1Ama Teofilus fo nana hadak. Soda-molek. Hataholi noꞌu kala, soba sulak so, tutuik laꞌeneu dedeꞌa kala mana dadik nai ai lalada nala. Ala sulak tutui kala sila, lenik tutuik fo ana eo neme ai mai, ma neni ai mai seluk neme makahulun mai. Tutui kala sila fo ai bubulu kana neme Lamatuak Yesus hataholi nala mana deka lo Ndia, ma neme hataholi feꞌek mai boe, fo nita no mata deꞌe hehelin. Basa tutui kala sila, nandaa leo Manetualain helu mema kana, neme makahulun mai so. De, au palisa kana lutu-lutuk basa sila so, mulai neme tutuik ndia huu-okan. Boe ma au aketun, fo sulak basa sila, no malole, tungga ndia tutunggan. No leo ndiak, na ama bisa bubuluk no teteben, hata fo ana dadi so.
4Ma ama boe oo, bisa mamahele, hata fo hataholi la tuik ndia tetebes. Basa sila memak mana dadik so!
5Tutuik ia huun leo iak: faik fo Mane Herodes toꞌu palenda nai propinsi Yudea, hambu hataholi esa nade Zakarias. Ndia ndia, esa neme malangga anggama Yahudi la mai. Ma ndia boe oo, neme baꞌi Abia buao malangga anggaman mai. Zakarias saon, nade Elisabet. Ndia boe oo, tititi-nonosik neme malangga anggama la mai, huu ndia ndia, baꞌi Musa kaꞌan Harun tititi-nonosin
6Dua sala lasoda lo ndoos, tungga Manetualain palendan, ma basa heti-heu nala. Hataholi la boe oo, fee hadak neu sala.
7Dua sala lamalasi so, tehuu ana nala ta, huu Elisabet anamanan, nana kenak.
8Laꞌi esa, Zakarias ma ndia nonoo buao Abia nala hambu susula babaꞌe ues, nai Uma Ina Huhule-haladoik nai Yerusalem.
9Tungga sila natetemen, na malangga anggama la sila leꞌa lot, fo sangga bubuluk see hambu ues maso neni Uma Ina Huhule-haladoik Kama Malalaon Manai Lain Seli ndia dalek neu. Nai ndia, hataholi ndia musi dede ai kaboo menik nai Manetualain matan. Faik ndia, ala leꞌa lot, de lot tuda laꞌeneu Zakarias.
10Boe ma ana maso dalek neu. Ledoeik ana dede ai kaboo menik nai Kama ndia dalek, naa te hataholi noꞌu kala hule haladoi lai Uma Ina Huhule-haladoik ndia pasan.
11Kada nggengge neuk Manetualain ata nusa-sodan esa, mai nambadeik neu mamana dedede ai kaboo menik ndia boboa konan.
12Nita leo ndia, boe ma Zakarias bii nalan seli, losa ta bubuluk tao hata so.
13Tehuu ata nusa-sodak ndia, kokolak nae, “Zakarias! Boso bii bou! Huu Manetualain namanene o huhule haladoim so. De, dei fo o saom bonggi fee o, ana touanak esa. O musi foin nade Yohanis
14Dei fo hataholi noꞌu kala, lamahoko tungga noꞌu lo ei, huu ei hambu anak. Kakanak ia, dei fo tao nala o dalem namahoko.
15Lamatuak Dula Dale Malalaon koasan, no ndia, mulai neme inan bei nailun. Ana musi naluli ninu ala-lalu mata-matak. Faik fo ana inahuu mai, boe ma Manetualain paken dadik neu hataholi inahuuk.
16Dei fo ana kokoe nala hataholi Israel asa noꞌuk, fo lasafali tungga sila Lamatuan, fo ndia Manetualain.
