Luke 18:14-43

¹⁴Me ga’ar Jesus, “Nggog ngomed, nre tamukun tax nem ma gathi fare Farise e sul nga tafen nike mat’aw ngak Got. Ya en nra tolangnag ir e yira sobut’nag, ma en nra sobut’nag ir e yira tolangnag.”

¹⁵Ma boch e girdi’ e ra feked fakrad ni kabran i yib ngak Jesus ni nge tay pa’ nga dakenrad nge yibilayrad. Machane me guyrad pi gachalpen Jesus miyad puwan’ ngorad ni kar yodoromgad.

¹⁶Me pining Jesus e pi’in bitir ni ngarbad ngak, me ga’ar, “Mpaged e pi bitir nir ngarbad ngog! Dab mu taleged yad, ya gagiyeg rok Got e fan ngak e pi’in bod e pi bitir ney.

¹⁷Mu ted fanmediyan ko re bugithin ney! En ni dabi bodnag ir bochi tir nge pag ir nga pa’ Got nge mang Got e i gagiyegnag e dabiyag nra yan ko gin nsuwon Got.”

¹⁸Be’ nma gagiyegnag e girdi’ nu Israel e fith ngak Jesus ni ga’ar, “Tamchib ni bfel’, mang e thingar gu rin’ me yag e yafos ndariy n’umngin nap’an ngog?”

¹⁹Me fith Jesus ngak ni ga’ar, “Mang ni kamog ni gu bfel’? Dariy ta’abe’ ni bfel’ ya kemus ni go’ Got e bfel’.

²⁰Ga manang fapi motochiyel ni ga’ar, ‘Dab mu pirew be’ ni gathi mabgol rom; dab mu li’ be’ ngem’; dab mmoro’ro’; dab mu t’ar e thin nga daken be’; mu liyor ko chitamam nge chitinam.’”

²¹Me fulweg fare mo’on ni ga’ar, “Urngin e pi motochiyel nir ni gu be fol riy nnap’an ni ku gub bitir ke mada’ ko chiney.”

²²Ma fa’ani rung’ag Jesus ni aram rogon me ga’ar ngak, “Ka bay ta’a ban’en ni ngam rin’. Mpi’ ni chuway’ urngin ban’en ni bay rom ma ga fek e salpiy riy ngam pi’ ngak e pi’in yad ba gafgow, ma aram e ke yag e fla’ab ngom u tharmiy; ma ga yib ngam un ngog.”

²³Ma fa’ani rung’ag fare mo’on e re bugithin nem me ri kireban’, ya rib pire’ ban’en rok.

²⁴Me guy Jesus nike kireban’ me ga’ar, “Rib mo’maw’ rok e pi’in nib pire’ ban’en rorad ni ngar uned ko gagiyeg rok Got.

²⁵Kab mo’maw’ rok be’ nib pire’ ban’en rok ni nge un ko gagiyeg rok Got ko bin ni nge yan ba kamel u mugufan ba rosom.”

²⁶Ma pi’in nrung’aged e n’en ni yog e ra fithed ni lungurad, “Ere mini’ e rayag ni nge thap ngak Got?”

²⁷Me fulweg Jesus ni ga’ar, “N’en ndabiyag rok e girdi’ e rayag rok Got.”

²⁸Ma aram me ga’ar Peter, “A mu guy! Kug paged e tabinaw romad kug uned ngom.”

²⁹Me ga’ar Jesus ngorad, “Er rogon, ma ba’aray bbugithin nggog ngomed: en nra pag e tabinaw rok, ara leengin, ara pi walagen ni pumo’on, ara gallibthir rok, ara pifak ni fan ko gagiyeg rok Got

³⁰e ka bo’or e tin ni bay yag ngak ko biney e tamilang, ma yafos ndariy n’umngin nap’an e rayag ngak ko binem e tamilang.”

³¹Me fek Jesus fare ragag nge l’agruw i gachalpen nga orel ko girdi’ me ga’ar ngorad, “Mu telmed! Gadad be yan nga Jerusalem, ni aram e urngin ban’en ni i yoloy e pi profet ni murung’agen e en ni Fak e Girdi’ e bay yib i m’ug riy nib riyul’.

³²Bay ni pi’ ngak e pi’in gathi yad piyu Israel, ngu’ur moning niged, ma yad be yog e thin nib kireb ngak, ma yad be thuw nga daken.

³³Ma bay ra toyed ko dimow miyad li’ ngem’, machane chirofen nra gaman e dalip fen ngay e bay ni faseg ko yam’.”

³⁴Ma dariy bochu’uw e pin’ey ni nang pi gachalpen fan; ya kan mithag fan e pi thin nem rorad, ma de yag nra nanged fan e n’en ni be weliy Jesus.

³⁵Nap’an nike chugur Jesus ko binaw nu Jeriko, ma bay be’ nib mo’on nib malmit nike par nga but’ u to’oben e kanawo’ be man ban’en.

³⁶Ma fa’ani rung’ag laman e girdi’ ni pire’ ni yad be yan u to’oben me fith ni ga’ar, “Be mang e ren’ey?”

³⁷Me rogned ngak ni lungurad, “I Jesus nu Nazareth e be yib.”

³⁸Me tolul ni ga’ar, “Jesus, ni Fak David gur! Mu runguyeg!”

³⁹Ma pi’in yad bay ngam’on e ra puwan’gad ngak miyad yog ngak ni nge th’ab gulungan. Machane fin aram e tolul ni kari ga’nag laman ni be ga’ar, “Fak David! Mu runguyeg!”

⁴⁰Ma aram me tal Jesus nge yog ni ngan fek fare mo’on nib malmit i yib ngak. Ma fa’ani chugur me fith Jesus ngak ni ga’ar,

⁴¹“Mang e ga ba’adag ni nggu rin’ ngom?” Me fulweg ni ga’ar, “Gu ba’adag ni nge yag ni gguy ban’en bayay.”

⁴²Me ga’ar Jesus ngak, “Ere mu guy ban’en! Ya michan’ rom ngak Got e ke gol nigem.”

⁴³Ma ka chingiyal’ nem me yag ni nge guy ban’en, me un ngak Jesus ni be pining e magaer ngak Got. Ma fapi girdi’ ni aram urngirad e ra guyed e ren’em ma yad urngin nrogned e sorok ngak Got.