Ruk 18:14-43

¹⁴Jisas oh ameng oh giporpat Noh arpin meng napotiprohmur. Hanip gur Nohwi win isipsi hanmur daham guragure winnong daptuhuripti han gurnong oh Got oh win garsi han nahatipramur. Gur guragure winnong daptuhutin ohe danong na hat pati han gurnong oh Got oh win isipsi han naham win nadaptuhutipramur. Ihtin ohoh ihan ama yot han ite Got ohnong ma meng potpa ohe pe oh Got oh Parisi ohnong Go yah hat sapat hanmur na potipmur. Na pora takis yan darpat han ohnongwi er da hirmat amdama Go yah hanmur potipmur. Potporhan oh pokwi yah han ham it orhe apteinong pipmur pongopri.

¹⁵Gahan kuuhan ihir Nohe brer moh Jisas oh bes marima ha beten matinoh rima popingopari. Popriperhan orhe pinggit pisapat han ihir Baso por imtipari.

¹⁶Imtiperhan Jisas oh Es. Gur ihirnong Baso potipri. Got orhe napapindin hrepnong ma hapti ihir oh mihtin brer ihir ihapti bap ihir ohoh ihan gur baso potipri. Brer ihir nohe patnong moh ha apringwemur por ihirnong Nohe duupnong moh aprino pongopri.

¹⁷Porpat orhe han ihirnong Noh arpin meng napotiprohmur. Hanip gur brer ire Itapir supir ihir napaptiwa daham ire hrepnong hat ma patiru gurhe ihat orhor Got oh napapat hanwa daham orhe napapat hrepnong na ayahanoh gur eimatnap Got ohe napapindin hrepnong na hatipri bap gurmur pongopri.

¹⁸Gahan kak hat pat han tit apris Jisas ohnong Tisa. Yah hatwi sapat hana. Noh kinhat ushanoh yah hat eimat paten dasi hatiproh por dahandeingopri.

¹⁹Por dahamtiporhan Jisas oh ohnong Wa. Got orhap yah hat pat hanmur. Gin nohnong yah hatwi sapat hanmur ma napor oh Oh Got hatin hat pat hanmur daham naporda da na gidaham napor.

²⁰Go Got ohe sawa meng Moses ohe atem teimdapat ma napotip meng oh go am hat patmur. Sawa meng oh mamarumur. Bisei sawheri hapri. Haniphe ha haputinoh daham supri. Gapahhe hapri. Dasuh inin menghe hanip ire boknong deipri. Suanir itanir ire danong ham ire mengnong pomar amram dindeinmur. Ama sawa meng muk oh go am hat pat ohoh ihan go ama sawa meng muknong oh amram dindeinmur pongopri.

²¹Potporhan oh Ama sawa meng ohra noh rih brer garsut orhor gonsi pomat amram dindeisuhru ginhe imat orhorwi dimar patru patmur pongopri.

²²Potporhan Jisas oh Go imat dindeipat orhora; mama tit da mohoh go na ihpatmur. Gwe ma na ihpat oh mamarumur. Gin noh napotiprohmur. Gorhe ihsen erer ruumsan ma papat oh gin wan han ihirsi mohoma mani oh dara borop hat ma pati han ihirnong apinmur. Ihahhanoh go aw tei Got ohe napaptepra tei mahat ohe ruumsansi han hatipramur. Ihpat nohsi tap hat sashen han hat aprishenmur pongopri.

²³Potporhan oh Noh ihsen ruumsansi han ohoh ameng oh amrama Noh ihsen ruumsan pat moh gonsi ha mandatiproho daham isip da heimse ringopri.

²⁴Heimse ritporhan Jisas oh ohe da er hah danong am hama Ihsen ruumsansi ham kamah han hat ma pati han ihiroh Got ohe napapindin hrepnong hatinmat kinhat son ham butahaptimur.

²⁵Sahapti han kemar ihir sur tem kat oh kinhat ron ham butahaptimur. Erer ruumsansi hat pati han ihiroh amaru hat orhor atnap Got ohe napapindin hrepnong sonmat oh atnap kinhat son ham butahaptimur pongopri.