17Ndia hadan ma koasan, sama tetebes leo baꞌi Elia, fo Lamatuak mana kokola makahulun ndia. Ana mai nakahuluk neme ita Lamatuan. Ana tao nala ina-ama la, sue lasafali sila ana nala. Ma hataholi mana heok lasadea Lamatuak, ana tao nasafali sala boe, fo ala pode lasafali tungga Lamatuak hihii-nanaun. No leo ndiak, na ana tao nala hataholi la, lahehele dale nala, fo simbok Lamatuak mamain.”
18Tehuu Zakarias natane nasafali ata nusa-sodak ndia, nae, “Neme bee mai, bisa dadi!? Au ua au saong mamalasi leo iak so! De, tandan hata fo au bisa ita basa dedeꞌa kala ia dadi so?”
19Boe ma, ata nusa-sodak ndia nataa, nae, “Leo iak! Au ia Jibrael, fo Manetualain nadedenun. Ndia mesa kana nadenu au, fo au mai afada o dedeꞌa malole ia.
20Tehuu, o ta nau mamahele au kokolang ia. De, ndia tandan, fo o mokek ndia leo iak! O maam nakadita, de o ta bisa kokolak hata-hata, mulai neme hatematak ia mai, losa ei hambu kakanak ndia. Dei fo o mita aom. Huu hata fo au afadak ia, dei fo ana dadi, nandaa no ndia fain.”
21Hataholi noꞌu kala mana hule-haladoi lai deak ele, lamanggonggoak so, huu Zakarias ta kalua ndoos.
22Ledoeik ana kalua deak mai, tehuu ana ta bisa kokolak hata esa so bali. Boe ma ana nakababalek nenik liman neu sala, de dei fo ala bubuluk, lae, Lamatuak natudu fee ndia so, dedeꞌa heran esa neme Kama Malalaok Nalan seli ndia dalek.
23Sila uen basan, boe ma Zakarias fali neni uman neu.
24Ta dook boe ma, Elisabet naꞌilu, de ana kekek nai uman losa bulak lima. Ana kokolak nae, “Koa-Kiok neu Lamatuak! Mateꞌen Lamatuak natudu Ndia dale malolen neu au. Au hambu tititi-nonosik, de hataholi la ta lakamamaek au so bali.”
26Ledoeik Elisabet ilun laꞌok bulak nee, boe ma Lamatuak haitua Ndia ata nusa-sodan esa, neni nggolok esa neu, nai propinsi Galelea, nade Nasaret. Ata nusa-sodak ndia nade Jibrael.
27Nai Nasaret hambu inanak esa, nade Maria. Maria nafufudik no touk esa nade Yusuf. Yusuf ndia, na, mane Dauk tititi-nonosin. Jibrael neu natonggo no inana Maria ndia.
28Ana natudu aon neu inanak ndia, boe ma nae, “Soda-molek, ina! Manetualain hele nala o so, fo sangga tao dedeꞌa malole esa neu o. Manetualain sama-sama no o, Maria.”
29Namanene leo ndia, boe ma Maria namanggonggoak neu ata nusa-sodak kokolan ndia. Ana ta bubuluk ndia ndandaan hata.
30Boe ma ata nusa-sodak ndia tuti bali, nae, “Maria! O boso bii. Huu Manetualain naena hihiik natudu Ndia dale malolen neu o.
31Ta dook so, huu o maꞌilu, boe ma dei fo o bonggi mala ana touanak esa. O musi foin nade Yesus.
32Dei fo Ana dadik Hataholi inahuuk. Dei fo Lamatuak noken na nae, ‘Ndia ndia, Au ana heheling.’ Ndia fo, Kakanak neme Manetualain fo Manai Lain Seli. Dei fo Manetualain soꞌu nalan, fo Ana toꞌu palenda, sama leo Ndia baꞌin Dauk.
33Dei fo Ana palenda hataholi Israel asa nakandondoo henin. Huu Ndia totoꞌu palendan ta mana basak.”
34Tehuu Maria natane Jibrael, nae, “Au ia, bei ta sunggu itak ua touk esa boe! De talobee, fo au bisa aꞌilu?”
