man Elisabet dit gingan Maria, nangkulagtit dit abeng sit buwang na.

⁴²Ot indangsoḻ Elisabet un nambagbaga’n, “Maria, sika’d kagasatan sidan losana babai. Ot nagasat pay nat abenga iyabeng nu.

⁴³Apay padayawanak un umoy bilingon kan sika un inan ud Apuk.

⁴⁴Ta utdit magngoḻ ku dit gingam, nangkulagtit tun abeng situn buwang ku utdit lagsak na.

⁴⁵Nagasat ka ta tuttuwaoma matungpal dit insapatan Apudyus un imbagan dit anghel na.”

⁴⁶Utdi, kanan Maria un, “Daydayawok si Apudyus.

⁴⁷Naanggomak ta si Apudyus indumduma na ud sakona osa’n babbaun na ullawa. Kadon losana tagu awaganak un nagasat.

⁴⁹Nakaskasdaawa banag dat kingkingwan mannakabalina Apudyus kan sakon. Nasantuwan dit ngadan na.

⁵⁰Kaasiyana dat losana manuttuwa kan siya manipud sidat damu’n lonap aginggana’t dat maudi’n lonap.

⁵¹Ipaila na dit pannakabalin na utdan koona. Ot alliwona dat mamaspasindayaw sidat koon da.

⁵²Ipadoba na dat nangatu’n tutulay sidan saad da. Ot ipangatuna dat kakkaasi un tagu.

⁵³Sadat maidan si kanon itdana dida ut napiya un mapnokan da. Yoong sadat nabaknang padaḻnona dida’n imaima.

⁵⁴Tinungpal na dit insapatana utdat dadakkoḻ taku ta tinuḻungana ditaku’n kaganakan Israel.

⁵⁵Adina naliuwan dit nangkakaasi na kan Abraham kan losan dat kaganakana si inggaingga,” kinnanan Maria.

⁵⁶Nakaigaw si Maria kan Elisabet si unus di tuḻu’n buḻan asina nangulin sidin boḻoy da.

⁵⁷Utdit dinumtong dit timpu un man-abengan Elisabet inyabeng na ud laḻaki.

⁵⁸Sadat kaaluba da kan kabagiyan da, nagngoḻan da dit nakaskasdaawa mampipiyan Apudyus kan Elisabet. Ot naanggom da pay.

⁵⁹Utdit maikawaḻu’n aḻgaw dit posik nandadatdatong da ta manlaguman da dit matuḻgiyan kan mangadanan dit posik ta siya’d ugali da un Judio. Piyaon da un ngadanon kan Zacarias ta siya’d ngadan amana.

⁶⁰Yoong kinnanan ina na un, “Bokon ta sat ngadan na, Juan.”

⁶¹Kinnanan dat tagu kan siya un, “Yoong maid kabagiyan yu si singngadan sinata ngadan.”

⁶²Ot insinyas da kan Zacarias nu singngadan dit ingadan nat dit abeng na.

⁶³Nangkodaw si Zacarias si kakanglitan ot ingkanglit na un Juan dit ngadan na. Taḻona nasnasdaaw da un losan.

⁶⁴Utdiyon, nakabagbaga uman si Zacarias ot insaḻad na un nandaydayaw kan Apudyus.

⁶⁵Taḻona nasnasdaaw dadit kailiyan da. Nandinadinamag tuwa napasamak sidin kabatbateledana ili ud Judea.

⁶⁶Nakainsomosomok dat losana nakagngoḻ situwa pasamak ot kanan da un, “Ngad kad nin mambalinan dituwa abeng. Ta nalawag un awad kan siya dit pannakabalin Apudyus.”

⁶⁷Utdi, si Zacarias un aman dit abeng, ininggaw dit Ispiritu Santu kan siya ot imbagana dit piyaon Apudyus paibaga kan siya un kanana’n,

⁶⁸“Dayawon taku si Apudyus un Apu taku’n iyIsrael. Ta inummoy un mangwaya kan ditaku.

⁶⁹Imbaun na dit mannakabalina managu un manligwat sidan kaganakan Ali David un nanselselbi kan siya’t dit.

⁷⁰Siya payon dit paimpugtu na utdat propetana utdit aw-awe

⁷¹un taguwona ditaku utdan losana kabusuḻ taku kan sidan losana manlaweng kan ditaku.

⁷²Imbagana un, kaasiyana dat dadakkoḻ taku kan gagasmokona dit insapatana.

⁷³Ta tuttuwa’n insapatana kan ap-apu taku’n Abraham un, taguwon ditaku utdan kabusuḻ taku daḻapnu maid ikimut taku’n manselbi kan siya,

⁷⁵kan daḻapnu nalintog tun mataguwan taku utdin man-iilana un maid koon taku si laweng.”

⁷⁶Kinnanan pay Zacarias sit abeng na un, “Sika abeng ku, ngadnon dika si propetan Apudyus un kangattuwan. Umun-una ka nu sadit mangiyapu ta umoy ka saganaon dat tagu’t dit daan na un dumatong.

⁷⁷Umoy ka ipatigammu utdat tagu nat mataguwan da si inggaingga nu kodawon da dit mampapakawan Apudyus sidat basuḻ da.

⁷⁸Ta taḻona nakaasi kan naanus si Apudyus. Ot mangibaun si managu un maiyalig sit dumungitan init sin bigbigat.

⁷⁹Ta silawana dit somsomok dat napangot si katatagu kan iinggaw sit kapangotan un igaw ud katoy. Ipangat ditaku utdit daḻan un mampooy sit kapkapiya un mataguwan.”

⁸⁰Dummakoḻ un nanakman dit aangson dit abeng. Ininggaw sit igawa maid tagtagguwan aginggana’t dit timpu un naikoddonga lumtawana’t dat iyIsrael.