²⁶Potporhan ihir ameng oh amrama Epe. Kamah han ihirnongri Got oh amburpatmur dahapti tei moh gin Jisas oh kamah han ihir na saprimur ri moh ihan kinhatin han ihirnongwi ambura yah hat eimat paten dasi matipra por dahamtipari.

²⁷Dahamtiperhan Jisas oh Es. Hanip guragurdapat nambutin inasi na matin hat patimur. Got orhordapatwi nambutin inasi naham namburpatmur pongopri.

²⁸Potporhan Pita oh Nuhur erer mandam ohe kom sapti ohoh ihan Got oh amam nahat patkin daham Jisas ohnong Nohana. Nuhurra nure erer oh mandama gonong ma dinahapti ohwa pongopri.

²⁹Potporhan Jisas oh Noh arpin meng napotiprohmur. Hanip gur Got ohe napapindin ohe danong ham apo kuu brero taptemo supir itapiro ihirnong mandam ihat sayahanoh

³⁰ama ihat sapti han gurnong oh Got oh Gin kakdah moh patinhe gure mandaya ohe erer oh isip mat orhor naprisipramur. Kaput eimat ma patepri teihe Got oh yah hat eimat paten dasi nahatporhan eimat yah hat pateprimur pongopri.

³¹Gahan Jisas oh orhe pinggit pisapat nathei han ihirnong ambur irarhe teinong tap tei deipat Gin gur amratin. Dir Jerusarem ap mutuhnong ruptimur. Rusa ap mutuhnong hatperhan Got oh Hanip Brer nohe boknong ma inahatipri meng oh propet ihirnong potporhan ma brak matpa meng oh gonsi nohnong inahatperhan arpin dam timdipramur.

³²Inahatperhan ma dam timdipra oh mihat timdipramur. Nohnong Juda na hat pati han bap ire bes teinong nahatiprimur. Nahatperhan ihir tang nahayao dasei meng naporiyao tumbe gut nasariyao kaw boksi niyao naham nitiprimur. Nitperhan noh haputipramur.

³³Hapur sein nitperhan bimrip oh da apris it masapramur pongopri.

³⁴Potporhan orhe pinggit pisapat han ihir orhe ma por meng oh na dahatpari. Ama mutuh meng oh ihir da ban tahat patin ohoh pomat na dahatpari.

³⁵Jerusarem ap mutuh ruperim mandap oh sus Jeriko aptei oh koriyaoh kin kwisi han tit mandap manggap tan amdapat tongnoma hanip ihirnong manio erer oh ti namdina por deip deipatgopri.

³⁶Deip deipatdapat Hanipyah Jisaso ire ma apriyanong oh amrama We. Hanip ma apris hapti gur de gurwi apriptio por dahandeingopri.

³⁷Dahamtiporhan ihir Jisas Nasaret aptei han ohsi nuhur apriptimuro potpari.

³⁸Potperhan oh Jisas Depit ohe mon go apris kamahara naham yah nahatinmuro por uangopri.

³⁹Uatporhan ohri hat saya kuuhan ihir Ai. Kin kwisi han go imatri uatipra por baso por indeingopari. Baso por imtiperhan oh ire meng na amram atnap akit orhorwi Depit ohe mon go nohnong kamahara naham yah nahatina por ut patwi hangopri.

⁴⁰Ut patwi hatporhan Jisas oh sapatdapat tandeim kimiringopri. Kimiripat Ginra kin kwisi han ohnong ambur nohe pat duupnong moh poprina pongopri. Potporhan ihir ambur orhe duupnong popriperhan

⁴¹Jisas oh Gin noh gonong ha kinnahatinoh rim go nohnong unar por dahandeingopri. Gipor dahamtiporhan oh Hanipyaha. Nohe kin mama kwi hat pat moh nayah matporhan noh kin watahatporo daham ginapot unarmur pongopri.

⁴²Potporhan Jisas oh Go nohnong ohwi yah nahatiprohwa ma dahah ohe pe oh gorhe kinnong noh nayah deimur. Gin wataham sonmur pongopri.

⁴³Potporhan arpin kapkap asut orhorwi kin tandipekas rim watahangopri. Watahama Got ohnong weso pora armi mat Jisas ohe kom oh apingopri. Ihtiporhan kuuhan ihir wamara Got orhor yah dei ma hapat daham Got ohe winnong adaptuhur armi deingopari.