35Boe ma Jibrael nataa, nae, “Leo iak! Dei fo Manetualain Dula Dale Malalaon mai neu o. Ma Manetualain fo Manai Lain Seli ndia koasan dei fo mboti nala o. No leo ndiak, na Kakanak fo dei fo o bonggik ndia, tebe-tebe malalaok. Huu Ndia ndia, Manetualain Anan.
36Boso heran! Huu o bobonggim esa, nade Elisabet, nailu so boe. Hataholi la lae, ndia ta bisa bonggi so, huu ndia lasik so. Tehuu hatematak ia, ndia tein, laꞌok bulak nee ia so.
37Huu soaneu Manetualain, na basan bisa dadi!”
38Boe ma Maria nataa nae, “Malole. Au ia Manetualain atan. De ela basan dadi tungga o kokolam ndia. Au ahehele tungga kada Lamatuak hihii-nanaun.” Basa boe ma ata nusa-sodak ndia, laꞌo elan.
39Seli faik hida, boe ma Maria laꞌo lai-lai neme Nasaret mai, neni Zakarias nggolon neu, nai letek manai Yudea. Losa ndia, de ana maso tutik neni Zakarias uman neu. Boe ma ana fee hadak neu Elisabet.
41Ledoeik Elisabet namanene Maria fee hadak neu ndia, boe ma kakanak manai Elisabet tein dale, nafoki. Ma Lamatuak Dula Dale Malalalon maso neni Elisabet dalen neu.
42Boe ma ana kokolak natingga nae, “Maria! Dei fo hataholi la, soꞌu lamadedema o nadem, lena heni basa ina kala malai daebafok ia! Dei fo hataholi la, soꞌu lamadedema kakanak manai o teim dale ndia!
43Au boe oo, nanasoꞌuk tungga, huu au Lamatuang inan mai natonggo no au.
44Ledoeik o maso fee hadak neu au leo ndiak, boe ma tutik au anang manai au teing dale, nafoki, huu namahoko.
45Manetualain natudu Ndia dale malolen neu o so, huu o mamahele, Ana sangga tao tungga Ndia hehelun.”
46Maria soꞌuk halan, nae, “Neme au dale kadiꞌi anang dalek mai, au soꞌuk amadedema Lamatuak!
47Au daleng namahoko, huu Manetualain fee au sodak!
48Ana tao matak neulalau neu au, Ndia hataholi nadedenun fo sosoan ta ia. Mulai neme hatematak ia mai, basa hataholi la taok au ia, inak fo maua-manalek nalan seli,
49huu Lamatuak tao dedeꞌa heran neu au. Ndia ndia, Mana Koasa ma Malalaok Nalan Seli.
50Manetualain natudu taa-taa namemeda kasian neu basa hataholi la, fo mana fee hadak ma lakaluku-lakatele neu Ndia, neme numbusaduk esa mai, neni numbusaduk feꞌek neu.
51Ana pake Ndia koasan, fo tao naodek neu hataholi mana koao kala.
52Ana tao natuda hataholi mana koasa la, huu koao nala. Tehuu Ana soꞌu laik hataholi madale taidae kala.
53Ana fee hataholi mana ndoe kala, laꞌa losa lakabete, tehuu Ana husi heni hataholi kamasuꞌi kala, fo ala laꞌo lo sila lima lou nala.
54Ana tulu-fali Ndia hataholi Israel asa, ma Ana natudu taa-taa Ndia dale kasian neu sala.
55Makahulun, Ana mbaꞌa heheluk no ita bei-baꞌi nala, fo ndia, baꞌi Abraham, ma basa numbu sadu nala. Hatematak ia, heheluk ndia nanambaꞌak nakandondoo henin.”
56Boe ma Maria leo no Elisabet losa bulak telu. Basa de ana fali neni uman neu nai Nasaret.
57Ndia fain losa leo ndia, boe ma Elisabet bonggi ana touanak esa.
58Halak ndia natanggela neni ndia bobonggi nala neu, ma nggolo isi kala, lae, Manetualain natudu Ndia dale malolen, de ana fee Elisabet anak esa. Boe ma basa sala lamahoko.
59Ledoeik kakanak ndia faik falu, boe ma ala sunat ana, tungga hataholi Yahudi la heti-heun. Ala nau foi kakanak ndia nade Zakarias, tungga ndia aman naden.
60Tehuu inan ta nau, de nae, “Ta bisa leo ndiak! Ndia naden, musi Yohanis!”
61Tehuu ala bala lae, “Hatina de o hele mala nade Yohanis ndia? Ta hambu hataholi esa boe nai ei bobonggi mala, pake nadek ndia!”
62Boe ma ala lakababalek lima nala neu Zakarias, fo sangga bubuluk ana sangga foi kakanak ndia nade see.
63Zakarias nakababalek liman fo noke lei. Ala feen lei, de ana sulak, nae, “Ndia naden Yohanis!” Boe ma basa hataholi la, heran lalan seli.
64Kada nggengge neuk, huu Zakarias maan mana makaditak ndia, bangganaꞌu so. Boe ma ana koa-kio Manetualain.
65Basa hataholi mana leo dekak lai ndia, ala bii lalan seli. Boe ma tutuik ndia nakambela neme bafak mai neni bafak neu, losa hataholi la, malai lete kala malai propinsi Yudea, basa sala bubuluk.
66Hataholi mana mamanene tutuik ndia, duduꞌa, lae, “Manggaledok so, Lamatuak koasan no kakanak ndia. Dei fo ana inahuu mai, na ana dadik hataholi namata-ao leo hata, bae?”
67Basa boe ma, Lamatuak Dula Dale Malalaon maso neni Zakarias dalen neu. Huu ndia de, ana kokolak, nae,
68“Koa-kiok neu Lamatuak, fo hataholi Israel asa Manetualain! Huu Ana mai tifa nala Ndia hataholi nala, fo suek ala boso sama leo ata.
69Lamatuak soꞌu nala Hataholi esa fo Ndia koasan ana seli so, fo dei fo Ana fee sodak neu ita. Ndia ndia, neme mane Dauk tititi-nonosin mai.
70Lamatuak helu memak basa ia la so, neme lele uluk mai, pake Ndia mana kokola nala, fo dale nala katemak lo Ndia.
71Hatematak ia, Ana sangga mboꞌi heni ita teme ita musu nala mai, ma teme hataholi la, fo mana dale hedi neu ita.
72Ana natudu Ndia dale malolen neu ita bei-baꞌi nala, huu Ana nasaneda taa-taa Ndia hehelu nala fo Ana mbaꞌan no baꞌi Abraham.
74Ana mboꞌi heni ita so, teme ita musu nala mai, fo ita bisa takaluku-takatele neu Ndia, ma ta paluu ita bii so bali.
75Ana mboꞌi heni ita so, suek ita bisa tasoda malalaok, ma ndoos nai Ndia matan.
76Anis! O ia, Au anang. Dei fo hataholi la lalelak o, lae, o ia, Manetualain fo Manai Lain Seli mana kokolan. Dei fo o muu mafada hataholi la, fo lalengga dale nala, suek ala simbok Lamatuak mamain.
77Dei fo o muu matudu dalak neu Lamatuak hataholi nala, suek ala bubuluk sila hambu sodak, huu Lamatuak koka heni sila sala nala so.
78Huu Lamatuak dalen tuda ma kasian neu ita, huu ndia de, Ana fee ita fai lela beuk, sama leo fai beuk fo neni manggaledo beuk. Ita mana laꞌok nai makiuk, ma ita mana bii mate, huu ita bei ta mole to Lamatuak, dei fo hambu manggaledok fo noo ita teni dala mole-dame teu.”
80Basa boe ma Yohanis tamba faik, boe inahuu. Ma Lamatuak Dulan tao nalan balakai. Ana inahuu mai, boe ma neu leo nai mamana nes, losa ana mulai tao ndia ue-ledin fee hataholi Israel asa.
